Emosi 7 - Ai Vola Tabu (Vakadewa Makawa Vakavoutaki 2021)（FRV21）

Na Raivotu ni Vodre

1Sa vakaoqo na ka e vakaraitaka vei au na Turaga ko Jiova; ka raica, sa bulia na vodre ni sa qai tekivu me tubu na co e muri; ka raica, sa kena co e muri oqo ni sa tamusuki oti na nona co na tui.

2Ia ni ra sa kania oti na co ni vanua, au a qai kaya,

“Kemuni na Turaga ko Jiova, mo ni veivosoti, ka'u sa vakamasuti kemuni!

Ena tu rawa vakaevei ko Jekope?

Sa lailai sara ko koya!”

3A sa veivutunitaka na ka oqo ko Jiova;

“Ena sega ga ni yaco,” sa kaya ko Jiova.

Na Raivotu ni Bukawaqa

4Sa vakaoqo na ka e vakaraitaka vei au na Turaga ko Jiova: ka raica sa kaci na Turaga ko Jiova, me ra mai ia na veilewai kaya e na bukawaqa, a sa kama kina na wasa levu, ka sa kania e dua na tiki ni vanua.

5Au a qai kaya,

“Kemuni na Turaga ko Jiova, mo ni kakua mada, au sa vakamamasu!

Ena tu rawa vakaevei ko Jekope?

Ni sa lailai ko koya!”

6Sa veivutunitaka na ka oqo ko Jiova;

“A ka talega oqo ena sega ni yaco,” sa kaya na Turaga ko Jiova.

Na Raivotu ni Vatu ni Vakarau

7Sa vakaoqo na ka e vakaraitaka vei au ko koya: ka raica, sa wavu tu na Turaga e na dela ni bai e tu vakadodonu, ka sa dua na vatu i vakarau e na ligana.

8A sa kaya vei au ko Jiova, “A cava ko sa raica, Emosi?” Au a kaya, “E dua na vatu i vakarau.” Sa qai kaya na Turaga,

“Raica, au na viritu e dua na vatu i vakarau

e na kedra maliwa na noqu tamata na Isireli;

au na sega sara ni vosoti ira tale;

9ia ena vakarusai na veiyasana cecere nei Aisake,

kei na veitikina tabu talega nei Isireli ena vakacacani,

ka'u na tucake me'u vala kei na vale i Jeropoama e nai seleiwau.”

Sa Vakatukutuku Vua na Tui ko Amasaia

10Sa qai talaki ko Amasaia na bete mai Peceli vei Jeropoama na tui Isireli, ka kaya, “Sa bukia na kemu vere ko Emosi e na kedra maliwa na vale i Isireli; sa sega ni vosota rawa na vanua na nona vosa kecega.

11Ni sa kaya vakaoqo ko Emosi,

“ ‘Ena mate e nai seleiwau ko Jeropoama,

kei ira na Isireli era na kau tani sara vakabobula

mai na nodra vanua.’ ”

12A sa kaya talega ko Amasaia vei Emosi, “Ko iko na daurai, mo dro tani sara ki na vanua ko Juta, ka kana madrai mai kea, mo ia talega kina na parofisai;

13ia mo kakua ni parofisai tale e Peceli, ni sa nona koro tabu na tui, ka sa valenisoro ni nona matanitu.”

14Sa qai kaya vei Amasaia ko Emosi, “Sa sega ni parofita koi au, au sa sega talega ni luve ni parofita; ia ka'u sai vakatawa ni sipi ga ka dausamaki lolo,

15ka sa kauti au ko Jiova mai na noqu daumuria voli na qele ni sipi, ka sa kaya vei au, ‘Mo la'ki parofisai vei ira na noqu tamata na Isireli.’

16“Ia oqo, mo rogoca na vosa i Jiova.

Ko sa kaya, ‘Kakua ni ko parofisaitaka na ca vei ira na Isireli,

kakua talega ni ko parofisaitaka na ca ki na vale i Aisake.’

17O koya oqo sa kaya kina ko Jiova:

‘A watimu ena ia na dautagane e na koro,

a luvemu tagane talega kei na luvemu yalewa era na bale e nai seleiwau,

a nomu vanua talega ena votai ni sa vakarautaki e na dali;

ia ko iko ko na mate e na vanua tawa savasava,

ko ira talega na Isireli era na kau tani sara vakabobula mai na nodra vanua.’ ”