Dauveilewai 13 - Ai Vola Tabu (Vakadewa Makawa Vakavoutaki 2021)（FRV21）

Na Sucu nei Samisoni

1A ra sa daucaka ca tale e na mata i Jiova, ko ira na Isireli; a sa soli ira ko Jiova ki na ligadra na kai Filisitia ka yabaki vasagavulu.

2A sa dua na tagane mai Sora, e na yavusa i Tani, na yacana ko Manoa; a sa yava na watina, ka sega ni vakaluvea.

3A sa rairai vua na yalewa na agilosi i Jiova, ka kaya vua, “Raica mada, ko sa yava, ka sega ni vakaluveni; ia ko na kunekune ga, ka vakasucuma e dua na gonetagane.

4Ia mo qarauni iko mada, mo kakua ni gunu waini se na yaqona, kakua talega ni kania e dua na ka sa sega ni savasava,

5Tiko 6.1-5ia raica, ko na kunekune, ka vakasucuma e dua na gonetagane. Ia ena sega ni tasi na uluna, ka ni na Nasiraiti me nona na Kalou ko koya na gone ni sa qai sucu. Ko koya ena vakatekivu me vakabulai ira na Isireli mai na ligadra na kai Filisitia.”

6A sa lako na yalewa ka tukuna vua na watina, ka kaya, “Sa lako mai vei au e dua na tamata ni Kalou, ia sa ka rerevaki sara na kenai rairai, sa vaka nai rairai ni agilosi ni Kalou. Ia ka'u a sega ni tarogi koya se sa lako mai vei, ka sa sega ni tukuna vei au na yacana ko koya;

7ia sa kaya vei au ko koya, ‘Raica, ko na kunekune, ka vakasucuma e dua na gonetagane. Ia mo kakua ni gunu waini se na yaqona, kakua talega ni kania e dua na ka sa sega ni savasava, ni na vakatabui me nona na Kalou ko koya na gone ni sa qai sucu, ka yacova na siga ena mate kina.’ ”

8A sa vakamasuti Jiova ko Manoa, ka kaya, “Au masuti kemuni, noqu Turaga, me lako tale mada mai vei keirau ko koya na tamata ni Kalou ko ni a tala mai eliu, me mai vakavulici keirau e na ka me caka vua na gone ena sucu mai.”

9A sa vakarogoca na vosa i Manoa na Kalou; a sa lako tale mai na agilosi ni Kalou vua na yalewa ni sa tiko e na were. Ia sa sega ni tiko kaya ko Manoa na watina.

10A sa cici kusarawa na yalewa, ka tukuna vua na watina, ka kaya vua, “Raica, sa rairai mai vei au ko koya na tamata ka lako mai vei au e na siga ko ya.”

11A sa cavu tu ko Manoa, ka muri watina, ka lako vua na tamata, ka kaya vua, “O iko beka na tamata ka vosa vua na yalewa?” A sa kaya ko koya, “Koi au ga.”

12A sa kaya ko Manoa, “Me yaco ga na nomuni vosa, ia me na vakaevei na neirau i valavala vua na gone, ka cava na ka me caka vua?”

13A sa kaya vei Manoa na agilosi i Jiova, “Na ka kecega ka'u a kaya vua na yalewa, me muria ga ko koya.

14Me kakua ni kania ko koya e dua na ka sa tubu mai na vaini, me kakua talega ni gunu waini se na yaqona, se kania e dua na ka sa sega ni savasava. Me vakabauta ko koya na ka kecega ka'u a vakarota vua.”

15A sa kaya vua na agilosi i Jiova ko Manoa, “Me keirau tarovi kemuni mada me keirau vakarautaka e dua na kemuni luve ni me.”

16A sa kaya vei Manoa na agilosi i Jiova, “Kevaka ko sa tarovi au, ka'u na sega ni kania na kakana ko vakarautaka, ia kevaka ko sa cakava e dua nai soro kama, mo vakacabora ga vei Jiova.” (Ni sa sega ni kila ko Manoa ni sai koya na agilosi i Jiova.)

17A sa kaya vua na agilosi i Jiova ko Manoa, “Ko cei na yacamuni, me keirau na vakarokoroko vei kemuni, ni sa yaco na nomuni vosa?”

18A sa kaya vei koya na agilosi i Jiova, “A cava ko sa taroga kina na yacaqu? Sa rui veivakurabuitaki.”

19A sa kauta ko Manoa na luve ni me kei nai madrali laukana, ka vakacabora vei Jiova e na dela ni vatu, ki vei koya sa daucakava na ka veivakurabuitaki, ka rau sa vakaraica matua ko Manoa kei na watina.

20Ka ni sa lako cake tiko na yameyame ni bukawaqa mai nai cabocabo-ni-soro vaka ki lomalagi, sa qai lako cake na agilosi i Jiova e na yameyame ni bukawaqa mai nai cabocabo-ni-soro. A sa raica ko Manoa kei na watina, ka rau sa cuva vakatoboicu ki na qele.

21A sa sega ni rairai tale mai na agilosi i Jiova vei Manoa se vua na watina. Sa qai kila ko Manoa ni sai koya na agilosi i Jiova.

22A sa kaya vua na watina ko Manoa, “E daru na mate vakaidina, ni daru sa raica na Kalou.”

23Ia sa kaya vua na watina, “Kevaka sa via vakamatei kedaru ko Jiova, ke sa sega ni vakadonuya na nodaru i soro kama, kei nai madrali laukana, ka sa sega ni vakatakila vei kedaru na ka kecega oqo, ka sega ni tukuna mai vei kedaru edaidai na ka vakaoqo.”

24A sa vakasucuma na gonetagane na yalewa, ka vakatoka na yacana ko Samisoni. A sa tubu cake na gone, ka sa vakalougatataki koya ko Jiova.

25A sa vakatekivu me vakauqeti koya na Yalo i Jiova mai Meene-tani, e na maliwa i Sora kei Esitaoli.