Dauveilewai 9 - Ai Vola Tabu (Vakadewa Makawa Vakavoutaki 2021)（FRV21）

Ko Apimeleki

1A sa lako ki Sikemi ko Apimeleki na luve i Jerupeali, kivei ira na weka i tinana, a sa vosa vei ira, io vei ira kecega na vuvale e na vale i tinana, a sa kaya,

2“Dou kaya mada vei ira kecega na kai Sikemi, ‘Na cava e vinaka vei kemudou, me ra lewai kemudou ko ira kecega na luve i Jerupeali era sa le vitusagavulu, se me lewai kemudou e le dua ga na tamata?’ Dou nanuma talega ni'u sa sui vata kei kemudou, ka lewe vata kei kemudou.”

3A ra sa tukuni koya ko ira na weka i tinana, me vaka na vosa kecega oqo, kivei ira kecega na kai Sikemi; ka sa gole na lomadra me ra muri Apimeleki, ni ra sa kaya, “Sa wekada ko koya.”

4A ra sa solia vua e vitusagavulu nai lavo siliva mai na bure i Peali-pirici, a sa volia kina ko Apimeleki eso na tamata lialia ka cidroi, me ra muri koya.

5A sa lako mai ko koya ki na vale i tamana ki Ofira, ka vakamatei ira na tacina, na luve i Jerupeali, era lewe vitusagavulu na tamata, e na dela ni dua na vatu. Sa vo ga ko Jocame, o koya ka gone vei ira na luve i Jerupeali, ni sa vunitaki koya.

6A ra sa soqoni vata ko ira kecega na kai Sikemi kei ira kece mai Peci-milo, ka ra sa la'ki buli Apimeleki me tui, mai na oki sa duri mei vakatakilakila, oqori sa tiko mai Sikemi.

Na Vosa Vakatautauvata ni Veivunikau

7Ni sa tukuni vei Jocame, a sa lako ko koya ka la'ki tu e dela ni Ulunivanua ko Kirisimi, ka tabalaka cake na domona, ka kaci, ka kaya vei ira, “Dou rogoci au mai, na kai Sikemi, ena rogoci kemudou kina na Kalou.

8Sa lako ko ira na vunikau

me lumuta e dua me nodra tui.

A ra sa kaya ki na vu ni olive,

‘Mo lewai keimami.’

9A sa kaya vei ira na vu ni olive,

‘Me'u biuta li na noqu waiwai

sa vakarokorokotaki kina na Kalou kei ira na tamata,

ka me'u la'ki veidretaki vei ira na vunikau?’

10A ra sa kaya na vunikau ki na vuni lolo,

‘Mo lako mai mo lewai keimami.’

11Ia sa kaya vei ira na vuni lolo,

‘Me'u biuta li na noqu kamikamica,

kei na vuaqu vinaka,

ka me'u la'ki veidretaki vei ira na vunikau?’

12A ra sa kaya na vunikau ki na vaini,

‘Mo ni lako mai mo lewai keimami.’

13A sa kaya na vaini vei ira,

‘Me'u biuta li na noqu waini,

sa vakarekitaka na Kalou kei ira na tamata,

ka me'u la'ki veidretaki vei ira na vunikau?’

14Sa ra qai kaya vua na soni na vunikau kecega,

‘Mo ni lako mai mo lewai keimami.’

15A sa kaya vei ira na vunikau na soni,

‘Kevaka dou sa lumuti au vakaidina me'u nomudou tui,

dou lako mai ka vakararavi ki na noqu yaloyalo;

ia kevaka e segai, me lako mai na soni na bukawaqa

ka kania na vu ni sitari kece mai Lepanoni.’

16“Ia oqo, kevaka dou sa cakacaka vakayalodina ka vakayalododonu, ni dou sa buli Apimeleki me tui, ka dou sa caka vinaka talega vei Jerupeali kei na nona lewe-ni-vuvale, ka sa saumi koya me vaka na cakacaka ni ligana—

17ni sa vala e na vukumudou ko tamaqu, ka bolea dina na mate, ka vakabulai kemudou kina mai na ligadra na kai Mitiani,

18ia dou sa lako vakaivalu mai edaidai ki na lewe-ni-vuvale i tamaqu, ka vakamatei ira na luvena, e le vitusagavulu na tamata, e na dela ni dua na vatu, ka sa buli Apimeleki na luve ni nona vada me tui vei ira na kai Sikemi, ni sa wekamudou—

19kevaka dou sa cakacaka vakayalodina ka vakayalododonu, e na siga oqo, vei Jerupeali kei na nona lewe-ni-vuvale, mo dou qai marautaki Apimeleki, ka me marautaki kemudou talega ko koya.

20Ia kevaka e segai, me lako mai vei Apimeleki na bukawaqa, ka kani ira na kai Sikemi kei Peci-milo, ka me lako talega na bukawaqa mai vei ira na kai Sikemi, kei Peci-milo, ka kani Apimeleki.”

21A sa qai lako tani ko Jocame, ka dro, ka lako ki Pieri, ka tiko mai kina, ni sa rerevaki Apimeleki na tuakana.

Na Vakamalumalumutaki nei Apimeleki

22A sa nodra tui na Isireli ko Apimeleki ka yabaki tolu.

23Ia sa qai tala na Kalou e dua na yalo ca e na kedrau maliwa ko Apimeleki kei ira na kai Sikemi; ka ra sa bukiveretaki Apimeleki ko ira na kai Sikemi,

24me saumi kina nai valavala kaukauwa sa caka vei ira na luve i Jerupeali e lewe vitusagavulu, io, me saumi na kedra dra vei Apimeleki na tacidra, o koya sa vakamatei ira, vei ira talega na kai Sikemi, ko ira era sa vakaukauwataki koya me vakamatei ira na wekana.

25Ia ko ira na kai Sikemi era sa lesia eso me ra vuni koto ka ravuravu mai na dela ni veiulunivanua. A ra sa daukoveraka na ka vei ira kecega era lako yani e na sala ko ya; ka sa tukuni oqo vei Apimeleki.

26Ni sa lako mai ko Keali na luve i Epeti kei ira na wekana ka ra lako ki Sikemi, a ra sa vakararavi vua ko ira na kai Sikemi.

27A ra sa lako yani ki na were, ka vetivetia na vua ni nodra veivaini, ka lobaka, ka marau voli, ka curu ki na bure ni nodra kalou, ka kana ka gunu, ka vatonaki Apimeleki me ca.

28A sa kaya ko Keali na luve i Epeti, “O cei ko Apimeleki, ka ko cei koi keda na kai Sikemi, me da qaravi koya? Sa sega li ni luve i Jerupeali ko koya, ka sa nona talai ko Sipuli? Dou qaravi ira na tamata i Amori na tama i Sikemi; ia ka cava me da qaravi koya kina koi keda?

29Me soli mada ga kivei au ko ira na tamata oqo, ka'u na qai vakasivoi Apimeleki. Sa kaya talega ko koya vei Apimeleki, ‘Mo vakalewevuqataki ira na nomu mataivalu, ka curu mai.’ ”

30Ia ni sa rogoca ko Sipuli na turaga ni koro na vosa i Keali na luve i Epeti, sa tubu na nona cudru.

31A sa tala lo eso na tamata ko koya vei Apimeleki, ka kaya, “Raica, sa lako mai ki Sikemi ko Keali na luve i Epeti, kei ira na tacina, ka raica, era sa vakauqeti ira na lewe ni koro me ra vala kei iko.

32Ia mo cavu tu mada e na bogi, o iko kei ira na tamata era tiko vata kei iko, ka wawa koto e na were.

33Ia mo sou e na mataka ni sa qai cadra na mata-ni-siga, ka kaba na koro, ka ni sa curu yani vei iko ko koya kei ira na tamata era tiko vata kaya, mo qai kitaka vei ira me vaka ko sa rawata.”

34A sa cavu tu e na bogi ko Apimeleki, kei ira kecega na tamata era tiko vata kaya, a ra sa la'ki wawa koto ki Sikemi, a ra sa va na mataivalu.

35A sa curu yani ko Keali na luve i Epeti, ka la'ki tu e na matamata-ni-koro, a sa cavu tu mai na vanua era vuni koto kina ko Apimeleki kei ira na tamata era tiko vata kaya.

36Ia ni sa raici ira na tamata ko Keali, sa kaya ko koya vei Sipuli, “Raica, era sa lako sobu tiko mai eso na tamata mai na dela ni veiulunivanua!” A sa kaya vua ko Sipuli, “Ko sa raica cala nai yaloyalo ni veiulunivanua me vaka sa tamata.”

37A sa vosa tale ko Keali, ka kaya, “Raica, era sa lako sobu tiko mai na tamata mai na tiki ni vanua ka rewa toka, ka dua nai vavakoso sa lako mai e na sala mai na oki ki Eloni-mioninimi.”

38A sa kaya vua ko Sipuli, “Sa qai vakaevei na gusumu, ni ko a kaya kina, ‘O cei ko Apimeleki me da qaravi koya?’ E sega beka ni ko ira na tamata oqo ko a beca ne? Oqo, mo curu mada yani, mo drau vala kaya.”

39A sa lako yani ko Keali e na matadra na kai Sikemi, a sa veivala kei Apimeleki.

40A sa vakasavi koya ko Apimeleki, ka sa dro e matana ko koya. A sa bale e lewe vuqa era vakamavoataki, ka yaco sara ki na matamata-ni-koro.

41A sa la'ki tiko ki Eruma ko Apimeleki; a sa vakasavi Keali kei ira na wekana ko Sipuli, me ra kakua ni tiko e Sikemi.

42Ia e na mataka sa lako yani ki na were ko ira na tamata; a ra sa tukuna vei Apimeleki.

43A sa kauti ira na tamata ko koya, ka wasei ira me ra tolu na mataivalu, ka wawa koto e na were. A sa rai voli, ka raica, era sa curu yani mai na koro na tamata. A sa cavu tu ko koya, ka mokuti ira.

44Ia ko Apimeleki, kei na mataivalu era tiko vata kaya, era sa cici ga, ka la'ki tu ki na matamata-ni-koro, ia na mataivalu ruarua e rau sa cicivi ira kecega era sa tiko e na were, ka mokuti ira.

45A sa kaba tiko na koro e na siga taucoko ko ya ko Apimeleki; ka sa rawa na koro, ka vakamatei ira na tamata era sa tiko kina, ka basuraka na koro, ka kaburaka kina na masima.

46Ia ni ra sa rogoca na tamata kecega era sa tiko e na vale-cecere mai Sikemi, era sa curuma na vale kaukauwa, io, na burekalou i Eli-perici.

47A sa tukuni vei Apimeleki, ni ra sa soqoni vata na tamata kecega e na vale-cecere mai Sikemi.

48A sa lako cake ko Apimeleki kei ira kecega na tamata era tiko vata kaya, ki na Ulunivanua ko Salimoni, a sa kauta e dua na matau e ligana ko Apimeleki, ka taya sobu e dua na tabanikau, ka kauta, ka viribale ki domona, ka sa kaya vei ira na tamata era tiko vata kaya, “A ka dou sa raica ni'u cakava, dou kusarawa mo dou kitaka vakakina.”

49A ra sa dui taya sobu na nona tabanikau ko ira na tamata yadua ka ra sa vakamuri Apimeleki, ni ra sa binia ki na vale kaukauwa, ka vakama e na bukawaqa na vale kaukauwa era sa tiko kina, ka ra sa mate talega kina na tamata kece sa dautiko e na vale-cecere mai Sikemi, ka ra lewe dua beka na udolu na tagane kei na yalewa.

50Sa qai lako ki Tipesi ko Apimeleki, ka kabai Tipesi, ka rawa.

51Ia sa tiko e dua na vale-cecere ka kaukauwa e loma ni koro, ka ra sa dro kina na tagane kecega kei na yalewa, kei ira kece na lewe ni koro, ka ra sa sogoti ira kina, ka cabe ki na delavuvu ni vale-cecere.

52A sa lako ki na vale-cecere ko Apimeleki, ka valuta, ka toro voleka ki na katuba ni vale-cecere, me vakama e na bukawaqa.

532Samu 11.21Ka sa dua na yalewa sa viritaka e dua na tiki ni vatu-i-qaqi ki na ulu i Apimeleki, ka voroka na nona qavokavoka.

54A sa kaciva totolo sara ko koya na cauravou sa dau kauta voli na nona i yaragi, ka kaya vua, “Mo ucuna na nomu i seleiwau, ka vakamatei au, de sa kainaki e na vukuqu, ‘Sa vakamatei koya e dua na yalewa.’ ” A sa suaka-basikati koya na nona cauravou, ka sa mate ko koya.

55Ia ni ra sa raica ko ira na Isireli sa mate ko Apimeleki, era sa dui lesu ki na nona tikina.

56Sa sauma vakaoqo na Kalou kivei Apimeleki e na vuku ni cala ka kitaka ko koya vei tamana, ni sa vakamatei ira na tacina e lewe vitusagavulu.

57A sa sauma talega vei ira na kai Sikemi na Kalou na nodra ca kecega me vakalesui tale kivei ira, ka sa yacovi ira na vosa-ni-cudru i Jocame na luve i Jerupeali.