Same 92 - Ai Vola Tabu (Vakadewa Makawa Vakavoutaki 2021)（FRV21）

A Sere ni Vakavinavinaka vua na Kalou A Same. A Sere me baleta na Siga ni Vakacecegu.

1A ka vinaka me ia na vakamolimoli vei Jiova,

ka me seretaka na vakavinavinaka ki na yacamuni, oi Kemuni sa Cecere Sara;

2me dautukuna na nomuni yalololoma e na mataka,

kei na nomuni lomadina e na veibogi,

3e na qiriqiri e tini na kena wa, kei na soliteri,

kei na api e domo vinaka.

4Ni kemuni sa vakamarautaki au, i Jiova, e na nomuni cakacaka;

au na rekitaka na cakacaka ni ligamuni.

5I Jiova, sa ka levu na nomuni cakacaka!

A ka titobu na nanuma ni lomamuni!

6A tamata yalovakamanumanu sa sega ni kila,

kei na tamata lialia sa sega ni vuku rawa e na ka oqo:

7ni ra sa tubu me vaka na co ko ira nai valavala ca,

ka sa bulabula na daucaka ca,

sa ka ga me ra kawaboko laivi,

8ia koi kemuni, i Jiova, sa cecere sara ka sega ni mudu.

9Ni ra na rusa laivi vakaidina, i Jiova,

ko ira na nomuni meca;

ka ra na dui vakasevi tani

ko ira kecega na daucaka ca.

10Ia na noqu i leu ko na laveta cake me vaka nai leu ni iunikoni;

au na lumuti e na waiwai vou.

11Ia ena raici ira na noqu meca na mataqu,

ka rogoca na daligaqu ni ra rusa na tamata i valavala ca era tucake me ra vakacacani au.

12Ena bulabula na yalododonu me vaka na vuni niu-sawa;

ena tubu tiko me vaka na sitari mai Lepanoni.

13O ira era tei e na vale i Jiova

era na bulabula e na lomanibai ni noda Kalou.

14Era na vuavuai tiko ni ra sa qase mai;

era na drokadroka ka bulabula,

15me vakatakila ni sa yalododonu ko Jiova;

a noqu uluvatu ko koya, ka sa sega vua na caka cala.