1 Same 54 A ra sa lako mai kivei Saula ki Kipea ko ira na kai Sifi, ka kaya, “Sa sega li ni vunitaki koya ko Tevita e na vanua cecere ko Ekila, ka veibasai kei Jesimoni?”
2A sa ia ko Saula, ka lako sobu ki na vanua lala mai Sifi, kei ira e le tolu na udolu na tamata era sa digitaki tu mai vei ira na Isireli, me ra qarai Tevita e na vanua lala mai Sifi.
3A sa la'ki tiko ko Saula e na Ulunivanua ko Ekila, ka donuya na tokalau kei Jesimoni, e na bati ni sala. Ia sa tiko mai na vanua lala ko Tevita. Ni sa raica ni sa mai muri koya ki na vanua lala ko Saula,
4sa qai tala ko Tevita eso na tamata me ra yamata, a sa kila kina ni sa lako vakaidina mai ko Saula.
5A sa ia ko Tevita, ka lako mai ki na tikina ka tiko kina ko Saula. A sa raica ko Tevita na tikina sa koto kina ko Saula, kei Epineri na luve i Neri, na kavetani ni nona mataivalu. A sa tiko ko Saula e na yasana ni qiqi-ni-yaya, a ra sa koto vakavolivolita ko ira na tamata.
6A sa vosa ko Tevita, ka kaya vei Eiimeleki na Itaiti, vua talega na luve i Seruwaia, ko Apisai, na taci Joape, ka kaya, “O cei ena lako sobu vata kei au vei Saula ki na nona i tikotiko?” A sa kaya ko Apisai, “Au na lako sobu kei iko.”
7A rau sa lako kivei ira na tamata e na bogi ko Tevita kei Apisai. Ka raica, sa moce koto ko Saula e na yasana ni qiqi-ni-yaya, ka sa cokataki tu e na qele na nona moto ka voleka ki na uluna; a sa koto vakavolivoliti koya ko Epineri kei ira na tamata.
8A sa kaya vei Tevita ko Apisai, “Sa solia edaidai na nomu meca ki na ligamu na Kalou. Ia oqo, me'u cokai koya ga vakadua e na moto ki na qele, ka'u na sega tale ni cokai koya vakarua.”
9Ia sa kaya vei Apisai ko Tevita, “Mo kakua ni vakamatea; o cei me rawa ni dodoka na ligana vua nai lumuti i Jiova, ka sega ni cala kina?”
10Sa kaya talega ko Tevita, “Me vaka sa bula ko Jiova, ena yaviti koya ga ko Jiova; se na yaco na nona siga me mate kina, se na lako sobu ki nai valu, ka mate kina.
111Samu 24.6Me kakua sara vei au e na vuku i Jiova me'u dodoka yani na ligaqu vua nai lumuti i Jiova. Ia mo kauta mada na moto sa tu mai na uluna kei na saqa wai, ka me daru lako.”
12A sa kauta ko Tevita na moto kei na saqa wai mai na ulu i Saula, ka rau sa lako yani. A sa sega na tamata e raica, ka sega e kila, ka sa sega e dua sa yadra mai, ni ra sa moce kecega, ka ni sa biti ira na moce lutu mai vei Jiova.
13A sa qai lako yani ki na yasana kadua ko Tevita, ka tu vakayawa e dela ni ulunivanua, me sa veiyawaki sara kei ira.
14A sa kaci vei ira na tamata ko Tevita, vei Epineri talega na luve i Neri, ka kaya, “O sa sega beka ni vosa mai, Epineri?” Sa qai vosa mai ko Epineri, ka kaya, “O cei ko iko sa kaci vua na tui?”
15A sa kaya vei Epineri ko Tevita, “Sa sega li ni tagane qaqa ko iko? Ia ko cei vei ira na Isireli sa tautauvata kei iko? Ia ka cava ko sa sega ni yadrava kina na nomu turaga na tui? Ni sa lako yani e dua na tamata me vakamatea na tui na nomu turaga.
16Sa sega ni vinaka na ka oqo ko sa cakava. Me vaka sa bula ko Jiova, e dodonu mo dou mate, ni dou sa sega ni vakatawa na nomudou turaga, o koya ka lumuta ko Jiova. Ia dou liaca mada oqo se sa tiko evei na nona moto na tui, kei na saqa wai ka tiko e uluna.”
17A sa kila na domo i Tevita ko Saula, ka kaya, “Oqo li na domomu, i Tevita na luvequ?” A sa kaya ko Tevita, “A domoqu ga, kemuni na noqu turaga na tui.”
18A sa kaya ko koya, “A cava sa vakacemuria kina vakaoqo na nona tamata na noqu turaga? A cava ka'u sa cakava? Se cava na ca sa tu vei au?
19Ia oqo, mo ni rogoca mada na noqu turaga na tui na vosa ni nomuni tamata. Kevaka sa vakauqeti kemuni ko Jiova mo noqu meca, me qai vakadonuya ko koya e dua nai madrali; ia kevaka ko ira ga na tamata, me vakarusai mada ko ira e na mata i Jiova; ni ra sa vakasevi au tani edaidai me'u kakua ni wasea nai votavota i Jiova, ka ra kaya, ‘Mo la'ki qarava eso na kalou tani.’
20O koya oqo, me qai kakua ni lutu tani ki na qele mai na mata i Jiova na noqu dra, ni sa lako voli mai na tui Isireli me qara e dua na kutu ni manumanu me vaka sa vakasavi na toa ni veikau mai na veiulunivanua.”
21A sa kaya ko Saula, “Au sa cala ga. Mo lesu mada, na luvequ Tevita, ni'u na sega ni vakacacani iko tale, ni sa ka talei e matamu na noqu bula e na siga edaidai. Raica, ka'u sa cakacaka vakalialia, ka'u sa cala vakalevu sara.”
22Ka sa vosa ko Tevita, ka kaya, “Raica, sa tu oqo na moto, kemuni na tui! Ia me lako mai e dua vei ira na cauravou, ka kauta yani.
23Sa dausauma ko Jiova na nona yalododonu na tamata yadua kei na nona yalodina; ni sa soli kemuni ko Jiova ki na ligaqu edaidai, ia ka'u a bese ni dodoka yani na ligaqu vua nai lumuti i Jiova.
24Ka raica, me vaka sa ka levu e mataqu na nomu bula e na siga oqo, me ka levu vakakina na noqu bula e na mata i Jiova, ka me vakabulai au ko koya mai na ka rarawa kecega.”
25A sa qai kaya vei Tevita ko Saula, “Mo kalougata, i Tevita na luvequ! Ko na cakava na ka levu, ka ko na gumatua tikoga.” Sa qai lako yani ko Tevita e nona i lakolako, ka sa lesu ko Saula ki na nona tikina.
Who We AreWhat We EelieveWhat We Do
2025 by iamachristian.org,Inc All rights reserved.
