Sakaraia 12 - Ai Vola Tabu (Vakadewa Makawa Vakavoutaki 2021)（FRV21）

Na Qaqa nei Jerusalemi

1Na vosa ni parofisai bibi mai vei Jiova ka baleti ira na Isireli: Sa kaya ko Jiova, o koya sa tevuka yani na lomalagi, ka sa tauyavutaki vuravura, ka sa cakava na yalo ni tamata e lomana:

2“Raica, au na vakayacori Jerusalemi me bilo ni dauveivakamatenitaki vei ira kecega na veimatanitu era tiko vakavolivolita; ena vaka talega kina ko Juta, ni sa buku na druadrua kei Jerusalemi.

3Ia e na gauna ko ya ka'u na vakayacori Jerusalemi me dua na vatu bibi vei ira kecega na veimatanitu. Ko ira kece era laveta era na mavoa vakaca kina, ia era na soqoni vata ga na lewe i vuravura kecega me ra mai valuta.

4E na siga ko ya, sa kaya ko Jiova, ka'u na vakidroataka na ose kecega, ka yaviti ira era sa vodoka, me ra lialia. Ia ka'u na yadrava na vale i Juta, ka'u na vakamatabokotaka na nodra ose kece na veimatanitu.

5A ra na qai dui kaya e lomadra na turaga ni Juta, ‘Sa rawata na kaukauwa ko ira na kai Jerusalemi e na vuku i Jiova-ni-lewevuqa na nodra Kalou.’

6“E na siga ko ya ka'u na vakayacora na veimataqali i Juta me ra tautauvata kei na miqa bukawaqa e na loma ni buka droka, ka tautauvata kei na cina e waqa tu e na loma ni veivau sila. A ra na kani ira na veimatanitu era tiko volita ki nai matau kei nai mawi, ena qai tawa tale ko Jerusalemi e na kenai tikotiko dina mai Jerusalemi.

7“Ia ko Jiova ena vakabula taumada na nodra valelaca na Juta, me kakua ni viavialevu vei ira na Juta nai ukuuku ni vale i Tevita kei nai ukuuku ni kai Jerusalemi.

8E na siga ko ya ena vakarurugi ira na kai Jerusalemi ko Jiova, me rawa kina vei koya sa malumalumu vei ira e na siga ko ya me vakataki Tevita, ka na vakataka na Kalou na vale i Tevita, io, me vaka na agilosi i Jiova, ka sa liutaki ira.

9Ia ena yaco e na siga ko ya, ka'u na segata me'u vakarusa na veimatanitu kecega era sa mai vala kei Jerusalemi.

Na Lolositaki nei Koya Era sa Coka

10 Joni 19.37; Vtaki 1.7 Maciu 24.20; Vtaki 1.7 “Au na sovaraka talega ki na vale i Tevita kei na kai Jerusalemi na yalo sa tubu kina na loloma kei na vakamamasu, me rawa kina, ena gauna era raici au kina, o koya era sa coka, era na qai tagicaki koya, me vaka e dua sa tagicaka na luvena e dua bauga, ka ra na rarawa sara e na vukuna, me vaka e dua sa rarawa sara e na vuku ni nona ulumatua.

11E na siga ko ya, ena dua na tagi levu e Jerusalemi, me vaka na tagi mai Etatirimoni e na buca ko Mikitoni.

12Ena tagi na vanua, na veivuvale yadua vakataki ira; na veivuvale ni vale i Tevita vakataki ira, kei na watidra vakataki ira; na veivuvale ni vale i Necani vakataki ira, kei na watidra vakataki ira;

13na veivuvale ni vale i Livai vakataki ira, kei na watidra vakataki ira; na veivuvale ni vale i Semeai vakataki ira, kei na watidra vakataki ira;

14io, na veivuvale kecega sa vo, na veivuvale yadua vakataki ira, kei na watidra vakataki ira.