Aisea 33 - Ai Vola Tabu (Vakadewa Makawa Vakavoutaki 2021)（FRV21）

A Masu ni Kere Veivuke

1Ena ca ko iko sa dauvakacaca,

ia ko a sega ni vakacacani;

ko iko talega sa dauveivakaisini,

a ra a sega ni vakaisini iko!

Ni sa oti na nomu vakacaca,

ko na qai vakacacani;

ni sa oti na nomu veivakaisini,

era na qai vakaisini iko.

2Kemuni Jiova, mo ni lomani keimami mai;

keimami sa wawa tiko vei kemuni.

Mo ni ligai keimami mada e na veimataka,

ia mo ni neimami vakabula e na gauna ni rarawa.

3Ni sa rogo na ue, era dro na tamata;

ni kemuni sa tucake mai, era sa veiseyaki na veimatanitu.

4Ia na nomudou i toki-ni-valu ena kumuni me vaka sa daukumuna na banuve;

me vaka na nodra veiladeyaki na vodre ena ladeva vakakina na ka oqori.

5Sa cecere ko Jiova, ni sa tiko mai cake ko koya;

sa vakasinaiti Saioni ko koya e na lewa kei na cakacaka dodonu;

6ia ena vakataudeitaka na nomu gauna na vuku

kei na yalomatua kei na veivakabulai levu;

a rerevaki Jiova, sa nona i yau.

7Raica, ko ira na nodra qaqa era sa kaila e tautuba;

era sa tagi vakalevu ko ira na mata ni sautu.

8Sa lala na salatu,

sa sega e lakova.

Sa voroka ko koya na veidinadinati,

sa beca na kena vosa ni yalayala,

sa sega ni doka e dua na tamata.

9Sa tagi na vanua, sa ceguoca;

sa madua ko Lepanoni, ka sa malai yani;

sa vaka na vanua dravuisiga ko Saroni;

a sa vakamiraka na drauna ko Pasani kei Kameli.

Sa Vunauci Ira na Meca ko Jiova

10“Oqo ka'u sa qai tucake,” sa kaya ko Jiova,

“oqo ka'u na sa qai vakalevulevui;

oqo ka'u na sa qai vakaceceretaki au.

11Dou na kunekunetaka na qa ni sila, dou na vakasucuma na vu-ni-sila;

a nomudou i cegu, me vaka na bukawaqa, ena kati kemudou.

12Ia na veimataqali, era na vaka na lovo ni lase;

me vaka na kau vakavotona sa ta era na kama e na bukawaqa.”

13Koi kemudou sa tiko vakayawa, dou rogoca na ka ka'u a cakava;

kei kemudou sa tiko voleka, dou vakatakila na noqu kaukauwa.

14Sa rere mai Saioni ko ira nai valavala ca;

sa sautaninini ko ira na dauveivakaisini.

“Ko cei vei keda me na tiko e na bukawaqa daukana voli?

Ko cei vei keda me na tiko e na bukawaqa ka tawa mudu?”

15Ko koya ga sa dodonu na nona i lakolako, ka sa vosataka na ka dodonu;

ko koya sa cata nai yau sa kovei,

ka sa bese na ligana ni taura nai solisoli ni veivaqumi,

ka sa tabonaka na daligana mai nai rogorogo ni vakadave-dra,

ka sa bobo na matana me kakua ni raica na ca,

16ko koya oqo ena tiko e na tikina cecere;

na nona vale kaukauwa sai koya na bai vatu ni vakaruru;

ena soli vua na kena kakana, ia ena sega ni di na mena wai.

Na Nona Vanua na Tui Cecere

17Na matamu ena raici koya na tui, ni sa uku cavu tu;

ka na kunea na vanua sa yawa sara.

18A lomamu ena qai vakananuma ki na ka ni veivakarerei,

ka kaya, “Sa evei na vunivola?

Sa evei na dauniyau?

Sa evei na dauwilika na veivale cecere?”

19Ko na sega ni kunea tale na kawa tamata matadei ko ya,

na kawa tamata daudredre ni kilai na nodra vosa,

na gusu daukaka sa sega ni macala.

20Mo vakaraici Saioni, na koro ni noda solevu tabu!

A matamu ena kunei Jerusalemi,

nai tikotiko vinaka, na valelaca sa sega ni kau tani;

a kenai latu ena sega sara ni cavu tale,

se cavuka e dua na kena dali.

21Ia ko Jiova ka vakaiukuuku ena yaco vei keda mai kea

me vaka na vanua ni veiuciwai raba kei na soniwai,

ka na sega ni vocetaki kina e dua na waqa,

ena sega talega e dua na waqa vakaturaga me lako voli kina.

22Io ko Jiova sa noda turaga-ni-lewa, ko Jiova sa noda vu ni lawa,

ko Jiova sa noda tui; o koya ga ena vakabulai keda.

23Sa savu walega na nomu dali;

sa dredre ni vakaduria nai vana,

era sega ni vakarewataka rawa na laca.

Sa qai votai nai yau levu sa tauri;

era tokitaka ko ira na lokiloki.

24Ia na lewe ni koro ena sega ni kaya, “Ka'u sa tauvi mate;”

o ira na tamata era sa tiko kina ena vosoti na nodra i valavala ca.