Cakacaka 22 - Ai Vola Tabu (Vakadewa Makawa Vakavoutaki 2021)（FRV21）

1“Oi kemuni na veiwekani, kei na qase, ni vakarorogo mai ni ka’u sa tukuni au vei kemuni.”

2Ia ni ra sa rogoca sa vosa ko koya vei ira e na vosa vaka-Iperiu, era sa tiko lo sara. Sa qai kaya ko koya:

3 Caka 5.34-39 “Oi au e dua na Jiu, ka sucu mai Tarisu mai Silisia, ia ka’u a susugi cake e na koro oqo e na veivakatavulici nei Kamelieli, ka vulica na kena muri vakadodonu sara na nodra vunau na qase, ka’u sa gumatua e na vuku ni Kalou, ka me vakataki kemuni kecega e na siga oqo.

4Caka 8.3; 26.9-11Au a vakacacani ira sa muria na Sala me ra mate, ni ka’u a vesuka ka biuta ki na valeniveivesu na tagane eso kei na yalewa eso.

5Sa noqu i vakadinadina na bete levu kei ira kecega na qase, ni ka’u a taura na nodra i vola vei ira na veiwekani, ka lako ki Tamasiko, me’u vesuki ira era sa tiko kina ka kauti ira lesu mai ki Jerusalemi, me ra cudruvi.

Sa Tukuna ko Paula na Nona Veisau(Cakacaka 9.1-19; 26.12-18)

6“Ia sa yaco, ni ka’u sa lako yani, ka toro voleka ki Tamasiko e na siga levu tutu, sa dua na rarama levu sa cila vakasauri mai lomalagi ka vakavolivoliti au.

7Au sa qai bale ki na qele, ka rogoca e dua na vosa sa kaya vei au, ‘I Saula, i Saula, ko sa vakacacani au e na vuku ni cava?’

8Au sa qai taroga, ‘O cei beka koi kemuni, Turaga?’ A sa kaya vei au ko koya, ‘Oi au ko Jisu na kai Nasareci, ko koya ko sa vakacacana.’

9A ra sa raica na rarama ko ira sa lako vata kei au, ia era sa sega ga ni rogoca na vosa i koya sa vosa mai vei au.

10Au sa qai taroga, ‘A cava me’u kitaka, noqu Turaga?’ A sa kaya mai vei au na Turaga, ‘Mo tucake, ka lako ki Tamasiko; ena tukuni kina vei iko na ka kecega sa lesi vei iko mo kitaka.’

11Ia ni ka’u sa sega ni rai rawa e na vuku ni kena remoremo na rarama ko ya, era sa tuberi au ko ira sa lako vata kei au, ka’u sa yaco kina ki Tamasiko.

12“A sa dua na Ananaiasa, a tamata lotu dina me vaka na vunau, ka sa vosa vinakataki mai vei ira kecega na Jiu era sa tiko mai kina,

13sa lako mai vei au; a sa tu e yasaqu, ka kaya vei au, ‘Na wekaqu Saula, mo rai vinaka tale!’ Ia, e na tiki-ni-siga ko ya, ka’u sa qai rai rawa tale ka raici koya.

14A sa kaya ko koya, ‘Sa digitaki iko na nodra Kalou na noda qase mo kila na lomana, ka raici Koya na Yalododonu ka rogoca na vosa ni gusuna;

15ni ko na dautukuni koya vei ira na tamata kecega e na ka ko sa raica ka rogoca.

16Ko sa qai vakaberabera tale e na vuku ni cava? Tucake, mo papitaisotaki, ka vuya laivi na nomu i valavala ca, ka masuta na yaca ni Turaga.’

Sa Kacivi ko Paula me La'ki Vunau Vei Ira na Kai Matanitu Tani

17“Ia ka yaco ni’u sa lesu tale mai ki Jerusalemi ka masu tiko e na vale-ni-soro, au a qai raica na raivotu,

18ka'u a raici Jisu ni sa kaya vei au, ‘Kusa rawa mo lako tani e Jerusalemi, ni ra na sega ni vakabauta na nomu i tukutuku e na vukuqu.’

19Au sa qai kaya, ‘Kemuni na Turaga, era sa kila ni ka’u a biuti ira ki na valeniveivesu era sa vakabauti kemuni ka vakanakuitataki ira e na valenilotu kecega.

20Caka 7.58Ia ni sa vakadavei na dra kei Sitiveni ko koya ka dautukuni kemuni, au a tu voleka talega kina, ka vakadonuya na nona mate, ka maroroya na nodra i sulu era sa vakamatea.’

21Sa qai kaya vei au ko koya, ‘Mo lako, ni ka’u na talai iko vakayawa vei ira na kai matanitu tani.’ ”

Na Ka e qai Yaco ena Vuku ni Vosa i Paula

22Era sa vakarogoci koya ka yacova mada na vosa oqo, ka ra sa qai tabalaka cake na domodra, ka kaya, “Me kau tani e vuravura na mataqali tamata vakaoqo! Ni sa sega ni dodonu me bula.”

23Ia ni ra sa qoqolou tiko, ka cebuceburaka na nodra i sulu, ka kaburaka ki macawa na kuvu-ni-soso,

24a sa vakarota na komada me ra kauti koya ki na bure ni valu, ka sa kaya me tarogi ni sa vakanakuitataki, me kila ko koya se cava era sa qolouvaki koya kina vakaoqo.

25Ia ni ra sa vesuka tiko e na wa, sa taroga ko Paula vua na turaga-ni-valu sa tu kina, “E tara beka vei kemudou mo dou vakanakuitataka na kai Roma, ka sega mada ni lewai?”

26Ia ni sa rogoca na turaga-ni-valu ko ya, sa laki tukuna vua na komada, ka kaya, “Mo lewai iko vinaka e na ka ko kitaka? Ni sa kai Roma na tamata oqo.”

27Sa qai lako mai na komada, ka kaya vua, “Tukuna mai vei au, se ko sa kai Roma se segai.” Sa kaya ko koya, “Io.”

28Sa qai kaya na komada, “Sa ka levu nai lavo ka’u sa volia kina me’u lewe-ni-vanua.” A sa kaya ko Paula, “Ia ka’u sa lewe-ni-vanua e na noqu sucu.”

29Era sa qai lako tani sara ko ira sa lesi me ra tarogi koya; a sa rere talega na komada, ni sa kila e kai Roma ko koya, e na vuku talega ni nona vesuki koya.

Ko Paula ena Matadra na Lewe ni Matabose

30Ia e na mataka ni sa via kila ko koya na kena dina ni ka era sa beitaki koya kina ko ira na Jiu, sa sereka na kenai vesu ko koya, a sa kaya vei ira na bete levu kei na nodra mataveilewai kecega me ra lako mai. A sa qai kauti Paula sobu, ka vakatura e matadra.