2 Tui 3 - Ai Vola Tabu (Vakadewa Makawa Vakavoutaki 2021)（FRV21）

Sa Tui Isireli ko Jiorami

1Ia sa tekivu me lewa vei ira na Isireli mai Samaria ko Jiorami na luve i Eapi, e na kenai katinikawalu ni yabaki i Josefati na tui Juta, a sa lewa tiko ka yabaki tinikarua.

2A sa daucaka ca e na mata i Jiova, ia ka sega ni vakataki tamana kei tinana, ni sa biuta tani na matakau i Peali ka cakava ko tamana.

3Ia sa kabita ga nai valavala ca i Jeropoama na luve i Nipati, o koya ka vakaivalavalacataki ira na Isireli; sa sega ni biuta tani ko koya.

Nai Valu kei Moapi

4Ia sai taukei ni sipi ko Mesa na tui Moapi, a sa dau kauta vua na tui Isireli e tini na oba (100,000) na lami, ka tini na oba na sipi tagane, kei na vutikadra.

5Ia ni sa mate ko Eapi, sa qai bese ni qarava tiko na tui Isireli ko koya na tui Moapi.

6A sa lako tani mai Samaria e na gauna ko ya ko Jiorami na tui, ka soqoni ira kecega na Isireli.

7A sa lako ko koya ka talaki vei Josefati na tui Juta, ka kaya, “Sa bese ni qaravi au tiko na tui Moapi. Ko na lako vata beka kei au me veivala kei ira na Moapi?” A sa kaya ko koya, “Au na lako. Edaru sa duavata ga; ko ira noqu tamata era sa nomu tamata, kei ira na noqu ose era sa nomu ose.”

8A sa qai taroga ko koya, “A sala cava me da na lako cake kina?” A sa kaya ko koya, “A sala vaka ki na vanua lala mai Itomi.”

9A sa lako yani na tui Isireli, kei na tui Juta, kei na tui Itomi. Ni ra sa lako cawiri voli e na sala ka bogi vitu, a sa sega na medra wai na mataivalu se na medra wai na manumanu ka muri ira.

10A sa kaya na tui Isireli, “Isa! Sa kacivi iratou vata ko Jiova na tui tolutolu oqo, me soli iratou yani ki na ligadra na Moapi.”

11Ia sa kaya ko Josefati, “Sa sega beka eke e dua na parofita i Jiova, me datou tarogi Jiova kina?” A sa vosa e dua vei ira na nona tamata na tui Isireli, ka kaya, “Sa tiko eke ko Ilaisa na luve i Safati, o koya ka daulivi wai ki na liga i Ilaijia.”

12A sa kaya ko Josefati, “Sa tiko vua na vosa i Jiova.” A ratou sa lako sobu vua ko iratou na tui Isireli, kei Josefati, kei na tui Itomi.

13A sa kaya vua na tui Isireli ko Ilaisa, “A cava me'u cakava vei iko? Mo lako yani vei ira na parofita i tamamu kei ira na parofita i tinamu.” Ia sa kaya vei koya na tui Isireli, “Sega, me kakua mada; ni sa kacivi iratou vata ko Jiova na tui tolutolu oqo, me soli iratou ki na ligadra na Moapi.”

14A sa kaya ko Ilaisa, “Me vaka sa bula ko Jiova-ni-lewevuqa, o koya ka'u sa tu e matana, kevaka ga ka'u a sega ni dokai Josefati na tui Juta, au na sega ni gole vei iko se raici iko.

15Ia oqo, dou kauta mai vei au e dua na dauqiriqiri.” Ia ni sa qiriqiri tiko na dauqiriqiri, sa yaco vei koya na liga i Jiova.

16Ka sa kaya ko koya, “Sa vosa vakaoqo ko Jiova, ‘Au na cakava na buca mamaca oqo me sinai na kena veitobu.’

17Ni sa kaya vakaoqo ko Jiova, ‘Dou na sega ni raica e dua na cagi, dou na sega talega ni raica na uca, ia ena sinai ga e na wai na buca ko ya, mo dou gunu kina, oi kemudou, kei na nomudou bulumakau, kei na nomudou manumanu daucola-i-yaya.’

18Ia sa ka lailai wale oqo vei Jiova. Ena soli ira talega na Moapi ko koya ki na ligamudou,

19ka mo dou na samuta na koro vakabai kecega, kei na koro vinaka kecega, ka taya sobu na kau vinaka kecega, ka vakasosoga na mataniwai kecega, ka vakacacana kecega na tiki ni vanua vinaka e na veivatu.”

20Ia e na mataka ka tarava, ni se vakacabori tiko nai madrali laukana, raica sa drodro mai na wai e na sala mai Itomi, ka sa luvu na vanua e na wai.

21Ia ni ra sa rogoca ko ira kecega na Moapi ni ratou sa lako cake na tui me veivala kei ira, era sa soqoni vata ko ira kecega sa vauca rawa nai sulu ni valu, me vakatekivu mai vua e gone duadua ka yacovi koya e qase taudua, ka ra sa kacivi yani me ra la'ki tu e nai yalayala ni vanua.

22Ni ra sa sou e na mataka ka sa cilava tu na wai na mata-ni-siga, a ra sa raica na wai ka donui ira ko ira na Moapi ni sa damudamu tu me vaka na dra.

23A ra sa kaya, “Oqo na dra; eratou sa veimoku vakaidina ko iratou na tui ka ra sa veiraravui vakataki iratou. Ia oqo, tou ia ki nai toki-ni-valu, oi keda na Moapi!”

24Ia ni ra sa yaco yani ki na nodra i tikotiko ni valu na Isireli, era sa qai tucake na Isireli ka mokuti ira na Moapi, ka ra sa dro e matadra. A ra sa mokuti ira tiko na Moapi ni ra curumi ira yani ki na nodra vanua.

25A ra sa basuraka na veikoro, ka duibiuta ko ira na tamata yadua na nona vatu ki na tiki ni vanua vinaka kecega, ka vakacacana. A ra sa vakasosoga kecega na mataniwai, ka taya sobu na kau vinaka kecega, ka sa vo walega mai Kiri-ereseci na kena veivatu; ia era sa lako vakavolivolita ko ira na tamata daurabo, ka rabota.

26Ia ni sa raica ko tui Moapi ni ra sa gumatua vua ko ira nai valu, sa kauta vua e le vitu na drau na tamata era vakaiseleiwau me ra sikabotea na tui Itomi mai na yasana kadua; ia era sa sega ni rawata.

27Sa qai taura ko koya na luvena tagane, na ulumatua, o koya me kena i sosomi na tui, ka sa vakacabori koya mei soro kama e na dela ni bai vatu. A sa ka levu na cudru vei ira na Isireli, ka ra sa lako tani vua, ka lesu ki na nodra vanua.