Osea 8 - Ai Vola Tabu (Vakadewa Makawa Vakavoutaki 2021)（FRV21）

Na Nodra Vuki Tani ena Talaidredre na Isireli

1Me toka ki na gusumu na davui,

ka kaya, Ena lako mai ko koya, me vaka na ikeli, ki na vale i Jiova,

ni ra sa vakacataka na noqu veiyalayalati,

ka ra sa talaidredre ki na noqu vunau.

2Era na dui tagi vei au ka kaya,

“Na noqu Kalou, oi keitou—na Isireli—sa kilai kemuni.”

3Sa ra biuta na ka vinaka ko ira na Isireli;

ena vakasavi ira kina na meca.

4Era sa bulia eso na tui, ka sega ni vu vei au;

era sa lesia na turaga, ia ka'u sa sega ni kilai ira.

E na nodra siliva kei na nodra koula era sa cakava na nodra matakau,

ka me ra muduki laivi kina.

5Sa biuti iko na nomu luve ni bulumakau, ko iko Samaria,

sa waqa mai na noqu cudru vei ira.

E bogi vica mada me ra qai savasava mai?

6Ni sa vu vei ira na Isireli na ka oqo,

na matai ga sa cakava;

ka sa sega ni Kalou.

Ia ena vorolaki ga

na luve ni bulumakau ni Samaria.

7Ni ra sa kaburaka na cagi,

ka ra na tamusuka na covulaca;

sa sega na tolona;

ena sega ni vuataka na madrai droka;

ke vuataka mai,

era na tiloma ko ira ga na kai tani.

8Sa tilomi ko ira na Isireli;

era sa qai yaco oqo e na veimatanitu

me ra vaka nai yaya e sega ni vinakati.

9Ni ra sa qai lako cake ki Asiria,

me vaka na asa kila ka tiko duaduaga;

ko ira na Ifereimi sa ra volia na veitau.

10Ia ke ra sa tautauri vei ira na veimatanitu eso,

ka'u na qai vakasoqoni ira ka ra na rarawa vakalailai mada,

e na vuku ni colacola bibi vua na nodra tui na turaga.

11Ni ra sa vakavuqataka nai cabocabo-ni-soro ko ira na Ifereimi me ia kina na ka ca,

ena yaco nai cabocabo-ni-soro vei ira me vu ni valavala ca.

12Au sa vola vei ira e vuqa na ka e na noqu vunau,

ia sa nanumi ga me ka tani.

13Era sa vakacabora na lewe ni manumanu mei soro vei au,

ka ra kania;

ia sa sega ni vakadonui ira ko Jiova.

Sa na qai nanuma ko koya na nodra caka cala,

ka cudruva na nodra i valavala ca;

io era na lesu tale ki Ijipita.

14Ia ko ira na Isireli era sa guilecavi Koya ka Buli ira,

ka ra sa tara burekalou;

kei ira na Juta, era sa vakavuqataka na koro vakabai;

ia ka'u na biuta kina na bukawaqa ki na nodra veikoro,

ka'u na vakama talega na nodra vale vakaturaga.