Esera 4 - Ai Vola Tabu (Vakadewa Makawa Vakavoutaki 2021)（FRV21）

Na Vakalatilati ni Meca e na Tara ni Vale ni Kalou

1Ia ni ra sa rogoca ko ira na nodra meca na Juta kei ira na Penijamini, ni ra sa tara tiko na vale i Jiova na nodra Kalou na Isireli ko ira era a vakabobulataki,

22Tui 17.24-41era sa lako mai kivei Serupepeli kei ira era liu vei ira na qase, ka kaya vei ira, “Me da tara vata kei kemudou, ni keimami sa qarava na nomudou Kalou, me vakataki kemudou; ni keimami sa soro vua mai na gauna i Esa-atoni na tui Asiria, ko koya ka kauti keimami mai ki ke.”

3A sa kaya vei ira ko Serupepeli, kei Jesua, kei ira sa vo vei ira era liu vei ira na qase ni Isireli, “Dou na sega ni vakaitavi vata kei keimami e na tara vale vua na neimami Kalou; koi keimami ga ena tara vakataki keimami vei Jiova na Kalou ni Isireli, me vaka ka vakaroti keimami na tui ko Sairusi na tui Perisia.”

4Sa qai vakamalumalumutaki ira na tamata ni Juta ko ira na lewe-ni-vanua, ka vakarerei ira e na tara vale,

5ka vaqumi ira nai vakalesilesi me ra saqati ira ka tarova na ka era nakita ka donuya na gauna kecega i Sairusi na tui Perisia, ka la'ki yacova na gauna i Taraiasi na tui Perisia.

Na Saqati ni Tara Vou Tale i Jerusalemi

6Ia ni sa lewa ko Asuerosi, ni sa qai vakatekivu na nona lewa, era sa vola e dua nai vola era beitaki ira kina na kai Juta kei ira na kai Jerusalemi.

7Ia e na gauna i Atakisekise, eratou sa vola vei Atakisekise na tui Perisia, ko Pisalami, ko Miciritaci, ko Tapeli, kei ira na tamata tani sa nodratou i tokani; a sa volai nai vola e na vosa vaka-Siria, ka tukuni na kenai balebale e na vosa vaka-Siria.

8Sa vola nai vola ko Riumi na turaganilewa, kei Simisei na vunivola, kivei Atakisekise na tui, me beitaki Jerusalemi, ka vaka,

9Ko Riumi na turaganilewa, kei Simisei na vunivola, kei ira kece na nodrau i tokani; ko ira na Tainaiti, kei ira na Efasacekaiti, kei ira na Tapilaiti, kei ira na Efasaiti, kei ira na Akevaiti, kei ira na kai Papiloni, kei ira na kai Susa, kei ira na Tiaiti, kei ira na kai Ilama,

10kei ira na veimatanitu sa vo, ko ira ka kauta mai na turaga levu ka rogo ko Osinapa, ka lesia me ra tiko e na veikoro ni Samaria, kei ira na kena vo e na tai ni uciwai oqo.

11(Oqo nai vola era sa vakauta vua):

“Kivei Atakisekise na tui: O ira na nomuni tamata era tiko e na tai ni uciwai oqo, era sa vakabula yani vei kemuni.

12Mo ni kila na tui, ni ra sa lako mai ki Jerusalemi, ko ira na Jiu era lako mai vei kemuni kivei keimami. Era sa tara tiko na koro dauvere ka ca, ka ra sa viria na kena bai ka veiuturitaka na kena yavu.

13Ia mo ni kila mada na tui, kevaka sa tara oti na koro oqo, ka viri oti na kena bai, era na sega ni soli vakacavacava, se soli kamunaga, se na ka sa daucaka vua na tui, ka na qai yali kina vei kemuni na tui eso na nomuni yau oqo.

14Ia ni keimami sa vakani mai na vale-ni-tui, a sa sega ni kilikili kei keimami me raica ni kemuni sa beci na tui, o koya keimami sa talaki kina me vakatakila vei kemuni na tui;

15me sa qarai e nai vola ni kedrai tukutuku na nomuni qase. Ko ni na kunea kina e nai vola ni tukutuku ka kila ni sa koro dautalaidredre na koro oqo, ka dauvakacacani ira na tui kei ira na veiqali, ka ni ra sa bukivere talega kina eliu. E na vuku ni ka oqo sa vakarusai kina na koro oqo.

16Keitou sa vakatakila vei kemuni na tui, kevaka sa tara tale na koro oqo, ka viri oti na kena bai, ena qai sega kina na nomuni qali e na tai ni uciwai oqo.”

17Sa qai volavola lesu vakaoqo ko koya na tui: “Kivei Riumi na kovana kei Simisei na vunivola, kei ira kece na nodrau i tokani era sa tiko mai Samaria, kei ira kece era tiko mai tai kadua ni uciwai, ni sa bula vinaka. Ia oqo,

18nai vola dou a vakauta mai vei keitou sa wiliki vakamacala vei au.

19Ia ka'u a vakatauca e dua na lewa, ka sa ia oti na veivaqaqai, ka sa kunei ni sa dauveivorati makawa kei ira na tui na koro oqo, ka sa dauia kina na talaidredre kei na vere.

20Ka so talega na tui era turaga yaco mai Jerusalemi, era sa lewa kece e na yasana kadua ni uciwai; ka sa dausoli vei ira nai vakacavacava, na kamunaga, kei na ka e daucaka vua na tui.

21Ia dou vakarota me cegu mada ko ira na tamata oqo, ka me kakua ni tara na koro oqo ka me'u solia mada nai vakaro.

22Dou raici kemudou vinaka, mo dou kitaka na ka oqo. A cava me tubu kina na ka me ca kina ko ira na tui?”

23Ia ni sa wili nai vola i Atakisekise na tui vei Riumi kei Simisei na vunivola, kei ira na nodrau i tokani, era sa qai lako vakusakusa ki Jerusalemi vei ira na Jiu, ka vakasaurarataki ira vakaukauwa me mudu na nodra cakacaka.

24Akeai 1.1; Saka 1.1Sa qai mudu na cakacaka ni vale ni Kalou mai Jerusalemi, ka sa mudu ka yacova nai karua ni yabaki ni lewa i Taraiasi na tui Perisia.