Jope 28 - Ai Vola Tabu (Vakadewa Makawa Vakavoutaki 2021)（FRV21）

Tomana ko Jope: Evei na Sala ki na Vuku kei na Yalomatua?

1“E dina sara ni sa tiko na qara ni siliva,

kei na vanua me vakasavasavataki kina na koula.

2Sa kau mai na qele na kaukamea,

ka sa vakawaicalataki na kopa mai na kena vatu.

3Sa muduka na butobuto na tamata daukelikeli,

ka sa vakasaqaqara me yacova na kena i yalayala

na vatu ni butobuto kei na yaloyalo ni mate.

4Era keli qara e na buca sa yawa mai nai tikotiko ni tamata;

era sa guilecavi mai vei ira era sa lako voli;

era sa lili tu e macawa, ka yawa mai na tamata; ka veisuwayaki.

5E na vuku ni qele, sa tubu mai kina na kakana;

ia sa cukiraki ga na rukuna me vaka sa kama.

6A kena veivatu sa vanua ni safaia,

ka sa tu kina na kuvu ni koula.

7“Na kena sala sa sega ni bau kila e dua na manumanu vuka,

ka se sega ni kunea na mata ni vulituri.

8Era se bera ni butuka na manumanu kila dokadoka;

ka se sega ni lako kina na laione daukata.

9“Sa dodoka na ligana ko koya ki na uluvatu,

ka sa vukica na veiulunivanua mai vuna.

10Sa kelia na dreke ni wai e na maliwa ni veivatu,

ka sa kunea na ka talei kecega na matana.

11Sa bonota na uciwai ko koya, me kakua ni vuabale;

ka sa kauta mai ki na rarama na ka sa vuni.

12“Ia ena kune li evei na vuku?

Ka evei li na i tikotiko ni yalomatua?

13Sa sega na tamata me kila na kena bibi,

ka sa sega ni kune e na vanua ni bula.

14Sa kaya na vanua titobu, ‘Sa sega vei au,’

ka sa kaya na wasawasa, ‘Sa sega vei au.’

15Ena sega ni voli rawa e na koula,

kei na siliva ena sega ni rawa ni vakarautaki me kenai voli.

16Ena sega ni vakatauvatani na kenai voli kei na koula mai Ofa,

se na onikisa talei, se na safaia.

17Na koula kei na karisitala sa sega ni tautauvata kaya,

ka na sega ni rawa ni veisautaki kei nai yaya koula dina.

18Me kakua ni cavuti na lase se na karisitala;

nai sau ni yalomatua sa cecere cake mai na mata-ni-civa.

19A topasa ni Eciopea sa sega ni tautauvata kaya,

ena sega talega ni vakatauvatani kei na koula dina.

20“Ia sa na qai vu beka mai vei na vuku?

Ka sa evei na vanua me kune kina na yalomatua?

21Ni sa vunitaki ga mai na matadra kecega era bula tiko,

ka sa tabonaki mai vei ira na manumanu vuka.

22Ko Rusa kei Mate erau sa kaya,

‘Keirau sa rogoca na kenai rogorogo e na daliga i keirau.’

23“Na Kalou ga sa kila na kenai lakolako,

ka sa kila ko koya na kena vanua.

24Baleta ni sa rai yani ko koya ki nai yalayala kei vuravura

ka sa kunea na veika kecega e ruku i lomalagi.

25Ni gauna sa solia kina ko koya ki na cagi na kena kaukauwa

ka vakatovolea na wai e na dua na kena i vakarau,

26ka lesia na kenai valavala ni uca

kei na sala ni livaliva kei na kurukuru,

27sa qai kunea na ka oqori ko koya ka kacivaka;

a sa vakataudeitaka, ka sa vakadikeva talega.

28 Same 111.10; Vbale 1.7; 9.10 Ka sa kaya vua na tamata,

‘Raica, na rerevaka na Turaga, sai koya na vuku;

kei na biuta na ka ca sai koya na yalomatua.’ ”