Sere i Solomoni 1 - Ai Vola Tabu (Vakadewa Makawa Vakavoutaki 2021)（FRV21）

1 1Tui 4.32 A sere ka uasivi e na veisere, o koya ka nei Solomoni.

Ai Matai ni SereYalewa

2Me dau reguci au ko koya na turaga e na regu ni gusuna!

Ni sa vinaka na nomuni loloma ka ca na waini.

3E na vuku ni kenai boi na nomu i lumu vinaka sara,

na yacamuni sa vaka nai lumu sa livi yani,

o koya era sa lomani kemuni kina ko ira na goneyalewa.

4Vakayarayarataki au, keitou na qai cicimuri kemuni.

Sa kauti au mai na tui ki na nona loqi.

Keitou na marau ka rekitaki kemuni;

keitou na nanuma vakalevu kina na nomuni loloma ka vakalailai na waini;

ko ira na yalododonu era sa lomani kemuni.

5Koi au na yalewa loaloa, ia ka'u sa matavinaka,

koi kemudou na goneyalewa ni Jerusalemi,

me vaka na valelaca ni Kitari,

ka vaka na latilati i Solomoni.

6Kakua ni wanonovi au, ni'u sa loaloa,

ni sa cilavi au na siga.

Era a cudruvi au na luve i tinaqu;

era a lesi au me'u vakatawa na veiloga-ni-vaini,

ia na noqu loga-ni-vaini ka'u a sega ni vakatawa.

7Tukuna mai vei au, koi kemuni ka'u sa lomana,

se evei na yasana ko ni sa vakania kina na nomuni qele ni sipi,

na yasana ko ni sa vakadavori ira kina e na sigalevu;

ni'u na lako sese voli e na cava

ki na nodra qele ni sipi na nomuni tokani?

Tagane

8Kevaka ko sa sega ni kila,

ko iko sa matavinaka sara vei ira na yalewa,

mo muria voli na we ni yavadra na sipi,

ka vakani ira na nomu luve ni me

voleka ki na nodra valelaca nai vakatawa ni sipi.

9Au sa vakatauvatani iko, na wekaqu,

kei na ose yalewa e na qiqi vakaturaga nei Fero.

10Sa yatuni tu na ka vakaiukuuku e na balumu,

kei na domomu e na taube koula.

11Keitou na cakava me nomu nai talitali koula,

ka vakasavusavu siliva.

Yalewa

12Ni sa tiko na tui mai na nona tepeli,

sa boi vinaka yani na noqu narita.

13Sa vaka e dua nai vau mura vei au ko koya ka'u sa lomana;

ena davo no ga e na maliwa ni sucuqu.

14O koya ka'u sa lomana sa vaka vei au e dua na se ni kamifaia

e na veiloga-ni-vaini mai Eni-keti.

Tagane

15Raica, ko sa matavinaka, na wekaqu;

raica, ko sa matavinaka;

na matamu sa vaka na mata ni ruve.

Yalewa

16Raica, sa matavinaka koi kemuni ka'u sa lomana,

io, ko sa totoka vakaoti.

A nodaru i davodavo talega sa ka drokadroka.

17Ai coka ni nodaru vale na sitari,

na kenai sa na damanu.