Jope 37 - Ai Vola Tabu (Vakadewa Makawa Vakavoutaki 2021)（FRV21）

Sa Tukuna ko Ilaiu na Lagilagi ni Kalou

1“Na ka talega oqo sa sautaninini kina na utoqu,

ka sa lade tani mai na kena i tikotiko.

2Rogoca, rogoca na vakuru ni domona

kei na rorogo sa lako mai na gusuna.

3Sa vakatala yani ko koya ki na ruku i lomalagi taucoko,

kei na nona livaliva ki nai yalayala kei vuravura.

4Sa qai vadugu mai e muri na domona;

sa kurukuru ko koya e na domona vakaturaga,

ka sa sega ni tarova na livaliva ni sa rorogo tu na domona.

5Sa kurukuru vakurabui na Kalou e na voqa ni domona;

sa cakava ko koya na veika lelevu eda sa sega ni kila rawa.

6Ni sa kaya ki na uca-vulavula, ‘Mo tau ki vuravura’;

kei na uca mirimiri, na uca levu ni nona kaukauwa,

7sa yaco me i vakatakilakila e na ligadra na tamata kecega,

me ra kila kina na tamata kecega sa bulia ko koya.

8Era sa qai la'ki curu ki na nodra qara na manumanu,

ka tiko ga e na nodra tikina.

9Sa lako mai na covulaca mai na ceva,

kei na liliwa mai na vualiku,

10Sa cevata na tegu e nai cegu ni Kalou,

ka sa cevata sara na wai levu.

11Ka sa vakatawa na o vavaku e na kena uca;

sa vakaseavutaka na o lumilumisa.

12A sa veivukiyaki voli e na nona vosa,

me ra kitaka kina na ka kecega sa vakarota ko koya,

e na veivanua e vuravura sa tawa.

13Sa yaco oqo me ka ni veivakadodonutaki se me ka ni nona vanua,

se me ka ni loloma, ka sa vakavuna ko koya.

14“Mo vakatudaliga, Jope, ki na ka oqo;

mo tu vakadua, ka vakananuma mada na cakacaka veivakurabuitaki ni Kalou.

15Ko sa kila beka na sala e daulesia kina na ka oqori na Kalou,

ka vakavuna na livaliva ni nona o me tibi mai?

16Ko sa kila beka se sa daulili vakavinaka vakaevei na o,

na nona cakacaka veivakurabuitaki ko koya sa uasivi duaduaga na nona vuku,

17ko iko ka sa katakata vinaka na nomu i sulu

ni sa tiko vakadua ko vuravura e na vuku ni cagi mai na ceva?

18Sa rawa li vei iko, me vakataki koya, mo tevuka na lomalagi,

ka kaukauwa me vaka nai iloilo vakawaicalataki?

19Mo vakatakila vei keitou na vosa me keitou kaya vua;

keitou sa sega ni tukuna vakadodonu rawa e dua na ka e na vuku ni butobuto.

20Me na tukuni beka vua ni'u via vosa koi au?

Sa bau dua li na tamata e vinakata me tilomi bulabula?

21“Ia oqo, sa sega ni dua na tamata me raica rawa na rarama

ni sa serau mai lomalagi,

ni sa liwa yani na cagi ka vakasavasavataka.

22Sa lako mai na vualiku na mata ni rarama koula;

sa vakavolivolita na Kalou na lagilagi vakatui sa cecere.

23O Koya sa Kaukauwa—eda sa sega ni kunei koya rawa;

sa uasivi ko koya e na kaukauwa kei na caka dodonu,

kei na vutu ni valavala dodonu ena sega ni vakayacora kina na veivakasaurarataki.

24O koya oqo me ra rerevaki koya kina na tamata;

ni sa sega ni okata ko koya na tamata sa dauviavia vuku.”