Sakaraia 14 - Ai Vola Tabu (Vakadewa Makawa Vakavoutaki 2021)（FRV21）

Na Veivaluvaluti kei na Rawati ni Qaqa e Muri

1Raica, sa lako mai na siga i Jiova, ena qai votai kina na kemui toki-ni-valu e na kemu maliwa.

2Ni'u na vakasoqona kece na veimatanitu ki Jerusalemi, me ra kaba; ena rawa talega na koro, ka na vakayanaki na veivale, ia na yalewa era na vakacacani; ena vakabobulataki talega e dua na kena wase ni koro, ia na kena vo ni tamata era na sega ni muduki tani mai na koro.

3Ena qai lako yani ko Jiova, me veivala kei na veimatanitu ko ya, me vaka sa vala kina ko koya e na siga ni valu.

4Ia e na siga ko ya ena tu na yavana e dela ni ulunivanua ni veiolive, ko ya sa donui Jerusalemi mai na tokalau, ia ena kavida rua e loma na ulunivanua ni veiolive vaka ki na tokalau, vaka ki na ra talega, me dua kina na buca levu sara; ni na sudra yani e dua na tiki ni ulunivanua vaka ki na vualiku, ka dua na tikina vaka ki na ceva.

5Ia dou na dro ki na buca e na noqu ulunivanua ko ya, ni na yaco sara ki Esali na buca ni ulunivanua, io, dou na dro, me vaka dou a dro tani kina ni sa tavuki na vanua e na gauna i Usaia na tui Juta. Ena qai lako mai ko Jiova na noqu Kalou, io, koi kemuni kei ira kece na nomuni yalosavasava.

6Ia ena yaco e na siga ko ya, ena sega kina na rarama e talei, na butobuto loaloa ga.

7Ena qai yaco e dua na siga, (sa kilai ga vei Jiova), ena sega ni siga ena sega talega ni bogi; ia ena yaco, ni sa yakavi, ena qai rarama mai.

8 Isi 47.1; Joni 7.38; Vtaki 22.1 Ia e na siga ko ya, ena dave yani na wai bula mai Jerusalemi, e dua na kena wase ki na wasawasa ki na tokalau, ka dua na kena wase ki na wasawasa ki na ra; e na vula i katakata kei na vula i liliwa ena vaka tu kina.

9Ia ena kilai ko Jiova ni sa tui ni vuravura kecega. E na siga ko ya, e na sai Jiova duaduaga, kei na yacana duaduaga.

10Ena vuki na vanua kecega me tautauvata kei na buca mai Kipa ka yacovi Rimoni e na yasayasa ki na ceva mai Jerusalemi. Ia ena cecere ka tawa e na kenai tikotiko, mai na Matamata-ni-koro i Penijamini ka yaco ki na matamata-ni-koro makawa, ka yacova sara na Matamata-ni-koro e Tutuna; mai na Vale-cecere talega i Ananeli ka yaco ki na nona i keli-waini na tui.

11Vtaki 22.3A ra na tiko ga kina, ka na sega ni ia tale na veivakarusai, ena tiko vakacegu ga ko Jerusalemi.

12Ia na mate levu oqo ena vakayacora ko Jiova ki na veimataqali kece era valuti Jerusalemi; ena vuca ga yani na lewedra ni ra wavu tu e na yavadra, a matadra talega ena vuca laivi e na dreke-ni-matadra, a yamedra talega ena vuca sara e na gusudra.

13Ia e na siga ko ya, ena vakidroataki ira vakalevu ko Jiova; ka ra na dui taura yadua na liga ni kai nona, ena dui dulaka talega na liga ni tamata ki na liga ni kai nona.

14Ia ko ira talega na Juta era na vala mai Jerusalemi. Ena kumuni vata talega na nodra i yau na veimatanitu kecega e tiko vakavolivolita—na koula, kei na siliva, kei nai sulu, na ka levu sara.

15Ia na kedra mate levu na ose, kei na meule, na kameli, kei na asa, kei na manumanu kece era tiko e nai valu oqo, ena vaka na mate levu ko ya.

16 Vsoro 23.39-43 Ia ko ira kece yadua sa vo vei ira na veimatanitu kecega sa mai kabai Jerusalemi, era na lako cake e na veiyabaki me ra mai soro vua na Tui, ko Jiova-ni-lewevuqa, me ra mai cakava talega na solevu ni vale vakacevaceva.

17Ia ko ira yadua vei ira na veimatanitu e vuravura sa na sega ni lako cake ki Jerusalemi me soro vua na Tui, ko Jiova-ni-lewevuqa, ena sega ni tau vei ira na uca.

18Ia ke sa sega ni lako cake na matanitu ko Ijipita, se sa yaco kina, ena sega talega ni tau vei ira na uca; ena tauvi ira na mate levu, ena yavita kina ko Jiova na lewe ni veimatanitu era sa sega ni lako cake me ra ia na solevu ni vale vakacevaceva.

19Ena vakaoqo na nona cudruvi ko Ijipita, kei na nodra cudruvi na lewe ni veimatanitu kecega era sa sega ni lako cake me ra cakava na solevu ni vale vakacevaceva.

20E na siga ko ya ena ceuti ki na qiriqiri kaukamea ni ose, “Sa tabu me nei Jiova.” Kei na kuro e na vale i Jiova ena vaka na bilo e na mata ni cabocabo-ni-soro;

21kei na kuro kece e Jerusalemi kei Juta ena tabu me nei Jiova-ni-lewevuqa. Ia ko ira kece era vakacaboisoro era na lako mai, ka kauta eso me ia kina na vakasasaqa. Ena sega tale ni tiko e dua na dauveivoli e na vale i Jiova-ni-lewevuqa e na siga ko ya.