Sere i Solomoni 3 - Ai Vola Tabu (Vakadewa Makawa Vakavoutaki 2021)（FRV21）

1E na noqu i mocemoce e na bogi

ka'u a qarai koya ka'u sa lomana;

Au a qarai koya, ka sa sega ni'u kunea.

2“Au na cavu tu mada,

ka lako voli e na koro e na salatu;

ia e na rara ka'u na qarai koya ka'u sa lomana.”

Au a qarai koya, ia sa sega ni'u kunea.

3Era kunei au nai vakatawa era lako voli e loma ni koro.

Au a kaya vei ira,

“Dou a raici koya li ka'u sa lomana?”

4Au sa sivi iratou yani vakalailai ga,

ka'u sa qai kunei koya ka'u sa lomana.

Au a tauri koya, ka bese ni vakalaivi koya,

me'u kauti koya mada ki na vale nei tinaqu,

ki na nona loqi ko koya sa kunekunetaki au.

5Au sa vakaroti kemudou, na goneyalewa ni Jerusalemi,

e na vuku ni me kila kei na dia yalewa ni veico;

mo dou kakua ni yavalata, se vakayadrati koya ka'u sa lomana,

me yacova ni sa vakarau!

Ai Katolu ni SereYalewa

6Ko cei oqo sa lako mai na vanua lala,

ka sa vaka na duru kubou,

ka vakaisaluakitaki e na mura kei na drega boi vinaka,

kei nai saluaki kecega ni tamata dauveivoli?

7Raica na nona i davodavo, ka nei Solomoni!

Era lewe onosagavulu na tamata qaqa era volita

na nodra qaqa na Isireli.

8Era dui taura kecega nai seleiwau,

ka ra vuku e nai valu;

sa lili na nodra i seleiwau yadua e na dibidra

ni ra sa rere e na bogi.

9Sa cakava ko Solomoni na tui e dua na nona i davodavo

e na kau ni Lepanoni.

10Na kena duruduru sa cakava e na siliva,

na botona e na koula, na delana e na ka lokaloka;

na lomana ga sa conaki e na nodra i loloma.

Na goneyalewa ni Jerusalemi,

11dou lako yani,

Na goneyalewa ni Saioni,

me raici Solomoni na tui,

ni sa vakaisala tu e nai sala sa vakaisalataki koya kina ko tinana,

e na siga sa vakawati kina,

e na siga sa marau kina na lomana.