1 Tui 4 - Ai Vola Tabu (Vakadewa Makawa Vakavoutaki 2021)（FRV21）

Ko Iratou na Vakailesilesi nei Solomoni

1A sa tui vei ira kecega na Isireli ko Solomoni,

2ka sai iratou oqo na nona vakailesilesi liu: ko Asaraia na luve i Setoki sai koya na bete;

3na luve i Sisa, ko Iliorefi kei Eaia sai rau na vunivola; ko Josefati na luve i Eiiluti sa dauvola na ka ni matanitu.

4A sa komada ni mataivalu ko Penaia na luve i Jioiata; a rau sa bete ko Setoki kei Epaiaca;

5a sa lewai ira na vakailesilesi lalai ko Asaraia na luve i Necani; a sa bete ka nona i tau na tui ko Saputi na luve i Necani;

6a sa lewa na veika me baleta na vale-ni-tui ko Eiisaari; ka sa vakatulewa e na vuku ni cakacaka kaukauwa ko Etonirami na luve i Apita.

7A sa le tinikarua na nona tamata turaga ko Solomoni era sa lewai ira kecega na Isireli, era sa lewa na kena kau mai na kedra na tui kei ira na nona lewe-ni-vuvale. Era sa dui vakarautaka nai votavota ni dua na vula na tamata yadua e na loma ni dua na yabaki.

8Ia oqo na yacadra: ko Peni-uri, mai na vanua veiulunivanua ko Ifereimi;

9ko Peni-deka, mai Makasi, kei Selipimi, kei Peci-semesi, kei Eloni-peci-anani;

10ko Peni-eseti, mai Erupoci (a sa nona talega ko Soko kei na vanua taucoko ko Eferi);

11ko Peni-apinatapi, e na yasana kecega mai Doa; o koya erau vakawati kei Tafaci na luve i Solomoni;

12ko Peana na luve i Eiiluti; a sa nona ko Tenaki, kei Mekito, kei Peci-siani taucoko, mai Saricani e ruku i Jesireli, mai Peci-siani, ka yaco ki Epeli-meola, ka sivi Jokiniami;

13ko Peni-kiperi, mai Remoci-kiliati (a sa nona na veikoro i Jairi, na luve i Manasa, sa tiko mai Kiliati; sa nona na vanua ko Arikopi, mai Pasani, e onosagavulu na koro lelevu sa vakabai ka vakaisogo-lawalawa parasa);

14ko Eiinatapi na luve i Ito, e Meeneimi;

15ko Eiimaasi mai Navitalai (a sa vakawati kei Pasemaca na luve i Solomoni ka goneyalewa);

16ko Peana na luve i Usai, mai Aseri kei Aloci;

17ko Josefati na luve i Parua, mai Isakari;

18ko Semeai na luve i Ela, mai Penijamini;

19ko Kiperi na luve i Uri, mai na vanua ko Kiliati, e na vanua i Sioni na nodra tui na Amoraiti, kei Oki talega na tui Pasani. A sa turaga duaduaga ko koya e na vanua ko ya.

Nai Yau kei na Vuku nei Solomoni

20Sa ra lewe vuqa ko ira na Juta kei ira na Isireli, me vaka na nuku mai matasawa na kedrai wiliwili, era sa kana, ka gunu, ka marau tiko.

21Vteki 15.18; 2Vei 9.26A sa lewai ira na veimatanitu kecega ko Solomoni mai na Uciwai ka yaco ki na nodra vanua na kai Filisitia, ka yaco ki nai yalayala kei Ijipita. Era sa kauta mai na ka ni loloma, ka ra qaravi Solomoni e na veisiga kecega ka bula kina ko koya.

22Ia na kakana sa caka vei Solomoni e na dua na siga, sa rua na drau ka vasagavulu na puseli madrai droka vinaka, ka va na drau ka walusagavulu na puseli madrai droka walega;

23e tini na bulumakau sa yago vinaka, ka ruasagavulu na bulumakau mai na vanua veico, ka dua na drau na sipi, ka so na dia, kei na kaseli, kei na ropuki, kei na toa uro eso.

24Ni sa lewa ko koya na vanua kecega e na yasa ni Uciwai oqo, mai Tifisa ka yaco ki Qasa, vei ira talega na tui kece e na kena yasa ni Uciwai oqo; a sa tiko veisaututaki kei ira kecega era sa vakavolivoliti koya.

25A sa tiko vakavinaka e na gauna kece i Solomoni ko ira na Juta kei ira na Isireli, na tamata yadua e ruku ni nona vaini, kei na ruku ni nona lolo, mai Tani ka yacovi Peri-sepa.

261Tui 10.26; 2Vei 1.14; 9.25A sa va na oba (40,000) nai tutu ni ose ni nona qiqi-ni-valu ko Solomoni, ka le tinikarua na udolu na nona tamata dauvodo ose.

27Ia sa vakarautaka ko ira na turaga oqori na kena na tui ko Solomoni, kei na kedra kecega era kana e na tepeli i Solomoni na tui, na tamata yadua e nona vula. Sa sega ni yali vei ira e dua na ka.

28Na barile talega kei na tolo ni sila me kedra na ose kei na manumanu totolo, era sa dau kauta ki na tikina sa lesia kina, na tamata yadua me vaka na nona i tavi.

Na Rogovaki ni Vuku i Solomoni na Tui

29A sa solia vei Solomoni na Kalou na vuku kei na loma sa daukila rawa na ka levu sara, kei na daulomasoli, me vaka na nuku mai matasawa.

30Ia na vuku i Solomoni sa uasivi cake mai na nodra vuku kecega na tamata mai na tokalau, kei na vuku kecega ni kai Ijipita.

31Same 89Ni sa vuku cake vei ira kecega na tamata ko koya, ka sa siviti Icani na Eseraaiti, kei Imani, kei Kalikoli, kei Tarita, na luvei Maoli; a sa rogo ko koya ki na veimatanitu kecega sa vakavolivolita.

32Vbale 1.1; 10.1; 25.1; Sere 1.1A sa cavuta ko koya e tolu na udolu na vosa vakaibalebale, ka sa dua na udolu ka lima na nona sere.

33A sa vakamacalataka na kau ko koya, sa tekivu mai na sitari mai Lepanoni ka yacova na isopi sa tubu mai na dela ni bai. A sa tukuni ira talega na manumanu e yavai va, kei na manumanu vuka, kei na ka sa qasi voli, kei na ika.

34A sa lako mai na tamata mai na veimatanitu kecega me ra rogoca na vuku i Solomoni, eso mai vei ira na tui kecega e vuravura ka rogo kina na nona vuku.