1 1Vei 20.1 Ia ni sa oti na yabaki, ka sa yaco mai na gauna era sa daulako yani kina ki nai valu ko ira na tui, a sa veitalaki ko Tevita vei Joape, kei ira vata kaya na nona tamata, kei ira kecega na Isireli. A ra sa ravuti ira na luve i Amoni, ka buku na druadrua mai Rapa. Ia sa tiko ga mai Jerusalemi ko Tevita.
2A sa yaco, e na dua na yakavi, ni sa duri cake ko Tevita mai na nona i mocemoce ka lako voli e dela ni vale-ni-tui, ka sa raica ko koya mai na dela ni vale e dua na yalewa sa sisili tiko; a sa matavinaka sara na yalewa.
3A sa tala e dua ko Tevita me taroga na yalewa. A sa tukuni, “Oqo ko Pacisepa na luve i Iliami, na wati Uraia na Itaiti.”
4Sa qai tala eso na tamata ko Tevita me kauti koya mai, ka sa lako mai vua ko koya na yalewa, ka sa moce vata kaya ko koya. (A sa vakasavasavataki koya tiko na yalewa mai na nona tawa-savasava.) A sa qai lesu tale ki na nona vale.
5A sa bukete mai na yalewa, ka sa talaki ka tukuna vei Tevita, ka vaka, “Au sa bukete.”
6A sa veitalaki vei Joape ko Tevita, ka vaka, “Mo talai Uraia na Itaiti mai vei au.” Ka sa talai Uraia vei Tevita ko Joape.
7Ni sa lako mai vei koya ko Uraia, sa tarogi koya ko Tevita se sa vakaevei tiko ko Joape, ka vakaevei ko ira na tamata, ka vakaevei nai valu.
8Sa qai kaya vei Uraia ko Tevita, “Mo lako sobu mada ki na nomu vale, ka vuya na yavamu.” A sa lako tani mai na vale-ni-tui ko Uraia, ka sa kau yani e muri vua e dua nai votavota i loloma mai vua na tui.
9Ia sa moce vata ga kei ira kecega na tamata ni nona turaga ko Uraia e na matamata ni vale-ni-tui, ka sega ni lako sobu ki nona vale.
10A ra sa tukuna vei Tevita, ka vaka, “Sa sega ni lako sobu ko Uraia ki na nona vale.” Sa qai kaya vei Uraia ko Tevita, “O a sega li ni lako vakayawa mai? A cava ko a sega ni lako sobu kina ki na nomu vale?”
11A sa kaya vei Tevita ko Uraia, “Sa tiko na kato kei ira na Isireli kei ira na Juta e na vale vakacevaceva, kei na noqu turaga ko Joape kei ira na nona tamata na noqu turaga era sa keba wale tikoga e na vanua tadola. Ia me'u qai lako beka koi au ki na noqu vale, ka kana ka gunu, ka moce kaya na watiqu? Me vaka ni ko ni sa bula koi kemuni, ka sa bula na yalomuni, au na sega ni kitaka na ka oqo.”
12A sa kaya vei Uraia ko Tevita, “Mo tiko tale mada oqo edaidai, ia e na mataka au na talai iko yani.” A sa tiko ga mai Jerusalemi ko Uraia e na siga ko ya kei na siga ka tarava.
13Ka sa kacivi koya ko Tevita, ka sa kana ka gunu ko koya e matana, ka sa vakamatenitaki koya ko koya. Ia e na yakavi sa curu yani me la'ki koto e nona i mocemoce kei ira na tamata ni nona turaga, ka sega ga ni lako sobu ki nona vale.
Sa Vakamatei ko Uraia14E na kida ni mataka, a sa vola ko Tevita e dua nai vola vei Joape, ka sa solia vei Uraia me kauta vua.
15A sa vola vakaoqo e nai vola, “Dou lesi Uraia ki nai yatu e liu sa katakata kina nai valu, ia dou qai suka tani mai, me moku kina ka mate ko koya.”
16Ia ni sa valuta tiko na koro ko Joape, sa lesi Uraia ki na tikina sa kila era sa tiko kina na tamata qaqa.
17A ra sa curu mai na lewe ni koro, ka veivala kei Joape; a sa bale eso vei ira na tamata i Tevita, ka sa mate talega kina ko Uraia na Itaiti.
18A sa talaki ko Joape ka tukuna vei Tevita nai tukutuku ni valu kece sara;
19ka sa vakaroti koya sa tala ko koya, ka kaya, “Ni ko sa tukuna vakaoti vua na tui nai tukutuku ni valu,
20ka kevaka sa tubu na cudru ni tui ka sa kaya vei iko ko koya, ‘A cava dou a toro voleka kina ki na koro mo dou vala? Dou a sega beka ni kila era na vanavana mai na dela ni bai?
21Dvei 9.53Ocei beka ka vakamatei Apimeleki na luve i Jirupeseci? Sa sega beka ni dua na yalewa ka viritaka sobu mai na tiki ni vatu-i-qaqi mai na dela ni bai, ka sa lutuki koya ka sa mate kina mai Tipesi? A cava dou a toro voleka kina ki na bai?’ ka mo qai kaya, ‘Sa mate talega na nomuni tamata ko Uraia na Itaiti.’ ”
22A sa lako yani ko koya ka talai, ka lako mai ka tukuna vei Tevita na ka kecega sa talai koya kina ko Joape.
23A sa kaya vei Tevita ko koya ka talai, “Era sa gumatua mada vei keimami ko ira na tamata, ka curu mai vei keimami ki na veiwere, ia keimami a qai cici muri ira ka yaco ki nai sogo ni matamata-ni-koro.
24A ra sa vanai keimami na nomuni tamata ko ira na dauvanavana mai na dela ni bai. A sa mate eso vei ira na nomuni tamata na tui, sa mate talega na nomuni tamata ko Uraia na Itaiti.”
25A sa kaya ko Tevita vei koya sa talai, “Mo vosa vakaoqo vei Joape, ‘Me kakua ni ca vei iko na ka oqo, ni sa mate oqo e nai seleiwau e dua, ka qai dua tale. Mo vakaukauwataka ga na nomu i valu ki na koro, ka vakadruka.’ Ka mo vakayaloqaqataki koya.”
26Ni sa rogoca na wati Uraia ni sa mate ko Uraia na watina, a sa tagicaka na watina.
27Ia ni sa oti na gauna e vakalolokutaka voli kina na mate i watina, sa talaki ko Tevita ka kauti koya ki na nona vale, ka sa qai watina ko koya, ka vakasucuma vua e dua na luvena tagane. Ia sa ca e na mata i Jiova na ka sa cakava ko Tevita.
Who We AreWhat We EelieveWhat We Do
2025 by iamachristian.org,Inc All rights reserved.
