Same 116 - Ai Vola Tabu (Vakadewa Makawa Vakavoutaki 2021)（FRV21）

Vakavinavinaka e na Vuku ni Bula mai na Tauvi Mate

1Au sa lomani Jiova, ni sa rogoca ko koya

na domo ni noqu masu.

2Ni sa vakalakala daligana vei au,

ka'u na masu tiko kina vua ni ka'u se bula.

3Sa viviraki au nai vau ni mate,

ka sa kidaci au na rarawa ni bulubulu;

sa yacovi au na rarawa kei na taqaya.

4Au a qai masuta na yaca i Jiova:

“I Jiova, au sa masuti kemuni, mo ni vakabulai au!”

5Sa daulomasoli ko Jiova, ka yalododonu;

io, sa yalololoma na noda Kalou.

6Sa maroroi ira era sega ni vuku ko Jiova;

au a vakamalumalumutaki, a sa vakabulai au ko koya.

7Mo lesu tale ki na nomu i vakavakacegu, na yaloqu,

ni sa caka vinaka sara vei iko ko Jiova.

8Kemuni sa vakabula na yaloqu mai na mate,

kei na mataqu mai na wai ni mata,

kei na yavaqu me'u kakua ni bale.

9Au na lako voli e na mata i Jiova

e na vanua ni bula.

10 2Kori 4.13 Au a vakabauta, o koya ka'u a kaya kina:

“Au sa rarawa vakalevu”;

11au a kaya ni'u a taqaya voli,

“Era daulasulasu na tamata kecega.”

12A cava me'u cakava vei Jiova

e na vuku ni nona cakacaka loloma kecega vei au?

13Au na taura na bilo ni bula

ka masuta na yaca i Jiova.

14Au na cakava mada na veika ka'u a bubului kina vei Jiova

e matadra na nona tamata kecega.

15A ka talei e na mata i Jiova

na nodra mate na nona tamata yalosavasava.

16I Jiova, e dina ka'u sa nomuni tamata;

au sa nomuni tamata, kei na luvena na nomuni vada.

O ni sa sereka na noqu i vesu.

17Au na vakacabora vei kemuni nai madrali ni vakavinavinaka,

ka'u na masuta na yaca i Jiova.

18Au na cakava mada na veika ka'u a bubului kina vei Jiova

e matadra na nona tamata kecega,

19e na lomanibai ni vale i Jiova,

e na nomu loma ni koro, Jerusalemi.

Dou ia vei Jiova na vakavinavinaka!