1A sa lako ki Sikemi ko Reopoama, ni ra sa lako mai ko ira kecega na Isireli ki Sikemi me buli koya me tui.
2Ia ni sa rogoca ko Jeropoama na luve i Nipati, (ni sa tiko ga mai Ijipita, ni sa dro eliu mai na mata i Solomoni na tui, ka sa tiko mai Ijipita ko Jeropoama;
3a ra sa talaki me kacivi koya mai;) era sa qai lako, ko Jeropoama kei na nodra i soqosoqo taucoko na Isireli, ka ra la'ki vosa vei Reopoama, ka kaya,
4“Ko tamamuni sa vakabibitaka na neimami tavi; ia oqo, mo ni vakamamadataka na cakacaka rarawa i tamamuni, kei nai tavi bibi sa lesia vei keimami ko koya; keimami na qai qaravi kemuni.”
5A sa kaya vei ira ko koya, “Dou lako mada ga ka me bogi tolu, dou qai lako tale mai vei au.” A ra sa lako tani na tamata.
6A sa qai bose vata ko Reopoama na tui kei ira na qase ka tu e na mata i Solomoni na tamana ni sa bula tiko ko koya, ka sa kaya ko koya, “Dou lewa mada se cava me'u kaya vei ira na tamata oqo?”
7A ra sa vosa vua, ka kaya, “Kevaka ko ni sa vinakata edaidai mo ni nodra tamata nai soqosoqo oqo, ka qaravi ira, ka vosa tale vei ira, ka tukuna vei ira na vosa vinaka, era na qai qaravi kemuni ka tawa mudu.”
8Ia sa biuta ko koya na nodra lewa na qase era sa tukuna vua, ka bose vata kei ira na cauravou era tubu vata kaya ka ra dautu e matana.
9A sa kaya vei ira ko koya, “A cava dou sa lewa me da tukuna vei ira na tamata oqo, ko ira ka vosa mai vei au, ka kaya, ‘Mo vakamamadataka nai tavi ka lesia vei keimami ko tamamu?’ ”
10A ra sa vosa vua na cauravou era tubu vata kaya, ka kaya, “Mo ni vosa vakaoqo vei ira na tamata oqo ka vosa vei kemuni, ka kaya, ‘Sa vakabibitaka na neimami tavi ko tamamuni, ia mo ni vakamamadataka vei keimami’, mo qai tukuna vei ira, ‘A noqu i qaqalo lailai sa vavaku cake, ka mamare na tolo i tamaqu.
11Ia oqo, sa bibi nai tavi sa virikotora vei kemudou ko tamaqu, ia ka'u na vakaikuritaka na nomudou i tavi. Sa vakanakuitataki kemudou ko tamaqu e na dali, ia ka'u na vakanakuitataki kemudou e na kuita sa buki.’ ”
12A ra sa qai lako mai ko Jeropoama kei ira kecega na tamata kivei Reopoama e nai katolu ni siga, me vaka ka kaya eliu vei ira na tui, ni sa kaya, “Dou lako tale mai vei au e nai katolu ni siga.”
13Ka sa vosa vakaukauwa ko koya na tui vei ira na tamata, ka biuta tani na nodra i vakasala na qase era a tukuna vua;
14ka vosa vei ira me vaka na nodra i vakasala na cauravou, ni ra sa kaya, “Sa vakabibitaka na nomudou i tavi ko tamaqu, ia ka'u na vakaikuritaka na nomudou i tavi. Sa vakanakuitataki kemudou ko tamaqu e na dali, ia ka'u na vakanakuitataki kemudou e na kuita sa buki.”
15A sa sega kina ni vakarorogo na tui vei ira na tamata, ni sa vu mai vei Jiova na ka oqo, me vakayacora na nona vosa ka vosataka ko Jiova e na gusu i Eaija, na kai Sailo, kivei Jeropoama na luve i Nipati.
Tawase Rua na Matanitu16 2Samu 20.1 Ia ni ra sa raica ko ira kecega na Isireli ni sa sega ni rogoci ira ko koya na tui, era sa qai vosa vua na tui ko ira na tamata, ka kaya,
“Nai votavota cava e sa noda mai vei Tevita?
Sa sega na neimami i votavota mai vei koya na luve i Jese.
Ki na nomudou valelaca, oi kemudou na Isireli!
Ia oqo, i Tevita, mo qarauna ga na nomu vale.”
A ra sa lako ki na nodra veivale ko ira na Isireli.
17Ia sa veiliutaki ga vei ira na Isireli era tiko e na veikoro i Juta ko Reopoama.
18Ni sa veitalai yani ko Reopoama na tui vei Etorami, o koya nai liuliu ni matacakacaka vakabobula, era a qai vakaviriki koya e na vatu ko ira kecega na Isireli, ka sa mate ko koya. A sa kusarawa kina ko Reopoama na tui me vodoka na nona qiqi vakaturaga, ka dro ki Jerusalemi.
19A ra sa vuki tani kina mai na vale i Tevita ko ira na Isireli ka yacova na siga oqo.
Sa Tui Isireli ko Jeropoama20Ni ra sa rogoca ko ira kecega na Isireli ni sa lesu tale mai ko Jeropoama, era sa talaki ka kacivi koya vei ira nai soqosoqo, ka ra sa buli koya me tui vei ira kecega na Isireli. Sa sega tale ni dua me muria na vuvale i Tevita, ia na yavusa i Juta duaduaga.
21Ni sa yaco ki Jerusalemi ko Reopoama, sa vakasoqoni ira vata kecega na yavusa i Juta kei na yavusa i Penijamini, e le oba vakatinikawalu (180,000) na tamata digitaki era tamata i valu, me ra la'ki veivaluvaluti kei na nodra vuvale na Isireli, me vakalesuya tale na matanitu kivei Reopoama na luve i Solomoni.
22Ia sa yaco mai na vosa ni Kalou vei Semaia na tamata ni Kalou, ka kaya,
23“Mo vosa vei Reopoama na luve i Solomoni, na tui Juta, kei ira kecega na yavusa i Juta kei Penijamini, kei ira na tamata sa vo, ka kaya,
24‘Sa kaya vakaoqo ko Jiova, Dou kakua ni lako cake, ka dou kakua ni veivala kei ira na wekamudou na Isireli. Dou lesu yani na tamata yadua ki na nona vale, ni sa vu vei au na ka oqo.’ ” A ra sa vakarorogo ki na vosa i Jiova, ka lesu me lako yani me vaka na vosa i Jiova.
Na Luve ni Bulumakau Koula nei Jeropoama25A sa tara na koro ko Sikemi mai na vanua veiulunivanua ko Ifereimi ko Jeropoama, ka tiko kina. A sa lako mai kea ka tara na koro ko Penueli.
26Ka sa kaya e lomana ko Jeropoama, “Sa na qai vuki lesu tale oqo na matanitu ki na vale i Tevita.
27Kevaka era sa lako cake na tamata oqo, me vakacaboisoro e na vale i Jiova mai Jerusalemi, ena qai vuki na lomadra na tamata oqo ki vua na nodra turaga, io kivei Reopoama na tui Juta, ka ra na qai vakamatei au, ka vuki lesu tale vei Reopoama na tui Juta.”
28Lako 32.4Sa qai bose mada na tui, ka cakava kina e rua na luve ni bulumakau koula. A sa kaya vei ira, “Sa rui dredre vei kemudou na lako cake tale ki Jerusalemi. Raica, sa tu oqo koi rau na nomudou kalou, oi kemudou na Isireli, ko i rau ka kauti kemudou cake mai na vanua ko Ijipita.”
29A sa viritura e dua mai Peceli ko koya, ka viritura na kenai karua mai Tani.
30Ia na ka oqo sa vakavuna nai valavala ca, ni ra sa lako sara ki Tani ko ira na tamata me ra qarava e dua.
31A sa tara talega ko koya na vale e na veitikina cecere, ka lesi ira na bete mai vei ira na tamata wale, o ira era sega ni luve i Livai.
Vakacacani na Sokalou mai Peceli32 Vsoro 23.33,34 A sa lesia ko Jeropoama e dua na solevu e na kenai kawalu ni vula, e na kenai katinikalima ni siga ni vula, me tautauvata kei na solevu mai Juta, ka sa ia na vakacaboisoro e nai cabocabo-ni-soro. Sa kitaka vakakina mai Peceli, ka vakacaboisoro vei rau na luve ni bulumakau ka cakava ko koya. A sa lesi iratou na bete ni veitikina cecere ka cakava ko koya me ra tiko ki Peceli.
33A sa vakacaboisoro e nai cabocabo-ni-soro ka cakava ko koya mai Peceli, e na kenai katinikalima ni siga e na kenai kawalu ni vula, e na vula ka lesia vakai koya walega. A sa lesia e dua na solevu vei ira na Isireli, ka vakacaboisoro e nai cabocabo-ni-soro, ka vakama na ka boi vinaka.
Who We AreWhat We EelieveWhat We Do
2025 by iamachristian.org,Inc All rights reserved.
