Aisea 26 - Ai Vola Tabu (Vakadewa Makawa Vakavoutaki 2021)（FRV21）

A Nodra Sere ni Qaqa na Juta

1E na siga ko ya ena seretaki na sere oqo e na vanua ko Juta:

“Sa dua na noda koro kaukauwa;

ena lesia ko Koya na veivakabulai

me bai kei na bai ni valu.

2Dou dolava na matamata-ni-koro,

me curu kina na matanitu yalododonu

sa taura tiko na dina.

3Ko koya sa lomadei vei kemuni

ko ni na vakacegui koya dina sara,

ka ni sa vakararavi vei kemuni.

4Dou vakararavi vei Jiova ka sega ni mudu,

ni sa uluvatu e sega ni oti rawa na TURAGA ko JIOVA.

5Ko koya sa vakabalei ira sobu

era a vakaitikotiko mai cake;

sa talaraka sobu na koro cecere;

sa biuta sobu sara ki na qele,

sa vakabalea ki na kuvu-ni-soso.

6Ena butuki sobu e na yavadra,

io na yavadra na luveniyali,

kei na yavadra na dravudravua.”

7A nodra sala na yalododonu sa dodonu sara;

koi kemuni, na Yalododonu sara, ko ni na vakadodonutaka na nodra sala na yalododonu.

8Io, e na sala ni nomuni lewa dodonu,

i Jiova, keimami sa waraki kemuni;

sa gadreva na yacamuni na yalo i keimami,

kei na ka ko ni sa nanumi kina.

9E na vu ni lomaqu ka'u sa gadrevi kemuni e na bogi,

io, e na vu ni yaloqu ka'u sa qarai kemuni e na mataka.

Ia ni kemuni sa cudruvi vuravura,

era na qai vulica nai valavala dodonu na lewe i vuravura.

10Kevaka sa lomani na tamata ca,

ke sega ni vulica nai valavala dodonu ko koya;

e na vanua daucaka dodonu ena caka vakatawadodonu ga kina ko koya,

ka sega ni via raica na ka vakaturaga i Jiova.

11 Ipe 10.27 Kemuni Jiova, sa dulaki cake na ligamuni,

ia era sa sega ni raica.

Ia era na raica ga na nomuni lomakatakata e na vukudra na nomuni tamata, ka madua;

io, na bukawaqa ena kani ira na nomuni meca.

12Kemuni Jiova, ko ni na lewa me neimami na vakacegu,

ni kemuni sa cakava kecega vei keimami na cakacaka me yaga vei keimami.

13Kemuni Jiova, ko ni sa neimami Kalou,

ia era a lewai keimami ko ira na turaga tani,

ia e na vukumuni duaduaga keimami na vakacaucautaka na yacamuni.

14Era sa ciba, era na sega ni bula;

era sai yaloyalo ni mate, era na sega ni tucake tale;

o koya ko ni sa talevi ira kina ka vakarusai ira,

ka vakaotia na ka kece era sa nanumi kina.

15Ko ni sa vakalewevuqataka na matanitu, i Jiova;

ko ni sa vakalewevuqataka na matanitu; ko ni sa dokai;

ko ni sa vakarabailevutaka nai yalayala kecega ni vanua.

16Kemuni Jiova, ni ra sa rarawa, era sa qai qarai kemuni;

era sa sova na masu vuni ni kemuni sa cudruvi ira.

17Me vaka na yalewa bukete e voleka ni vakasucu,

sa yaluma, ka qoqolou ni sa taratara tiko;

keimami a vakakina e matamuni, Jiova.

18Keimami a bukete, keimami a yaluma,

sa vaka ni keimami a vakasucuma na cagi.

Keimami a sega ni vakabula rawa na vanua,

ka ra sa sega ni lutu na kai vuravura.

19Ena bula ko ira na nomu mate,

ia ko ira na noqu mate era na tucake tale.

Dou yadra ka sere,

koi kemudou ka tiko e na kuvu-ni-soso,

ni sa vaka na tegu e na co na nomu tegu,

ia na qele ena biuti ira tani na mate.

Na Cudru ni Kalou kei na Vakalesui ni Bula

20Koi kemudou na noqu tamata,

dou lako mai ka curuma na nomudou yasana vuni,

ka sogota na nomudou katuba;

dou vunitaki kemudou vakalailai ga

me takali mada na veicudruvi.

21Ia dou raica, sa lako mai ko Jiova mai na nona yasana

me cudruvi ira na kai vuravura e na vuku ni nodra i valavala ca;

ia ko vuravura ena vakaraitaka na kena dra,

ka sega ni ubi ira tiko na nona moku mate.