Niemaia 2 - Ai Vola Tabu (Vakadewa Makawa Vakavoutaki 2021)（FRV21）

Sa Talai ki Jerusalemi ko Niemaia

1Ia e na vula ko Naisani e nai karuasagavulu ni yabaki ni lewa i Atakisekise na tui, sa vakarau tu na mena waini, ia ka'u a taura cake na waini, ka solia vua na tui. Ia ka'u sa sega ni vakaveveku mata eliu e matana.

2Ka sa kaya kina vei au ko koya na tui, “A cava ko sa vakaveveku mata kina, ni ko sa sega ni tauvi mate? Sa sega ni ka tani oqo, na rarawa ga ni lomamu.” Au a qai rere vakalevu sara,

32Tui 25.8-10; 2Vei 36.19; Jere 52.12-14ka kaya vua na tui, “Me bula na tui ka tawa mudu! Me'u sega beka ni vakaveveku mata, ni sa rusa tu na koro, na yasana ni nodra i bulubulu na noqu qase, a sa kama e na bukawaqa na kena veimatamata-ni-koro?”

4Sa qai kaya vei au ko koya na tui, “A cava ko sa kerea?” Au sa qai masu vua na Kalou ni lomalagi.

5Ia ka'u sa kaya vua na tui, “Kevaka e vinaka vua na tui, ka kevaka ko ni sa lomani au na nomuni tamata, mo ni talai au ki Juta, ki na koro ni nodra i bulubulu na noqu qase, me'u tara tale mada.”

6A sa kaya vei au ko koya na tui, (ni sa tiko talega kaya na ranadi,) “O ni la'ki vula vica yani? Ka ko na lesu tale mai ninaica?” A sa vinaka vua na tui me talai au; au a qai lokuca vua na kena vula.

7Au a kaya talega vua na tui, “Kevaka e vinaka vei kemuni na tui, mo ni solia ga vei au nai vola vei ira na kovana mai tai kadua ni uciwai, me ra kauti au yani me'u yaco mada ki Juta;

8kei nai vola vei Esava nai vakatawa ni nona veikau na tui, me solia vei au ko koya na kau me kena kau ni matamata-ni-koro ni yasana kaukauwa ni vale, kei na bai ni koro talega, kei na vale ka'u na tiko kina.” A sa solia vei au ko koya na tui me vaka na ligana vinaka na noqu Kalou ka tiko vei au.

9Au a qai lako vei ira na kovana mai na tai kadua ni uciwai, ka solia vei ira nai vola ni tui. Ia sa tala vata kei au ko koya na tui, eso na turaga-ni-valu ka so era sa vodo ose.

10Ia ni sa rogoca ko Sanivalati na kai Oroneimi, kei Topaia e dua na dauveiqaravi, na luve i Amoni, erau sa rarawa vakalevu ni sa lako mai e dua na tamata me segata na ka me ra vinaka kina ko ira na Isireli.

Sa Vakadikeva na Bai kei Jerusalemi ko Niemaia

11Ia ka'u a yaco ki Jerusalemi, ka tiko kina bogi tolu.

12Keitou a qai cavu tu e na bogi, koi keitou kei iratou na tamata e lewe vica; ia ka'u a sega ni tukuna vua e dua na tamata na ka sa vakatubura e na lomaqu na noqu Kalou me'u cakava e Jerusalemi. Sa sega tale vei au e dua na manumanu, na manumanu ga ka'u a vodoka.

13Ia ka'u a curu yani e na bogi e na Matamata-ni-koro ki na Buca, io e na mata ni keli-wai ni gata, kei na Matamata-ni-koro ni Benu, ka vakaraica matua na bai kei Jerusalemi, ka basuraki sobu, a sa kama e na bukawaqa na kena matamata-ni-koro.

14Au a qai lako yani ki na Matamata-ni-koro ni Keli-wai, kei na nona i keli-wai levu na tui; ia sa sega na tikina me lako yani kina na manumanu ka'u sa vodoka.

15Au a qai lako cake e na soniwai e na bogi, ka vakaraica matua na bai, ka lesu yani, ka curu e na Matamata-ni-koro ki na Buca, ka lesu tale.

16A ra sa sega ni kila ko ira na turaga se'u sa lako kivei, se cava ka'u a cakava; sa sega talega ni'u tukuna vei ira na Jiu, se vei ira na bete, se vei ira na turaga, se vei ira era lewa tiko, se vei ira era sa kitaka na cakacaka.

Na Vakatulewa me Viri Vou Tale na Bai

17Au a qai kaya vei ira, “Kemuni sa raica na leqa eda sa tiko kina oqo, ni sa rusa tu ko Jerusalemi ka sa kama e na bukawaqa na kena matamata-ni-koro. Tou ia, tou viria na bai kei Jerusalemi, me da kakua ni rogo ca kina.”

18Au a qai tukuna vei ira ni sa vinaka vei au na ligana na noqu Kalou; kei na vosa talega ni tui ka vosataka vei au ko koya. Era sa qai kaya, “Tou ia, ka tekivu viribai!” A ra sa qai veitauriligataka vata na cakacaka vinaka oqo.

19Ia ni ratou sa rogoca ko Sanivalati na kai Oroneimi, kei Topaia na dauveiqaravi na luve i Amoni, kei Kesemi na kai Arapea, eratou sa dredre ka vakalialiai keda, ka beci keda, ka kaya, “A cava na ka oqo dou sa kitaka? Dou sa saqata tiko beka na tui?”

20Au a qai kaya vei iratou, “Na Kalou kei lomalagi ena raica me rawati na ka keimami sa cakava; o koya oqo keimami na viri bai kina koi keimami na nona tamata; ia koi kemudou, sa sega na nomudou i votavota, se na ka e dodonu me nomudou, se dua na ka mo dou nanumi kina e Jerusalemi.”