Jope 15 - Ai Vola Tabu (Vakadewa Makawa Vakavoutaki 2021)（FRV21）

Sa Vunauci Jope ko Elifasi

1Sa qai vosa ko Elifasi na kai Temani, ka kaya:

2“Me cavuta li na vuku e sega ni yaga ko koya na tamata vuku,

ka vakamamautaka na ketena e na cagi ni tokalau?

3Me totaka beka na ka e na vosa e sega ni yaga,

se e nai vakavuvuli sa sega na betena?

4Ia ko iko, ko sa biuta tani na rerevaka na Kalou,

ka tarova na masu e na mata ni Kalou.

5Ni sa tukuna na gusumu na nomu i valavala ca,

ko sa digitaka na vosa ni daulawaki.

6A gusumu ga sa vakacalai iko, ka segai koi au;

io, na tebenigusumu ga sa tukuni iko.

7“Ko iko beka nai matai ni tamata ka sucu?

Se ko buli mada eliu ko iko ka qai buli e muri na veiulunivanua?

8Ko sa vakarorogo beka ki nai vakasala ni Kalou?

Ka ko dauyalana li na vuku me nomu ga?

9A cava ko sa kila ka keitou sa sega ni kila?

Se cava ko sa tugana rawa ka sa sega ni matata vei keitou?

10Sa tiko vei keitou na ulu sika kei ira sa qase sara,

ko ira sa qase cake vei tamamu.

11Sa ka lailai beka vei iko na veivakacegui ni Kalou,

se na vosa sa tau vakamalua vei iko?

12A cava sa kauti iko vakatani kina na lomamu,

ka cava sa sausauriva kina na matamu,

13mo vakatanitaka kina na yalomu vua na Kalou

ka vosataka kina mai gusumu na vosa vakaoqori?

14 Jope 25.4-6 A cava na tamata, me sa savasava ko koya?

Se ko koya sa sucu mai vua na yalewa, me yalododonu ko koya?

15Raica, na Kalou sa sega ni vakadinati ira na nona era yalosavasava,

ka sa sega ni savasava e matana na lomalagi;

16ena lailai sobu vua na tamata vakasisila ka dukadukali,

ko koya sa dau gunuva na ca me vaka na wai!

17“Au na vakatakila vei iko; rogoci au mai;

na ka ka'u sa raica ka'u na tukuna—

18na veika era sa tukuna na tamata vuku,

ka sega ni vunia mai vei ira na nodra qase,

19ko ira ga ka soli kina na vanua,

ka sega ni kai tani me lako vata kei ira.

20Sa kana rarawa ko koya na tamata ca e na nona siga kecega,

ka sa vunitaki vua na dauivalavala kaukauwa se na vica beka na nona yabaki.

21Sa rorogo tu e daligana na ka rerevaki;

ni sa sautu tiko, ena yatovi koya na dauveivakarusai.

22Sa sega ni dinata ni na lesu tale mai na butobuto,

a sa waraki koya tu nai seleiwau.

23Sa qara sese voli tu na kena, ka kaya, ‘Sa evei?’

Sa kila ko koya ni sa voleka sara vua na siga ni butobuto;

24sa vakarerei koya na rarawa kei na yaluma;

era gumatua vua, me vaka na tui sa vakarau ki nai valu.

25E na vuku ni nona sa dodoka na ligana vua na Kalou,

ka sa beci Koya sa Kaukauwa,

26sa cici vakadomoqa vei koya

kei na dua nai sasabai sukusukura;

27E na vuku ni nona sa ubia na matana e nona uro,

ka sa levulevu mai na tolona,

28ena tiko ga kina ko koya e na veikoro lala,

e na veivale sa sega e tiko kina,

ka ra sa voleka ni rusa;

29ena sega ni vutuniyau ko koya, ena sega ni tiko dei na nona i yau,

ena sega talega ni vakadedetaka na kena vinaka e vuravura;

30ena sega ni lako tani mai na butobuto;

ena malai yani na tabana e na yameyame ni buka,

ena takali talega ko koya e nai cegu ni gusuna.

31Me kakua na dauvakacalai me vakararavi e na ka sa sega ni yaga;

ni na sega ni yaga na kenai sau.

32Ni se bera na kena gauna sa na yaco ga,

ena sega talega ni bulabula na tabana.

33Ena kureitaki sobu na vuana vou me vaka na vaini,

ena mimira na sena me vaka na olive.

34Ni na lala na nodra i soqosoqo na dauveivakaisini,

ia na bukawaqa sa kania na valelaca ni veivaqumi.

35Era sa kunekunetaka na ca, ka vakasucuma na lasu,

ka sa vakarautaka na veivakaisini na lomadra.”