Jeremaia 9 - Ai Vola Tabu (Vakadewa Makawa Vakavoutaki 2021)（FRV21）

1Me sa wai mada na uluqu,

kei nai vurevure ni wai na mataqu,

me'u tagi kina e na siga kei na bogi

e na vukudra na nona vakamavoataki

na goneyalewa ni noqu tamata!

2Me sa noqu mada mai na vanua dravuisiga

e dua na bure ni vulagi;

me'u vakalaivi ira tu na noqu tamata,

ka lako tani vei ira;

ni ra sa tamata dauyalewa kecega,

nai soqosoqo ni daulawaki.

3A ra sa lokata na yamedra me nodra dakai ni vosa lasu;

ka sa sega ni qaqa me ra totaka na ka dina e vuravura;

ni ra sa vakaikuritaka na ca e na ca,

ia era sa sega ni kilai au, sa kaya ko Jiova.

4Dou dui qarauni kemudou vinaka e na vuku ni kai nona,

ia mo kakua ni vakararavi vua e dua na tacimu;

ni ra na daucakacaka vaqaseqase vei ira kecega na veitacini,

kei ira kecega na kai nomu era na dauia na vosa ni veivakacacani.

5Ko ira kece talega, era na dui vakaisina na kai nona,

ka ra na sega ni vosataka na dina;

era sa vakavulica na yamedra me vosa lasu,

ia era sa dauvakaocataki ira e na caka ca.

6A nomu vale sa tu e na loma ni veivakaisini;

e na vuku ni veivakaisini era sa bese ni kilai au, sa kaya ko Jiova.

7O koya oqo sa kaya kina ko Jiova-ni-lewevuqa,

Raica, au na vakaririgi ira me vaka na siliva, ka vakatovolei ira;

se cava me'u cakava e na vukuna na goneyalewa ni noqu tamata?

8Sa gasau vanataki na yamedra;

sa vosataka na veivakaisini.

E dua sa vosa vinaka vua na kai nona e na gusuna,

ia e na vu ni yalona sa lawakitaka.

9Me'u sega ni cudruvi ira beka e na vuku ni veika oqo? sa kaya ko Jiova;

ka me'u sega beka ni sauma lesu

ki na matanitu sa vakaoqo?

10“E na vuku ni veiulunivanua ka'u na ia na tagi kei na qoqolou,

kei na lele e na vuku ni veikoro ni vanua lala, ni sa kama,

me sega e dua e lakova;

ena sega ni rogoci kina na tagi ni manumanu;

a manumanu vuka kei na manumanu ni vanua

sa dro; sa ra yali.

11Ia ka'u na qisi Jerusalemi me koro rusa,

me qara ni gata lelevu;

ia na veikoro vaka-Juta ka'u na vakalalataka,

me sega e tiko kina.”

12Ko cei na tamata vuku, me kila rawa na ka oqo? Ia vei cei sa vosa kina na gusu i Jiova, me sa tukuna ko koya, se cava beka sa ca kina na vanua, ka sa yavu sara me vaka na vanua lala, me sega e dua e lakova?

13Ka sa kaya ko Jiova, “Ni ra sa biuta na noqu vunau ka'u a tauca e matadra, ka ra sa sega ni vakarorogo ki na noqu vosa se muria;

14ka ra sa muria ga na nodra yalokaukauwa, kei ira na Peali, oqori ka vakavulici ira kina ko ira na nodra qase.

15O koya oqo sa kaya kina vakaoqo ko Jiova-ni-lewevuqa, na Kalou ni Isireli: Raica, koi au ka'u na vakani ira na tamata oqo e na kau gaga, ka vagunuvi ira e na wai gaga.

16Ka'u na dui vakasevi ira talega ki na veimatanitu, sa ra sega ni kila, se ko ira se na nodra qase; ia ka'u na lewa me muri ira e dua nai seleiwau, me'u vakaoti ira mada ga.”

Era sa Tagica na Veivuke ko Ira na Tamata

17Sa kaya vakaoqo ko Jiova-ni-lewevuqa,

“Dou vakanananu, ka kacivi ira na yalewa na dau ni tagi, me ra lako mai;

ia dou talakitaki ira na vuku, me ra lako mai;

18ia me ra kusarawa mai, me ia na tagi e na vukuda,

me dave yani mai na matada na wai ni mata,

ka tovure na wai mai na dreke-ni-matada.

19Ni sa dua na domo ni tagi sa rogo mai Saioni:

‘Ulei na noda vakacacani!

Eda sa madua vakalevu,

ni da sa vakalaiva na vanua,

ni sa biuti keda tani na noda i tikotiko.’ ”

20Ia dou rogoca na vosa i Jiova, koi kemudou na yalewa,

ka vakabauta e na daligamudou na vosa ni gusuna,

ka vakavulici ira na luvemudou yalewa e na tagi,

kei ira yadua na kai nona na lele.

21Ni sa cabe mai ki na noda katuba ko mate,

ka sa curuma na noda vale vakaturaga,

me muduka na gone mai taudaku,

kei ira na cauravou mai na saqata ni koro.

22Mo vaka: “Sa kaya vakaoqo ko Jiova,

‘Ia ena bale na yago ni tamata

me vaka na de-ni-manumanu e dela ni vanua,

ka vaka na sila sa taura ka vakalaiva ki muri ko koya sa tamusuka voli,

ka na sega e dua me kumuni ira.’ ”

23Sa kaya vakaoqo ko Jiova, “Me kakua ni dokai koya na vuku e na nona vuku, me kakua talega ni dokai koya na tamata kaukauwa e na nona kaukauwa, me kakua ni dokai koya sa vutuniyau e na nona i yau;

241Kori 1.31; 2Kori 10.17ia ko koya sa dokai koya me dokai koya e na ka oqo, ni sa yalomatua me kilai au, ni sai au ko Jiova ka dauia na yalololoma, kei na lewa kei na cakacaka dodonu, e vuravura. Ni'u sa vinakata na ka oqo, sa kaya ko Jiova.”

25Sa kaya ko Jiova, “Raica, ena yaco mai na gauna ka'u na cudruvi ira kece kina era sa cili kei ira sa sega ni cili:

26ko Ijipita, kei Juta, kei Itomi, kei na kawa i Amoni, kei Moapi, kei ira kece mai na veiyalayala era sa tiko ga e na vanua dravuisiga. Ni ra sa sega ni cili ko ira na veimatanitu kecega oqori, kei na vale kece i Isireli sa sega ni cili na yalodra.”