1E nai kava na drau ka walusagavulu ni yabaki ni nodra lako tani mai na vanua ko Ijipita ko ira na Isireli, ka e nai kava ni yabaki sa lewai ira kina na Isireli ko Solomoni, e na vula ko Sifi, ko ya nai karua ni vula, sa mai tara ko koya na vale i Jiova.
2Na balavu ni vale sa tara vei Jiova ko Solomoni na tui sa onosagavulu na kiupiti, kei na kena raraba e ruasagavulu, kei na kena cecere e tolusagavulu na kiupiti.
3Na varada e na mata ni vale-ni-soro e ruasagavulu na kiupiti na kena balavu, me tautauvata kei na raraba ni vale, ka tini na kiupiti na kena raraba e na mata ni vale.
4Ka sa cakava ko koya ki na vale eso na katuba e cake sa vakaisogo cicila me rai voli kina.
5A sa cakava eso nai taba-ni-vale e cake ki na lalaga ni vale me vakavolivolita na lalaga ni vale, io, na tikina tabu, kei na loqi ni Vosa; ka sa cakava eso nai taba-ni-vale e cake me volita.
6Nai taba-ni-vale e ra, e lima na kiupiti na kena raraba, ia oqori e loma sa ono na kiupiti na kena raraba, ia nai katolu sa vitu na kiupiti na kena raraba. Ni sa cakava ko koya eso nai nono me volita na vale e taudaku, ka me kakua ni curu ki na lalaga ni vale.
7Ni sa tara na vale, sa tara ga e na vatu sa vakarautaki oti tu, ka sa qai kau yani ki kea, me kakua kina ni dua na rorogo ni tukituki, se kolakola e na matau, se vakayagataki ni dua nai yaya kaukamea vakamatai e na vale ko ya ni sa tara tiko.
8A katuba ni taba-ni-vale e loma sa caka mai na yasa i matau ni vale, ka ra sa cabe cake e nai kabakaba cowiri ki na loqi e loma, ia mai na loqi e loma ki na kenai katolu.
9A sa tara na vale ko koya, ka vakaotia, ka ubia na vale e nai sa kei na papa sitari.
10A sa cakava eso nai taba-ni-vale e na veiyasana kece ni vale, e lima na kiupiti na kedra cecere, ka ra sa semati ki na vale e na kau sitari.
11A sa yaco mai na vosa i Jiova vei Solomoni, ka kaya,
12“Na vale oqo ko sa tara tiko, kevaka ko sa muria na noqu i lesilesi, ka kitaka na noqu lewa, ka vakabauta na noqu i vakaro kecega mo lako vakakina, au na qai vakataudeitaka vei iko na noqu vosa ka'u a tukuna vei Tevita na tamamu.
13Ka'u na tiko ga e na kedra maliwa na Isireli, ka sega ni biuti ira na noqu tamata na Isireli.”
Nai Ukuuku e Loma ni Valenisoro(2 Veigauna 3.8-14)14A sa tara na vale ko Solomoni, ka vakaotia.
15A sa botana e loma na lalaga ni vale e na papa sitari. Mai na buturara ni vale ka kauta ki nai coka sa no kina nai botani, sa botana e loma e na kau, ka cakava na buturara ni vale e na papa damanu.
16Lako 26.33,34A sa botana na lalaga ni vale e na papa sitari, ka ruasagavulu na kiupiti, mai na buturara ka yaco ki nai coka, ka sa cakava e loma me dua kina na loqi ni Vosa, io, me kena tikina tabu sara.
17Ia na vale ko ya, io na kena tikina tabu sa vasagavulu na kiupiti.
18Ia na sitari e loma ni vale sa ceuti tu kina eso na vago kei na senikau sa seraki; sa sitari taucoko; sa sega ni rairai na vatu.
19A sa vakarautaka na loqi ni Vosa e loma ni vale, me tu kina na kato ni veiyalayalati i Jiova.
20Ia na loqi ni Vosa, sa ruasagavulu na kiupiti na kena balavu e matana, ka ruasagavulu na kiupiti na kena raraba, ka ruasagavulu na kiupiti na kena cecere. A sa botana e na koula talei ko koya, ka sa botana nai cabocabo-ni-soro sitari.
21A sa botana na vale e loma ko Solomoni e na koula talei, ka sa viria e dua na bai e na sinucodo koula, e na mata ni loqi ni Vosa, ka sa botana e na koula.
22Lako 30.1-3A sa botana ko koya na vale taucoko e na koula, ka me oti sara na vale. Kei nai cabocabo-ni-soro taucoko, sa tu mai na loqi ni Vosa, sa botana e na koula.
23 Lako 25.18-20 Ia mai loma ni loqi ni Vosa, sa cakava ko koya e rua na jerupi, e na olive, sa tau yatini na kiupiti na kedrau cecere.
24E dua na taba ni jerupi sa lima na kiupiti, ka lima talega na kiupiti na tabana kadua; mai na sovu ni tabana e dua, ka yaco ki na sovu ni tabana kadua, sa tini na kiupiti.
25A sa tini na kiupiti na jerupi kadua; sa tautauvata na kedrau i vakarau na jerupi kei na kedrau levu.
26Sa tini na kiupiti na kena cecere e dua na jerupi, a sa vaka talega kina nai karua ni jerupi.
27A sa viritu na jerupi ki loma ni vale e loma. A rau sa vakatetaba tu na jerupi, a sa tara na lalaga na taba ni dua na jerupi, a sa tara na lalaga kadua na taba ni jerupi kadua; a sa veiuturi na tabadrau ki loma ni vale.
28A sa botana na jerupi ko koya e na koula.
29A sa ceuta ko koya na lalaga kecega ni vale, me vakavolivolita, e nai vakatakarakara ni jerupi, kei na vuni niu-sawa, kei na senikau sa seraki, e loma, e taudaku talega.
30A sa botana na buturara ni vale e na koula, e loma, e taudaku talega.
31Ia nai sogo ni katuba ni loqi ni Vosa, sa cakava ko koya e na olive; na duru ni sogo kei na ulu ni katuba, sa rivirivi ka lima na yasa.
32Ia sa cakava talega e na olive nai sogo ruarua; a sa ceuta kina ko koya nai vakatakarakara ni jerupi, kei na vuni niu-sawa, kei na senikau sa seraki, ka botana e na koula; ka botana e na koula na jerupi kei na vuni niu-sawa.
33A sa cakava na duru ruarua ni sogo ni vale e na olive, sa ta vakarivirivi, ka va na yasa,
34ia sa damanu nai sogo ruarua. Sa lobi rawa e rua na yasa ni sogo e dua, ka sa lobi rawa e rua na yasa ni sogo kadua.
35A sa ceuta kina ko koya na jerupi, kei na vuni niu-sawa, kei na senikau sa seraki, ka sa botana e na koula na kena ceuceu.
36A sa viria na bai ni rara e loma e na vatu sa ta, ka taqa tolu, ka dua nai yatu e nai coka sitari.
37Sa tauyavutaki na vale i Jiova e nai kava ni yabaki, e na vula ko Sifi.
38Ia e na kenai katinikadua ni yabaki, e na vula ko Puli, ko ya nai kawalu ni vula, sa caka vakaoti na vale, io, na veitikina kecega, me vaka na kenai valavala kecega. A sa tara tiko ko koya ka yabaki vitu.
Who We AreWhat We EelieveWhat We Do
2025 by iamachristian.org,Inc All rights reserved.
