Lele i Jeremaia 4 - Ai Vola Tabu (Vakadewa Makawa Vakavoutaki 2021)（FRV21）

Na Cudruvi nei Saioni

1Isa na kena mataca mai na koula,

na kena duatani mai na koula dina sara!

Sa veibiuyaki tu na veivatu ni vale tabu

e na mua ni sala ni koro kecega.

2Na gone tagane vakamareqeti ni Saioni,

era talei sara ka vakatauvatani kei na koula dina sara—

isa era sa daunanumi me ra bilo qele walega,

na cakacaka ni ligana na dautuli bilo!

3Io na tovuto, era sa ucuna na mata-ni-sucudra

ka ra sa vakasucuma na luvedra,

ia ko koya na goneyalewa ni kai noqu sa lomaqa mai,

ka vaka na ositeriji e na vanua lala.

4Sa kakabi na yamena na gone sa sucu tiko

ki loma ni gusuna e cake ni sa viagunu;

ko ira na gone lalai era sa kere madrai,

ka sa sega e dovia vei ira.

5Ko ira era daukana ka vinaka,

era sa luveniyali mai e na sala ni koro;

ko ira era susugi ka vakaisulu e nai sulu kulakula

era sa davo no e nai benubenu.

6 Vteki 19.24 Ni sa ka levu na caka cala ni goneyalewa ni kai noqu,

ka sa ka lailai nai valavala ca i Sotoma;

ko koya ka vukici vakasauri sara,

ka sega na liga e tarai koya.

7Sa ra savasava vakalevu ko ira sa tawase me nona na Kalou,

ka vakalailai na uca-vulavula;

sa ra vulavula vakalevu

ka vakalailai na wai-ni-sucu;

sa ra yago damudamu vakalevu ka vakalailai na rupi,

sa vatukai vinaka ka vaka na safaia na yagodra.

8Sa loaloa mai na matadra ka vulavula na qilaiso;

sa ra sega ni kilai mai e na sala ni koro.

Sa kakabi na kulidra ki na suidra;

sa malai ka sa vaka na buka.

9Sa vinaka ko ira sa vakamatei e nai seleiwau

ka ca ko ira sa mate e na dausiga,

ko ira sa vuca vakamalua yani,

ni ra tarovi mai na kena laukana na vuata ni were.

10 Vrua 28.57; Isi 5.10 A ligadra na yalewa dauyalololoma

sa vakasaqa na luvedra dina;

era sa kedra kakana

ni sa vakacacani na goneyalewa ni kai noqu.

11Sa vakayacora ko Jiova na nona cudru;

sa sovaraka na nona cudru katakata,

a sa vakawaqaca na buka mai Saioni

ka sa kania na kena yavu.

12Sa ra sega ni vakadinata ko ira na tui ni veivanua,

kei ira kece na kai vuravura,

ni ra na curu ki na matamata-ni-koro ni Jerusalemi

ko ira na vakacaca kei na meca.

13E na vuku ni valavala ca ni nona parofita

kei na caka cala ni nona bete,

era sa vakadavea e lomana

na kedra dra na yalododonu.

14Era sa lako sese voli

me vaka na mataboko e na sala ni koro,

era sa vakadukadukalitaki ira e na dra

me tabu kina ni tarai na nodra i sulu.

15“Dou lako tani! Tawa savasava!” era sa kacivaka vei ira;

“Dou lako tani! Dou lako tani! Kakua ni dou tara!”

Ka ra se ka dro tani kina;

era sa kaya vakataki ira na lewe ni veivanua,

“Me ra kakua ni tiko tale mai kea.”

16A cudru i Jiova, sa dui tawasei ira,

ena sega ni golevi ira tale ko koya;

a matadra na bete era sa sega ni doka,

ko ira na qase era sa sega ni lomana.

17Ia koi keda, sa malumalumu tiko na matada

ni da waraka na noda dauniveivuke sa sega ni yaga;

ni da yadra tiko, eda sa yadrava

na vanua sa sega ni vakabulai keda rawa.

18Era sa cicimuria na we ni yavada,

eda dredre kina ni lako voli e na sala ni noda koro;

sa voleka mai na keda i vakataotioti; sa oti na noda gauna;

ni sa yaco na keda i cavacava.

19Era sa totolo ko ira era vakasavi keda

ka bera na ikeli ka vuka voli e cake;

era sa cicimuri keda e na ulunivanua,

era sa lawavaki keda e na loma ni vanua lala.

20A cegu ni ucuda, ko koya sa lumuta ko Jiova,

sa rawai e na nodra i keli—

ko koya eda a kaya kina, “E na ruku ni kenai yaloyalo

eda na bula kina e na kedra maliwa na lewe ni veivanua.”

21Mo reki ka marau, na goneyalewa ni Itomi,

sa tiko e na vanua ko Usu;

io vei iko talega ena lako yani kina na bilo;

ko na mateni ka vakaluvawaletaki iko.

22Sa oti na nomu cudruvi e na vuku ni nomu i valavala ca, ko iko na goneyalewa ni Saioni,

ena sega ni kauti iko tani tale vakabobula ko koya;

ia ena cudruva na nomu caka cala, ko iko na goneyalewa ni Itomi,

ena vakavotuya ko koya na nomu i valavala ca.