2 Samuela 9 - Ai Vola Tabu (Vakadewa Makawa Vakavoutaki 2021)（FRV21）

Na Yalololoma i Tevita vei Mefiposeci

1 1Samu 20.15-17 A sa kaya ko Tevita, “Sa vo tiko li e dua mai na vuvale i Saula me'u caka vinaka vua e na vuku i Jonacani, se segai?”

2A sa dua na tamata e na vuvale i Saula, na yacana ko Sipa. A sa kacivi ko koya vei Tevita, a sa tarogi koya na tui, “O iko ko Sipa, se segai?” A sa kaya ko koya, “Koi au saka ga oqo na nomuni tamata.”

32Samu 4.4A sa kaya na tui, “Sa sega li ni vo tiko e dua na tamata mai na vuvale i Saula, me'u caka vinaka vua e na vuku ni Kalou, se segai?” A sa kaya vua na tui ko Sipa, “Sa bula tiko na luve i Jonacani; a sa lokiloki na yavana.”

4A sa kaya vua ko koya na tui, “Sa evei ko koya?” A sa kaya vua na tui ko Sipa, “Raica, sa tiko e na vale i Mekiri, na luve i Amieli, mai Lo-tipari.”

5A sa talaki ko Tevita na tui, ka kauti koya mai na vale i Mekiri, na luve i Amieli, mai Lo-tipari.

6A sa lako mai vei Tevita ko Mefiposeci, na luve i Jonacani, na luve i Saula, a sa cuva sara ki na qele, ka vakarokoroko. A sa kaya ko Tevita, “I Mefiposeci!” A sa kaya ko koya, “Koi au saka na nomuni tamata.”

7A sa kaya vua ko Tevita, “Mo kakua ni rere, ni'u na caka vinaka vakaidina vei iko e na vuku i Jonacani, na tamamu, ia ka'u na vakasuka vei iko na vanua kecega ka nei Saula na nomu qase; ia ko iko, ko na kana tikoga mai na noqu tepeli.”

8A sa vakarokoroko ko koya, ka kaya, “A cava na nomuni tamata, mo ni golevi au kina na koli mate?”

9A sa qai kacivi Sipa na tamata i Saula ko koya na tui, ka kaya vua, “Au sa solia vua na luvena na nomu turaga na ka kecega ka nei Saula kei ira kecega na nona vale.

10Ia ko iko, kei ira na luvemu, kei ira na nomu tamata, dou wereca na qele vei koya, ia mo kauta mai na kakana me kena na luve ni nomu turaga. Ia ena kana tikoga mai na noqu tepeli ko Mefiposeci, na luvena na nomu turaga.” Ia ko Sipa, sa le tinikalima na luvena tagane, ka le ruasagavulu na nona tamata.

11A sa kaya vua na tui ko Sipa, “Ena cakava na nomuni tamata me vaka na ka kecega sa vakarota koi kemuni na noqu turaga na tui.” Ka sa kana voli e na nona tepeli na tui ko Mefiposeci, me vaka e dua vei ira na luve ni tui.

12Ka sa dua na luve i Mefiposeci na gone tagane, na yacana ko Mika. Ia ko ira kecega ka tiko e na vale i Sipa era sa qai nona dauniveiqaravi ko Mefiposeci.

13A sa tiko kina mai Jerusalemi ko Mefiposeci, ka sa kana tikoga mai na tepeli ni tui. Ia sa lokiloki na yavana ruarua.