Aisea 30 - Ai Vola Tabu (Vakadewa Makawa Vakavoutaki 2021)（FRV21）

Na Leqa ni Vakararavi ki Ijipita

1Sa kaya ko Jiova, “Ulei ko ira na gone talaidredre,

era sa vakarorogo, ka sega vei au;

ka ra sa ubia e na dua nai ubi, ka sega ni vaka na yaloqu,

me ra kuria kina na ca e na ca;

2era sa lako sobu ki Ijipita,

ka ra sa sega ni taroga vei au,

me ra vakaukauwataki ira e na kaukauwa i Fero,

ka vakararavi ki na yaloyalo i Ijipita;

3Ia na kaukauwa i Fero ena yaco me ka dou na madua kina,

kei na vakararavi ki na yaloyalo i Ijipita me ka dou na rogo ca kina.

4Ni ra sa yaco ki Soani ko ira na nodra turaga,

ka ra sa vakatadu mata ki Anesi.

5Ko ira kece era sa madualaki

mai na lewe-ni-vanua sa sega ni yaga vei ira,

ka sega talega ni veivuke se ra vinaka kina,

ia sa rawa ga na madua kei na veivakalialiai.”

6Na vosa bibi ni parofisai me baleta na manumanu ni ceva.

E na vanua ni oca kei na rarawa,

sa lako mai kina na laione yalewa kei na laione daukata,

na gata loa kei na gata vakabukawaqa sa vuka;

era sa kauta lako na nodra i yau e na dakudra na luve ni asa,

kei na nodra kamunaga e na dakudra na kameli,

me nodra na lewe-ni-vanua ena sega ni yaga vei ira.

7Sa sega na betena se dua na kena yaga na nodra veivuke na kai Ijipita,

o koya oqo ka'u sa vakatokai koya kina,

“Na daubole sa Dauguca.”

A Kawa Tamata Talaidredre

8Mo la'ki vola mada e matadra na ka oqo e na papa ni volavola,

ka vola e nai vola,

me tu ka yacova na gauna e muri,

me sega ni mudu rawa.

9Ka ni ra sa tamata dautalaidredre oqo,

na gone daulasu,

na gone era sa dau bese

ni rogoca na vunau i Jiova.

10Era kaya vei ira na daurai, “Dou kakua ni raica tiko;”

vei ira talega na parofita, “Dou kakua ni vunautaka na ka dodonu e na vuku i keimami;

vunau vakamalumalumu ga vei keimami,

parofisaitaka ga na ka lasu,

11dou lako tani e na sala, vakatikitiki tani mai na salatu,

me kua tale ni tu e na mata i keimami ko Koya na Yalosavasava ni Isireli.”

12O koya sa kaya kina ko Koya na Yalosavasava ni Isireli:

“Ni dou sa beca na vosa oqo,

ka vakararavi ki na veivakasaurarataki kei na ka veve,

ka ravita;

13ia nai valavala ca oqo ena sa tautauvata kina vei kemudou

kei na tiki ni bai vatu cecere sa ca, ka voleka ni bale, ka vakalakala tu,

ka sa na kabasu vakasauri mai.

14Ia na kena kabasu ena vaka na bilo ni dautuli bilo sa voroki,

sa vorolaki vakaca sara;

a sa sega kina ni kune e na kenai caca

e dua na tikina me lavi buka kina mai na matadravu,

se me taki wai kina mai nai keli.”

15Ni sa kaya vakaoqo na Turaga ko Jiova, ko Koya na Yalosavasava ni Isireli:

“Ni dou sa lesu mai ka tiko malua, dou na vakabulai kina;

ni dou sa vakacegu ka vakararavi ga, dou na kaukauwa kina.”

Ia dou a bese ga,

16ka dou a kaya,

“E segai! Keimami na dro e na ose;”—

o koya oqo dou na dro ga kina!

ka, “Ka keimami na vodo lako e na ose totolo”—

o koya oqo era na totolo sara kina ko ira sa vakasavi kemudou!

17Ni sa bolebole mai e dua, ena dro e dua na udolu;

ia ni sa bolebole mai e le lima, dou na dro sara ga,

me yacova ni dou sa biu tu mai

me vaka na duru ni kuila e na dela ni ulunivanua,

ka vaka nai vakatakilakila e na dua na delana.

18O koya oqo ena wawa kina ko Jiova me yalovinaka vei kemudou;

io, e na ka oqo ena tucake kina ko koya me lomani kemudou.

Ni sa lewa vakadodonu na Kalou ko Jiova;

era kalougata ko ira kecega era sa waraki koya.

Na Vosa ni Yalayala ni Kalou me Baleti Saioni

19Kemudou ka tiko mai Saioni e Jerusalemi; ko na sega ni tagi tale. Ni sa rogo na domo ni nomu tagi, ena lomani iko sara ko koya; ni sa qai rogoca ko koya, ena vosa sara mai vei iko.

20Ia na Turaga ena solia vei iko na madrai ni rarawa, kei na wai ni veivakasaurarataki, ia ko ira na nomu i vakavuvuli era na sega ni vunitaki tale, ko na raici ira tikoga na nomu i vakavuvuli.

21Ia ni dou gole tani vaka ki nai matau se ki nai mawi, dou na qai rogoca e dua na vosa mai dakumudou ka vaka, “Oqo na sala, dou mai lako tu ga kina.”

22Dou na qai vakacacana nai botani siliva ni nomu matakau siliva, kei nai ukuuku koula ni nomu matakau koula; ko na biuta laivi me vaka na ka velavela; ko na kaya kina, “Mo lako tani.”

23Ena qai solia ko koya na uca ki na nomu sore ni kau, ko sa kaburaka ki na qele; ia na sila madrai, na vua ni qele, ena vakauro ka vakalewe; a nomu manumanu ena kana e na siga ko ya e na vanua veico levu.

24A bulumakau talega kei na luve ni asa era daucakacaka e na were, era na kania na ka e tuituina, na ka sa vakasavasavataki e nai sivi kei nai iri.

25Ia e na ulunivanua cecere kecega, kei na ulu-ni-koro rewa-i-cake kecega, ena qai tu kina na soniwai kei na wai drodro—e na siga ni veimoku levu, ni sa qai bale na veivale cecere.

26Ia na rarama ni vula ena qai tautauvata kei na rarama ni mata-ni-siga, kei na rarama ni mata-ni-siga ena qai vakavitu, me tautauvata kei na rarama ni siga e vitu, e na gauna sa vauca kina ko Jiova na nodra mavoa na nona tamata, ka vakabula na we ni kedra kuita.

Na Cudruvi nei Asiria

27Raica, na yaca i Jiova sa lako vakayawa mai,

sa waqa tu na nona cudru, ka sa kuvu cake na kena kubou;

na tebenigusuna sa sinai e na cudru levu,

kei na yamena sa vaka na bukawaqa;

28na nona i cegu sa vaka na uciwai sa tubu cake

ka sa la'ki yala ki domona—

me tauvuloni na veimatanitu e na vulo ni veivakarusai,

ka me biuta ki gusudra na tamata nai tarovi me vagolei ira vakatani.

29Ena qai dua na nomudou sere, me vaka e na bogi sa ia kina na solevu tabu; kei na reki vakayalo me vaka e dua sa uvu bitu ni sa lako tiko mai ki na ulunivanua i Jiova, kivei koya na Uluvatu i Isireli.

30Ia ena vakarogoya ko Jiova na domona vakaturaga, ena vakarairaitaka ko koya na ligana ni sa tau mai, e na cudru waqawaqa, kei na yameyame ni bukawaqa sa kata voli e na veiseyaki, kei na cava, kei na uca-cevata.

31Ni sa qai rogo na domo i Jiova ena qai yaviti Asiria sobu, ko koya e nai titoko.

32Ia na tikina kece ena tau kina nai titoko sa lesia, ena vakatauca vua ko Jiova, ena ia vata kei na tibereli kei na qiri api; ia e nai valu rerevaki ena vala kaya ko koya.

33Ni sa vakarautaki mai liu ko Tofeci; io, sa vakarautaki oqori me nona na tui, sa cakava me titobu ka rabailevu, a kenai binibini bukawaqa kei na buka droka sa levu; ai cegu i Jiova, me vaka na sulifure sa dave tu, ena tutuvaka.