Vakarua Nai Vakamacala Taumada - Ai Vola Tabu (Vakadewa Makawa Vakavoutaki 2021)（FRV21）

Nai Vakamacala TaumadaA vakarautaki nai vola Nai Vakarua me volai kina na veivosa bibi eso ka tukuna ko Mosese vei ira na Isireli mai Moapi, na vanua era mai cegu koto kina ena nodra i lakolako balavu ni bera ni ra qai curuma yani ka taukena na vanua yalataki. Na yaca ni vola oqo e dusia na vakasama ni “karua ni vunau” ka tokaruataki kina na lawa vakaturi eso (vunau) kei na veika e yaco e na Lako Yani, Vunau ni Soro, kei na Tiko Voli mai na Lekutu.E vaka oqo na veika bibi eso ka volai kina: (1) Na nona taleva lesu ko Mosese na veika lelevu a yaco ena vasagavulu na yabaki sa oti. A vakamasuti ira na tamata me ra dau nanuma na veika a vakayacora oti vei ira na Kalou ena loma ni vanua lala se dravuisiga, ka kerea me ra yalodina ka talairawarawa tikoga vua na Kalou. (2) A taleva lesu na Vunau e Tini ko Mosese, ka vakabibitaka nai Matai ni Vunau; sa kerei ira na tamata me ra qaravi Jiova duaduaga. Sa taleva lesu talega nai vakaro eso me ra la'ki taurivaka ena vanua yalataki. (3) A tataunaka vei ira na tamata ko Mosese na nodra veiyalayalati kei na Kalou; a kerea me ra vakabulabulataka na nodra i tavi kei na kenai colacola. (4) A lesi ko Josua me na qai liutaki ira na tamata ni Kalou. A mate mai Moapi ko Mosese, ena tokalau ni Joritani, ni sa vakacaucautaka oti na yalodina ni Kalou, ka vosa vakalougatataki ira na kawa i Isireli.A vakabibitaki eke na nona vakabulai ira na nona tamata digitaki na Kalou, ka vakalougatataki ira talega, ni sa lomani ira vakalevu. Sa dodonu me ra nanuma tiko oqori na nona tamata; io me ra lomani koya ka talairawarawa vua, me ra bula kalougata tikoga kina.Na tikina koula na 6.4-6; e tiko kina na vosa a vakatoka ko Jisu me Vunau Levu duadua: Mo ni lomani Jiova na nomuni Kalou ena lomamuni taucoko, kei na yalomuni taucoko kei na nomuni kaukauwa taucoko.Na Lewe ni VolaAi matai ni vunau i Mosese 1.1—4.49

Ai karua ni vunau i Mosese 5.1—26.19

a. Na vunau e tini 5.1—10.22

b. Na vunau, lewa kei nai vakasala 11.1—26.19

Nai vakaro ni nodra curu ki Kenani 27.1—28.68

Na vakavoui ni veiyalayalati 29.1—30.20

Nai otioti ni vosa i Mosese 31.1—33.29

Na mate i Mosese 34.1-12