1 Samuela 6 - Ai Vola Tabu (Vakadewa Makawa Vakavoutaki 2021)（FRV21）

Kau Lesu Tale ki Isireli na Kato ni Kalou

1A sa tiko na kato i Jiova e na nodra vanua na kai Filisitia ka vula vitu.

2Ia era sa kacivi ira na bete kei ira na daurairai ko ira na kai Filisitia, ka kaya, “A cava me da cakava e na vuku ni kato i Jiova? Dou vakatakila vei keitou se keitou na vakauta vakaevei ki na kena tikina.”

3A ra sa kaya, “Kevaka dou sa vakauta yani na kato ni Kalou ni Isireli, dou kakua ni vakauta wale, ia dou vakauta sara vua e dua nai soro ni caka cala. Dou na qai vakabulai, ka dou na qai kila sara na vuna e sega ni kau tani kina vei kemudou na ligana.”

4A ra sa kaya, “A cava na ka mei soro ni caka cala me keitou vakauta yani vua?” A ra sa kaya, “E lima nai vakatakarakara koula ni mate vuce, ka lima na kalavo koula, me vaka na kedratou i wiliwili na nodra turaga na kai Filisitia, ni sa dua bauga na mate dewa sa tauvi kemudou kecega kei iratou na nomudou turaga.

5O koya oqo mo dou cakava kina nai vakatakarakara eso ni nomudou mate vuce, ka so nai vakatakarakara ni nomudou kalavo era vakacacana na vanua, ka mo dou vakarokorokotaka na Kalou ni Isireli. Ena qai vakamamadataka beka ko koya na ligana vei kemudou, kei ira na nomudou kalou, kei na nomudou vanua.

6Ia a cava dou sa vakaukauwataka kina na yalomudou, me vaka era a vakaukauwataka na yalodra na kai Ijipita kei Fero? Ni sa caka mana oti ko koya vei ira, era sa sega li ni talai ira yani na tamata, a ra sa qai lako kina?

7Ia oqo ga, mo dou ia ka cakava e dua na qiqi-ni-yaya vou, ka kauta e rua na bulumakau yalewa sa to na sucudrau, sa sega ni tau vei rau nai vua, ia dou vauci rau na bulumakau yalewa ki na qiqi-ni-yaya, ka sogolatia ki vale na luvedrau me rau kakua ni muri rau.

8Ka kauta na kato i Jiova ka vakavodoka ki na qiqi-ni-yaya; ia nai yaya koula dou sa vakauta vua mei soro ni caka cala, dou tugana ki na dua na kato lailai me tu e yasana; ia dou qai vakatala yani me lako.

9Ka mo dou qai vakaraica; kevaka sa lako cake e na sala ki na nona vanua ga, ki Peci-semesi, ia sa qai koya ga ka cakava vei keda na ka ca levu oqo; ia kevaka e segai, eda na qai kila ni sa sega ni ligana ka yaviti keda; a ka ga sa dauyaco e na gauna eso kivei keda.”

10A ra sa cakava vakakina ko ira na tamata; era sa kauta e rua na bulumakau yalewa sa to na sucudrau, a ra sa nokati rau ki na qiqi-ni-yaya, ka sogolatia na luvedrau ki vale.

11A ra sa vakavodoka na kato i Jiova ki na qiqi-ni-yaya, kei na kato lailai sa tu kina na kalavo koula kei nai vakatakarakara ni nodra mate vuce.

12Ia erau sa lako vakadodonu na bulumakau yalewa, e na sala sa lako sara ki Peci-semesi, a rau sa muria na salatu, a rau sa tagi lako ga, ka sega ni gole ki nai matau se nai mawi; ka sa muri rau ko iratou na nodra turaga na kai Filisitia, ka yacova nai yalayala kei Peci-semesi.

13Ia era sa tamusuki witi tiko e na buca ko ira na kai Peci-semesi, a ra sa ta cake ka raica na kato, ka reki ni ra sa raica.

14A sa lako mai na qiqi-ni-yaya ki na were i Josua, na kai Peci-semesi, ka sa tu vakadua kina. A sa tu mai kea e dua na vatu levu. A ra sa tatalaka na kau ni qiqi-ni-yaya, ka cabori rau na bulumakau yalewa mei soro kama vei Jiova.

15Ko ira na Livai era a tauca sobu na kato i Jiova, kei na kato lailai sa tu vata kaya, sa tu kina nai yaya koula, ka tauca ki dela ni vatu levu. Era sa qai vakacabora eso nai soro kama ko ira na kai Peci-semesi, ka vakamatea eso nai soro vei Jiova e na siga ko ya.

16Ia ni ratou sa raica ko iratou na turaga limalima ni kai Filisitia, eratou sa lesu ki Ekironi e na siga ko ya.

17Ia me baleta na koula e bulicaki vaka na mate vuce oqo ka ra solia lesu mai na kai Filisitia mei soro ni caka cala vei Jiova; e dua e na vuku i Asitoti, e dua e na vuku i Qasa, e dua e na vuku i Asikiloni, e dua e na vuku i Kaca, ka dua e na vuku i Ekironi;

18kei na kalavo koula me vaka nai wiliwili ni koro kecega ni kai Filisitia, sa nodratou na turaga limalima, io na veikoro vakabai, kei na veikoro lalai ki vanua. Ia sai vakadinadina, ka yacova na siga oqo, na vatu levu, era sa tauca kina na kato i Jiova, e na were i Josua na kai Peci-semesi.

Na Kato ni Kalou e Kiriaci-jiarimi

19A sa yaviti ira na kai Peci-semesi ko Jiova, ni ra sa rai ki na loma ni nona kato. A sa yavita vei ira na tamata e lewe vitusagavulu. A ra sa tagi na tamata ni sa yavita ko Jiova na lewe vuqa mai vei ira na tamata.

20A ra sa kaya na kai Peci-semesi, “O cei sa rawata me tu e na mata i Jiova, na Kalou yalosavasava oqo? Ia ena lako cake vei cei ko koya mai vei keda?”

21A ra sa tala eso na tamata vei ira na kai Kiriaci-jiarimi, a ra sa kaya, “Era sa kauta tale mai na kato i Jiova ko ira na kai Filisitia. Dou lako sobu mai, mo dou kauta cake yani vei kemudou.”