Kolosa 2 - Ai Vola Tabu (Vakadewa Makawa Vakavoutaki 2021)（FRV21）

1Ni'u sa vinakata mo dou kila na levu ni noqu lomaocaoca e na vukumudou, e na vukudra talega mai Leotisea, kei na vukudra kecega era a sega ni raici au vakayago;

2me vakacegui na yalodra, me ra vakaduavatataki e na loloma, me nodra nai yau kecega ni vuku era na kila dina sara kina na ka vuni ni Kalou, io na Karisito,

3o koya sa bini tu vua nai yau kecega ni vuku kei na yalomatua.

4Ia na ka oqo ka'u sa kaya, de dua e temaki kemudou e na vosa veicavilaki.

5E dina ga ka'u sa tiko tani vakayago, ia ka'u sa tiko vakayalo ga vei kemudou, ka reki ka raici kemudou ni dou sa duavata ka tudei e na vakabauti Karisito.

6Ia ni dou sa vakabauti Karisito Jisu na Turaga, mo dou ia tiko nai valavala sa vinaka vua,

7dou tauyavutaki ka tara cake vua, ka vakataudeitaki e na nomudou vakabauta, me vaka dou sa vakatavulici, mo dou uasivi cake kina ka vakavinavinaka.

Na Taucoko ni Bula ni da Tu Vata kei Karisito

8Dou raica vinaka de dua sa vakacacani kemudou e na vuku vakavuravura sa sega ni yaga ka lasu talega, e vaka nai tukuni vakatamata, e vaka nai vakavuvuli vakavuravura, ka sa sega ni vaka nai vakavuvuli i Karisito.

9Ni sa tiko vua na ka kecega sa sinai kina na Kalou,

10ka dou sa vakasinaiti e na ka kecega vei koya, o koya ka sa liutaki ira kecega era sa liu kei ira sa kaukauwa.

11Ia dou sa cilivi talega vua e na veicili sa sega ni caka e na liga, ni dou sa luvata nai valavala ca ni yago e na veicili sa caka e na vuku i Karisito,

12Roma 6.4ni dou a bulu vata kaya e na papitaiso, o koya talega dou sa tucake tale kaya ni dou sa vakabauta na kaukauwa ni Kalou, o koya sa vakaturi koya cake tale mai na mate.

13Efe 2.1-5Ia koi kemudou, ni dou a mate tu e nai valavala ca, e na vuku talega ni yagomudou sa sega ni cili, sa qai vakabulai kemudou vata kaya ko koya, ni sa sega ni cudruvi keda e na vuku ni noda i valavala ca,

14Efe 2.15ni sa qusia nai vola liga ni veivakaro sa beitaki keda, ka sa noda meca tiko. Ka sa kauta tani sara, ni sa vakota ki na kauveilatai.

15A sa vakacacani ira sa liu kei ira sa kaukauwa, sa vakasesevotuni ira, ni sa rawai ira sara e na ka oqo.

16 Roma 14.1-6 O koya oqo me kakua ni lewai kemudou kina e dua e na vuku ni kakana, se na ka-ni-gunu, se na siga ni solevu, se na vula vou, se na Siga ni Vakacecegu.

17A veika oqori era sai yaloyalo walega ni veika me yaco mai e muri, ia sai Karisito ga na ka dina.

18Me kakua ni tarovi kemudou e dua mai na kemudou i sau, ni sa viavia yalomalumalumu ka daumasu vei ira na agilosi, ni sa doudou e na veika sa raica ko koya, a sa dokai koya e na vuku ni yalona sa vakalewe,

19Efe 4.16a sa sega ni taura matua na Uluda, o koya sa dautokoni kina na yago taucoko e na kena veikabiti vata e na vuku ni veisema kei na veiua, ka sa tubu ni sa vakatubura na Kalou.

Na Noda Mate kei na Noda Bula Vata kei Karisito

20Ia kevaka dou sa mate vata kei Karisito mai nai vakavuvuli vakavuravura, a cava dou sa muria kina na veivakaro me vaka dou sa bula vakavuravura tiko,

21“Kakua ni tara; kakua ni tovolea; kakua ni qumia”;

22oqori kecega ena oti, ni sa tauri tiko; ni ra sa vaka na vunau kei nai vakavuvuli ni tamata?

23Ia e dina ga sa rairai me vuku na veika oqo, e na viavia masu kei na yalomalumalumu, kei na vakararawataka na yago; ia ka sa sega ni yaga, sa vakamaumautaki ga kina na yago.