1Era dro ko ira na tamata ca ni sa sega e dua sa vakasava,
ia ko ira na yalododonu era sa qaqa me vaka na laione.
2Ni sa caka cala na vanua
sa le vuqa kina na kena turaga;
ia e na vuku ni tamata vuku ka daukila-ka
ena vakadeitaki kina vakadede.
3Na tamata dravudravua sa vakasaurarataki ira na dravudravua,
sa vaka na uca tau bi sa oti kina na kakana.
4Ko ira sa biuta na vunau era vakacaucautaka na tamata ca,
ia ko ira era vakabauta na vunau era veivunauci kei ira.
5Ko ira na tamata ca era sa sega ni kila nai valavala dodonu,
ia ko ira era qaravi Jiova era sa kila rawa na ka kecega.
6Sa vinaka na dravudravua sa muria na nona yalododonu,
ka ca ko koya sai valavala vakaveve, io kevaka sa vutuniyau.
7O koya sa vakabauta na vunau sa gone vuku,
ia ko koya sa tiko vata kei ira na daukana sa vakamaduataki tamana.
8O koya sa kuria na nona i yau ni sa soli lavo me vakaisausaumi vakatawadodonu,
ena kumuna me nona na tamata sa dau lomani ira na dravudravua.
9O koya sa vaqara tani na daligana me kakua ni rogoca na vunau,
ena ka vakasisila na nona masumasu.
10O koya sa vakasesea na yalododonu me lako sese e na sala ca,
ena lutu ko koya ki na nona i keli,
ia ko ira na yalododonu era na taukena na vinaka.
11A tamata vutuniyau sa nanumi koya me vuku,
ia na dravudravua sa lomavuku ena vakatarogi koya.
12Ni ra reki na yalododonu, sa levu na kena marau,
ia ni ra sa vakalevulevui na tamata ca, ena qai qarai na tamata.
13O koya sa ubia na nona i valavala ca ena sega ni tamata yaco,
ia ko koya sa vakatusa ka biuta ena lomani.
14Sa kalougata na tamata sa rere tikoga,
ia ko koya sa vakaukauwataka na yalona ena yacovi koya na ca.
15A turaga ca sa lewai ira na tamata dravudravua
sa vaka na laione sa tagi, kei na bea daukata.
16A turaga sa sega ni vuku sa dauvakasaurara vakalevu talega;
ia ko koya sa cata na kocokoco ena vakabalavutaka na nona bula.
17A tamata sa ia na veiraravui
ena dro ki nai keli;
me kakua e dua na tamata e vakabula.
18O koya sa lako vakadodonu ena bula,
ia ko koya sai valavala vakaveve ena bale vakasauri.
19O koya sa dau cakava na nona were ena levu na kena,
ia ko koya sa muri ira na tamata wale ena levu na nona dravudravua.
20A tamata lomadina ena vakalougatataki vakalevu,
ia ko koya sa kusarawa ni vutuniyau ena sega ni donu.
21Sa sega ni vinaka na cakacaka ni veitotaki—
ia sa rawa vua na tamata me caka cala e na vuku ni tiki ni madrai.
22Na tamata mamaqi sa dau kusarawa me vutuniyau,
ka sega ni kila ni na yaco vua na dravudravua.
23O koya sa vunauca na tamata ena lomani e muri,
ka na cati ko koya sa vosaveicavilaki.
24O koya sa butakoca na ka nei tamana se tinana,
ka kaya, “Sa sega ni dua na cala”,
sai koya oqo nai tokani ni dauveivakarusai.
25O koya sa yalolevu sa dau vakavuna na veileti,
ia ko koya sa vakararavi vei Jiova ena vakamamautaki.
26O koya sa vakararavi ki na lomana sa lialia,
ia ko koya sai valavala vakavuku, ena vakabulai.
27O koya sa dausoli-ka vua na dravudravua ena sega ni viakana,
ia ko koya sa tabonaka na matana ena vosacataki vakalevu.
28Ni ra sa vakalevulevui na tamata ca, era sa qai vunitaki ira vakai ira na tamata;
ia ni ra sa rusa, era qai lewe vuqa mai na yalododonu.
Who We AreWhat We EelieveWhat We Do
2025 by iamachristian.org,Inc All rights reserved.
