1 Pita 2 - Ai Vola Tabu (Vakadewa Makawa Vakavoutaki 2021)（FRV21）

Na Vatu Bula kei Ira na Nona Tamata Digitaki

1O koya oqo ni dou sa biuta tani kina na lomaca kecega, kei na daulawaki kecega, kei na dauveivakaisini kei na dauvuvu, kei na dauveivosavakacacataki kecega.

2Mo dou vaka na gone sa qai sucu, mo dou karamacataka nai vakavuvuli sa vaka na wai-ni-sucu dina, mo dou tubu cake kina ki na sala ni bula—

3Same 34.8kevaka e dina ni dou sa tovolea oti ni sa vinaka na Turaga.

4Ni dou sa lako mai vua, a vatu bula, o koya ka sa biuta ko ira na tamata, ia sa digitaka ga na Kalou, ka sa talei e matana,

5kei kemudou talega sa vaka na veivatu bula sa tara cake mo dou vale vakayalo, me matabete yalosavasava, mo dou cabora kina nai madrali vakayalo sa vinaka vua na Kalou e na vuku i Jisu Karisito.

6Aisea 28.16O koya sa tu talega e nai Vola Tabu:

“Raica, au sa viritaka mai Saioni

na vatu ni yavu e na tutu-ni-vale, sa digitaki, ka talei;

ia ko koya sa vakabauti koya

ena sega ni vakamaduataki.”

7 Same 118.22 A sa nomudou kina na kena talei, oi kemudou sa vakabauta; ia kivei ira sa dautalaidredre,

Na vatu era a cata ko ira na matai-ni-vale

sa yaco me kenai vakadei e na tutu-ni-vale,

8 Aisea 8.14,15 kei

“Na vatu era sa tarabe kina,

kei na vatu era sa bale kina.”

Ni ra sa tarabe e na vosa ni ra sa talaidredre, me vaka era sa lesi me vakakina.

Na Nona Matatamata Digitaki

9 Lako 19.5-6; Aisea 43.20, 21 (LXX); Vrua 4.20; 7.6; 14.2; Taito 2.14; Aisea 9.2 Ia koi kemudou na matatamata digitaki, a matabete vakaturaga, a matanitu yalosavasava, a tamata sa taukena na Kalou, mo dou vakaraitaka kina na nona vinaka sara o koya ka kacivi kemudou mai na butobuto ki na nona rarama e veivakurabuitaki.

10 Osea 2.23 Oi kemudou ka sega ni tamata taukeni eliu,

ia dou sa qai tamata ni Kalou oqo;

dou a sega ni lomani eliu,

ia dou sa qai lomani.

Bula me Vaka na Dauveiqaravi ni Kalou

11Oi kemudou sa lomani, au sa vakamasuti kemudou, ni dou sa vakataki ira na vulagi kei ira era dauveilakoyaki, mo dou tarovi kemudou mai na gagadre ca ni yago sa veivala kei na yalo.

12Me dodonu na nomudou i valavala e na kedra maliwa era sa sega ni lotu, me ka oqori era vakarokorokotaka kina na Kalou e na siga ni nona lako mai, e na vuku ni valavala vinaka era na raica ko ira era sa dauvosavakacacataki kemudou me vaka ni dou sa tamata caka ca.

13Dou talairawarawa ki nai lesilesi kecega ni tamata e na vuku ni Turaga, se vua na tui, ni sa liu sara,

14se vei ira na turaganilewa, me vaka vei ira era sa talai mai vua me cudruvi kina ko ira era sa caka ca, ka me dokai ko ira sa caka vinaka.

15Ni sai koya na loma ni Kalou, mo dou vagaluya e nai valavala vinaka na nodra sesewa na tamata lialia.

16Mo dou vakataki ira era lalaga, ia dou kakua ni cakava na nomudou lalaga me vuni kina na lomaca, ia dou vaka ga na tamata dauveiqaravi ni Kalou.

17Doka na tamata kecega. Lomani ira na veiwekani. Rerevaka na Kalou. Vakarokorokotaka na tui.

Ai Vakaraitaki ni Rarawa ka sa Colata na Karisito

18Oi kemudou na tamata, dou talairawarawa vei ira na nomudou turaga e na rere kecega; kakua vei ira duaduaga era sa yalovinaka ka yalomalua, vei ira talega era sa yalovakatani.

19Ni sa ka ni vakavinavinaka oqo, kevaka e dua sa vosota na rarawa ni sa vakararawataki vakatawadodonu, ka ni sa via vinaka vua na Kalou.

20Ia dou na dokai vakacava, kevaka dou na vosota, ni dou sa caka ca ka sa vaculaki kina? Ia kevaka dou sa caka vinaka, ka sa vakararawataki kina, ka dou vosota ga, oqo sa ka vinaka vua na Kalou.

21Ni dou sa kacivi me vakakina, ni sa vosota talega na Karisito na rarawa e na vukumudou, a sa laiva vei kemudou nai vakarau, mo dou muria na we ni yavana.

22 Aisea 53.9 “O koya sa sega ni cakava e dua na ka ca,

ka sa sega ni kune e gusuna na dauveivakaisini.”

23 Aisea 53.7 Ni sa vakasewasewani ko koya, sa sega ni sauma lesu tale e na veivakasewasewani; ni sa vakararawataki tiko, sa sega ni vosavakacudrucudru; ia sa laivi koya ga vua sa lewa vakadodonu.

24Aisea 53.5,6O koya ga vakai koya sa colata na noda i valavala ca e na yagona e na kauveilatai, me da mate tu ki nai valavala ca, ka ia nai valavala dodonu e na noda bula. Ia na we ni kena kuita dou sa vakabulai kina.

25Ni dou a vakataki ira na sipi sa sese, ia dou sa qai saumaki tale vua nai Vakatawa kei na Dauveimaroroi ni yalomudou.