Same 59 - Ai Vola Tabu (Vakadewa Makawa Vakavoutaki 2021)（FRV21）

A Masu me Vagalalataki mai vei Ira na Meca Vua nai liuliu: Kakua ni Vakarusa. A nei Tevita. A Mikitami, ni sa talaki ira na nona tamata o Saula me ra la'ki yadrava na vale i Tevita me ra vakamatei koya kina.

1Mo ni vakabulai au, na noqu Kalou, mai vei ira na noqu meca;

mo ni vakarurugi au mai vei ira era sa tucake kivei au.

2Vakabulai au mai vei ira na daucaka cala;

ka vakabulai au mai na tamata dauveivakamatei.

3Ni ra sa lawavaka na yaloqu;

era sa soqoni vata na qaqa me veivala kei au.

Ka segai, Jiova, e na vuku ni noqu talaidredre, se na noqu i valavala ca,

4era sa cici ka vakarautaki ira, ka segai e na vuku ni noqu caka cala.

Mo ni yadra mo ni vukei au, ka vakaraica!

5Ia koi kemuni, Jiova, na Kalou-ni-lewevuqa, na Kalou ni Isireli.

Mo ni yadra me cudruvi ira kece na veimatanitu;

mo ni kakua ni vosoti ira na caka cala era sa dautalaidredre. Sela

6Era dau lesu mai kei na yakavi;

era osooso me vaka na koli

ka vakavolivolita na koro.

7Raica, era sa dausova vosa e na gusudra,

sa tiko nai seleiwau e na tebenigusudra—

ni ra sa kaya tiko, “O cei sa rogoca?”

8Ia koi kemuni, i Jiova, ko ni sa dredrevaki ira;

ko ni na vakalialiai ira kecega na veimatanitu.

9E na vuku ni nomuni kaukauwa, ka'u na qaravi kemuni kina;

ni sa noqu vale ni valu cecere na Kalou.

10Ena liutaki au na noqu Kalou dauyalololoma;

ena vakaraitaka vei au na Kalou na ka sa na yacovi ira na noqu meca.

11Mo ni kakua ni vakamatei ira, de ra guilecava ko ira na noqu tamata;

mo ni vakasevi ira e nomuni kaukauwa, ka vakamalumalumutaki ira sobu,

kemuni na Turaga na neimami sasabai.

12E na vuku ni ca ni gusudra kei na vosa ni tebenigusudra,

me ra tauri ga e na nodra viavialevu.

E na vuku talega ni ruru kei na lasu era vosataka.

13Mo ni vakarusai ira e na nomuni cudru,

ni vakarusai ira, me ra yali sara.

Ka me ra kila ni sa lewa na Kalou vei ira na Jekope

ka yacova nai yalayala kei vuravura. Sela

14Me ra qai lesu mai kei na yakavi,

ka osooso me vaka na koli

ka vakavolivolita na koro.

15Me ra qara voli na kedra,

ia kevaka era sega ni mamau, me ra ia tiko kei na bogi.

16Ia koi au, ka'u na seretaka na nomuni kaukauwa;

io, ka'u na seretaka vakadomoilevu na nomuni loloma tudei e na mataka.

Ni kemuni sa noqu vale ni valu cecere

kei na noqu i drodro e na siga ka'u sa rarawa kina.

17Au na sere vei kemuni na noqu kaukauwa,

ni sa noqu vale ni valu cecere na Kalou,

na noqu Kalou dauyalololoma.