Jope 20 - Ai Vola Tabu (Vakadewa Makawa Vakavoutaki 2021)（FRV21）

Sa Vosa ko Sofa: Na Caka Cala e na Ciqoma na Kena i Sau

1Sa qai vosa ko Sofa na kai Neama, ka kaya:

2“Vakarorogo mada! Sa uqeti au na nanuma ni lomaqu me'u vosa,

e na vuku ni veivakayavalati ni yaloqu.

3Au sa rogoca nai vunau ka'u sa sega na taleitaka,

ka sa sauma vei au e dua na yalo sa sega ni'u tugana rawa.

4Ko sa sega beka ni kila makawa na ka oqo,

mai na gauna sa vakatikori kina na tamata e vuravura,

5ni sa ka lekaleka na nodra marau nai valavala ca,

ka sa oti rawarawa sara na reki ni dauveivakaisini?

6E dina ga ni sa laveti na nona totoka ki lomalagi,

ka sa yaco ki na o na uluna,

7ena rusa laivi sara ga me vaka na nona benu;

ko ira era sa raica era na kaya, ‘Evei ko koya?’

8Ena vuka tani yani ko koya me vaka na tadra, ka na sega ni kune tale;

ena vakasevi tani ko koya me vaka na raivotu e na bogi.

9A mata i koya talega ka kunea ena sega ni kunea tale,

ena sega ni raici koya tale na nona i tikotiko.

10A luvena era na via vakayalovinakataki ira na dravudravua,

ena vakasuka talega na ligana na nodra i yau.

11A suina sa sinai tu e nona i valavala ca ni sa cauravou,

ia ena koto sobu kaya e na kuvu-ni-soso.

12“Kevaka sa kamikamica e na gusuna nai valavala ca,

ka sa vunia e ruku ni yamena,

13ka sa domica, ka sega ni via tiloma,

ka sa mama tikoga e na gusuna,

14ena duatani mai na kenai kanakana e ketena;

ka sa weli gaga ni gata mai e lomana.

15Sa tiloma sobu ko koya nai yau talei ka sa luaraka cake tale;

sa biuta tani mai na ketena na Kalou.

16Ena sucuma na poisoni ni gata;

ena vakamatei koya na yame ni gata loa.

17Ena sega ni raica na veiuciwai,

na veisoniwai sa dave kina na oni kei na uro ni sucu.

18A ka sa oca kina ena vakasuka tale

ka na sega ni tiloma;

me vaka nai yau sa rawata ko koya ena solia vaka talega kina,

ka na sega ni rekitaka.

19Ni sa vakasaurarataka ka biuta na dravudravua;

a sa kovea na vale sa sega ni tara ko koya.

20“Ena sega dina ni vakacegu na ketena;

ena sega ni maroroya ko koya na ka sa domona.

21Sa sega na ka e vo ni sa kana oti ko koya;

o koya oqo ena sega kina ni tudei na nona vuavuai.

22Ni sa vutuniyau sara tiko ena qai dravudravua mai;

ena tarai koya na ligadra kecega nai valavala ca.

23Me la'ki vakamamautaka na ketena,

ena vakatala vua na Kalou na nona cudru katakata

ka vakatauca vua me vaka sa kena kakana.

24Ena dro tani mai nai yaragi kaukamea;

ia na gasau ni dakaititi parasa ena lauti koya.

25Sa ucuni mai, sa suaka basika na yagona,

io na matana makamakalivata ena suaka basika na mina;

sa kani koya na domobula.

26A butobuto kecega ena vuni tu e nona yasana vuni;

a bukawaqa sa sega ni irivi ena kati koya;

ena ca ko koya sa vo tiko e nona vale.

27Ena tukuna na nona i valavala ca ko lomalagi,

ena veimecaki kaya talega ko vuravura.

28Ena lako tani nai yau sa tubu e nona vale,

ena dave yani e na siga ni nona cudru.

29Oqo nai votavota ni tamata i valavala ca mai vua na Kalou,

kei na ka sa lesia na Kalou me nona.”