Esiteri 7 - Ai Vola Tabu (Vakadewa Makawa Vakavoutaki 2021)（FRV21）

Sa Vakamatei ko Amani

1A rau sa lako na tui kei Amani me kania na magiti sa cakava ko Esiteri na ranadi.

2A sa taroga tale na tui vei Esiteri, e nai karua ni siga, ni ia na gunu waini, “A cava na ka ko sa masuta, i Esiteri na ranadi? Ena soli ga vei iko. Ka cava na ka ko sa kerea? Ena vakayacori ga, ke mani wase rua kina na matanitu.”

3Sa qai vosa ko Esiteri na ranadi, ka kaya, “Kevaka ko ni sa vinakati au, koi kemuni na tui, ka kevaka sa lomavinaka kina na tui, ia me'u bula ga—ka oqori na noqu vakamamasu vei kemuni—ka vakakina na nodra bula na kai noqu—ka oqori na noqu kerekere.

4Ni keimami sa volitaki, koi au kei ira na kai noqu, me keimami vakacacani, me vakamatei, ka me rusa sara. Ia kevaka keimami sa volitaki me tagane bobula, ka yalewa bobula walega, au sa galu ga, ia ka sa dredre vua na meca me sauma tale na ka ena vakayalia ko koya vua na tui.”

5Sa qai vosa ko Asuerosi na tui, ka taroga vei Esiteri na ranadi, “Ko cei ko koya, ka sa tiko evei ko koya sa doudou e na lomana me kitaka na ka vakaoqo?”

6A sa kaya ko Esiteri, “Na dauvakacacani keimami ka meca! Na tamata yalo ca oqo ko Amani!” Sa qai rere ko Amani e na matadrau na tui kei na ranadi.

7A sa tucake mai na gunu waini na tui ni sa cudru vakalevu sara, ka lako ki na loma ni were ni vale vakatui, ia sa tucake ko Amani me kerea na nona bula vei Esiteri na ranadi, ni sa raica sa nanuma ca vua ko koya na tui.

8A sa lesu mai ko koya na tui mai na were ni vale vakatui ki na yasana ka ia kina na gunu waini, ka sa cuva no ko Amani ki nai dabedabe sa tiko kina ko Esiteri. A sa kaya na tui, “Ena kucuva talega ko koya oqo na ranadi e mataqu, e na noqu loma ni vale?” Ni sa cavuta oti na vosa oqo na tui, era sa ubia na mata i Amani.

9Sa qai kaya vua na tui ko Apona, e dua vei iratou na nona mata na tui, “Raica talega, sa tu mai na vale i Amani na kau sa limasagavulu na kiupiti na kena cecere, sa cakava ko Amani me lili kina ko Motekai, ko koya ka a tukutuku vinaka e na vukuna na tui.” A sa kaya na tui, “Vakalilici koya kina.”

10A ra sa vakalilici Amani e na kau sa cakava ko koya me lili kina ko Motekai. Sa qai malumu sobu na cudru ni tui.