1Me vaka na uca-vulavula e na vula i katakata se na uca e na gauna ni tatamusuki,
sa vakakina ni sa sega ni kilikili kei na lialia na vakarokorokotaki.
2Me vaka na siparo sa veiseseyaki, kei na kakabace sa veivukayaki,
sa vakakina na veivatonaki wale ena sega ni yaco.
3Sa kena na ose na wa-qaliqali ka sa kena na asa nai tarovi,
kei nai waro ki na dakudra na lialia.
4Mo kakua ni sauma na nona vosa na tamata lialia me vaka na nona lialia,
de ko sa vakataki koya talega.
5Mo vosa vua na lialia me vaka na nona lialia,
de nanumi koya ga me vuku.
6O koya sa tala na tamata lialia e na dua na ka,
sa muduka na yavana, ka sa gunuva na ka ca.
7Sa sega ni tautauvata na yavana na gera;
sa vakakina na vosa vakaibalebale e na gusudra na lialia.
8Me vakataki koya sa tauca na vatu talei ki nai binibini vatu wale,
sa vakakina ko koya sa vakarokoroko vua na lialia.
9Me vaka sa lau na voto ni kau ki na liga i koya sa mateni,
sa vakakina na vosa vakaibalebale ni ra sa cavuta ko ira na lialia.
10Me vakataki koya na dauvanavana sa vakamavoataki ira kecega na tamata,
sa vakakina ko koya sa volia na lialia kei ira era sa lako voli tu.
11 2Pita 2.22 Me vaka na koli ka lesu tale ki na nona lua,
sa lesu tale vakakina na lialia ki na nona lialia.
12Ko sa kunea li na tamata sa nanumi koya ga me vuku?
Sa na vuku cake vei rau ko koya sa lialia.
13Sa kaya na yalovucesa, “E dua na laione ka tiko e na sala!
Sa dua na laione sa tiko e na saqata!”
14Me vaka nai sogo ni katuba sa veilakoyaki e na kenai ruberube,
sa vakakina na vucesa e na nona i mocemoce.
15Sa tonisua na kena na vucesa e na dari,
ka sa oca vakalevu ni kauta tale mai ki gusuna.
16Sa nanumi koya ga me vuku na vucesa,
ka lialia ko ira na tamata e lewe vitu era sa tukuna rawa nai balebale ni ka.
17O koya sa lako voli tu ka leleca me nona na nodra veileti na tani,
sa vaka e dua sa taura na daligana e dua na koli.
18Me vakataki koya na lialia dina sa veibiuyaka na bukawaqa,
kei na gasau, kei na mate,
19Sa vakakina na tamata sa vakaisina na kai nona,
a qai kaya, “Ka'u a veiwali wale ga!”
20Ni sa sega ni bukani na bukawaqa, sa boko kina;
ia ni sa sega na daukakase, sa sega na veileti.
21Me vaka na qilaiso ki na qilaiso waqa kei na buka ki na bukawaqa,
sa bukana vakakina na veileti na tamata dauveileti.
22A nona vosa na daukakase sa vaka na vue;
ka sa lau sara ki na vu ni loma ni tamata.
23A tebenigusu katakata kei na yalo sa ca
sa vaka na bilo qele sa boro e na butubutu ni siliva.
24O koya sa veicati sa vosa vakaveivakaisini,
ka sa binia na lasu e lomana;
25Ni sa vosa vakavinaka ko koya, kakua ni ko vakadinata,
ni sa vitu na ka vakasisila sa tiko e lomana;
26sa ubi e na lasu na nona veicati,
ia ena vakavotui na nona ca e matadra nai soqosoqo.
27O koya sa kelia nai keli ena lutu kina,
ko koya talega sa vaqiqica na vatu, ena qiqi tale mai vua.
28A yame lasulasu sa cati ira era ca kina,
ia na gusu veicavilaki sa ia na veivakarusai.
Who We AreWhat We EelieveWhat We Do
2025 by iamachristian.org,Inc All rights reserved.
