Lako Yani 19 - Ai Vola Tabu (Vakadewa Makawa Vakavoutaki 2021)（FRV21）

Ko Ira na Isireli e na Ulunivanua ko Saineai

1Ni ra sa lako tani na Isireli mai na vanua ko Ijipita, e na kenai katolu ni vula, sa ra qai yaco e na siga ko ya ki na vanua lala mai Saineai.

2Ni ra sa lako tani mai Rifitimi, a sa yaco ki na vanua dravuisiga mai Saineai, era sa qai tiko e na vanua lala; io, era sa tiko na Isireli e na yasana ko ya sa donuya na ulunivanua.

3A sa lako cake vua na Kalou ko Mosese, a sa kaci vua ko Jiova mai na ulunivanua, ka kaya, “Mo vosa vakaoqo ki na vuvale i Jekope, ka tukuna vei ira na Isireli:

4Dou sa raica na ka ka'u a cakava, vei ira na kai Ijipita, kei na noqu tabei kemudou cake me vaka e na taba ni ikeli, kei na noqu kauti kemudou mai vei au.

51Pita 2.9

Vrua 4.20; 7.6; 14.2; 26.18; Taito 2.14Ia oqo, kevaka dou na vakarorogo vakaidina ki na domoqu, ka vakabauta na noqu vosa ni yalayala, dou na qai noqu i yau talei, ka i yau lailai na matanitu kecega. Ni sa noqu ko vuravura taucoko,

6Vtaki 1.6; 5.10ia dou na matanitu bete vei au, kei na vanua tabu. Oqo na vosa mo tukuna vei ira na Isireli.”

7A sa lako mai ko Mosese, ka kacivi ira na nodra qase na tamata, a sa tauca vei ira na vosa kecega oqo sa vakarota vua ko Jiova.

8A ra sa vosa vata na tamata kecega, ka kaya, “A ka kecega sa kaya ko Jiova keimami na cakava.” A sa tukuna tale vei Jiova ko Mosese na nodra vosa na tamata.

9A sa qai kaya vei Mosese ko Jiova, “Raica, ka'u na lako mai vei iko e na o vavaku, me ra rogoca kina na tamata ni'u sa vosa vei iko, ka me ra vakabauti iko ka tawa mudu.”

Era sa Vakatabui na Tamata

Ia ni sa tukuna vei Jiova ko Mosese na nodra vosa na tamata,

10a sa kaya vei Mosese ko Jiova, “Mo lako vei ira na tamata, ka vakasavasavataki ira edaidai kei na mataka. Me ra savata talega na nodra i sulu

11ka me ra vakarau tu me waraka na bogi tolu, ni na lako sobu ko Jiova e na bogi tolu ki na dela ni Ulunivanua ko Saineai e na matadra na tamata kecega.

12Ipe 12.18-20Mo yalana vei ira na tamata sa volita, ka kaya, ‘Dou qarauni kemudou, mo dou kakua ni cabeta na ulunivanua, se tara e dua na tikina. Ko koya yadua sa tara na ulunivanua ena vakamatei vakaidina.

13Me kakua e dua me tara e na ligana, ia ena lauviri dina e na vatu, se lauvana; se manumanu se tamata, ena sega ni bula.’ Ni sa rorogo vakadede na davui, era na qai toro mai ki na ulunivanua.”

14A sa lako sobu vei ira na tamata mai na ulunivanua ko Mosese. A sa vakasavasavataki ira na tamata, ka ra sa savata na nodra i sulu.

15A sa kaya ko koya vei ira na tamata, “Mo ni vakarau tu me waraka na bogi tolu; kakua ni torova na yalewa.”

16 Vtaki 4.5 Vrua 4.11,12 A sa yaco e na bogi tolu e na mataka, sa qai ia na kurukuru kei na livaliva, a sa dua na o vavaku e na dela ni ulunivanua, a sa ka levu vakaidina na domo ni davui; a ra sa sautaninini kina na tamata kecega sa tiko e nodra i tikotiko.

17A sa kauti ira na tamata ko Mosese mai na nodra i tikotiko me la'ki veitata kei na Kalou; a ra sa tu vakadua mai na ruku ni ulunivanua.

18A sa kubou na ulunivanua taucoko ko Saineai, ni sa lako sobu ki delana ko Jiova e na bukawaqa; ka sa lako cake na kena kubou me vaka na kubou ni lovo levu, a sa yavavala vakalevu na ulunivanua taucoko.

19Ia ni sa rorogo vakadede na domo ni davui, a sa levu cake tiko, sa qai vosa yani ko Mosese, a sa vosa mai vua na Kalou e na dua na domo.

20A sa lako sobu ko Jiova ki na Ulunivanua ko Saineai, ki na dela ni ulunivanua; a sa kacivi Mosese ko Jiova ki na dela ni ulunivanua; a sa lako cake ko Mosese.

21A sa kaya vei Mosese ko Jiova, “Mo lako sobu, mo vakaroti ira matua na tamata, de ra lako cala mai vei Jiova me ra vakadidike, ka mate kina e lewe levu vei ira.

22Ko ira talega na bete, era sa dautorovi Jiova, me ra vakasavasavataki ira, de vorati ira vakaukauwa ko Jiova.”

23A sa kaya vei Jiova ko Mosese, “E sega ni cabe rawa ki na Ulunivanua ko Saineai ko ira na tamata; ni kemuni a vakaroti keimami, ka vaka, ‘Dou yalana na ulunivanua, ka vakatabuya.’ ”

24A sa kaya vua ko Jiova, “Mo lako yani, ka mo lako sobu, mo qai lako cake mai koi kemudrau kei Eroni. Ia me kakua ni toro cala mai ko ira na bete kei ira na tamata me lako cake mai vei Jiova, de vorati ira vakaukauwa ko koya.”

25A sa lako sobu vei ira na tamata ko Mosese, ka sa vosa vei ira.