1Sa mavoa na yaloqu; sa oti yani na noqu siga;
sa vakarau tu vei au nai bulubulu.
2Ko ira na dauveivakalialiai era sa tiko kei au,
kei na mataqu sa tiko vata kei na nodra veivakararawataki.
3“Me dua mada na ka me daru veivakadinadinataka;
ko cei mada ko koya ena veivakataudeitaki kivei au?
4Ni kemuni sa tabonaka na lomadra me ra kakua ni kila-ka,
o koya oqo ko ni na sega kina ni vakalaiva me ra qaqa.
5Ko koya sa vosaveicavilaki vei ira na nona i tokani baleta nai yau—
ena cala na matadratou na luvena.
6“Sa soli au talega ko koya me'u vosabecitaki vei ira na tamata,
ia ka'u sa ka vakasisila e matadra.
7Sa buawa na mataqu e na vuku ni rarawa,
ka sa vaka nai yaloyalo na tikiqu kecega.
8Ena kurabui ko ira na yalododonu e na ka oqo,
ena yavala ko koya na tawa cala me vorati koya na dauveivakaisini.
9Ia na yalododonu ena lako dei tiko e nona sala,
kei koya sa liga savasava ena kaukauwa cake tikoga.
10Ia koi kemudou kecega, dou lesu mada mai,
ni'u sa sega ni kunea vei kemudou e dua na tamata yalomatua.
11Sa oti yani na noqu siga; sa muduki tani na noqu i naki,
io, na vakanananu ni lomaqu.
12Era sa vukica na bogi me siga;
‘Na rarama,’ era kaya, ‘Sa voleka ki na butobuto.’
13Ke'u sa waraka nai bulubulu me noqu vale,
ke'u sa cakava na noqu i mocemoce e na butobuto,
14ke'u sa kaya yani ki na qara, ‘Ko iko na tamaqu,’
ka kaya ki na baca, ‘Na tinaqu,’ se ‘Na ganequ,’
15sa qai evei na ka me'u nuitaka?
Ko cei ena kunea na ka ka'u sa nuitaka?
16Ena lako sobu li ki nai sogo ni bulubulu?
Eda na lako sobu vata beka ki na kuvu-ni-soso?”
Who We AreWhat We EelieveWhat We Do
2025 by iamachristian.org,Inc All rights reserved.
