1“E na ca vei ira sa tiko vakacegu wale mai Saioni,
kei ira sa vakararavi ki na ulunivanua ko Samaria,
era tamata kilai e na matanitu sa liu,
ka sa dau lakovi ira ko ira na vale i Isireli!
2Dou lako yani ki Kaline, mo dou raica;
ka mani lako mai kina ki Emaci levu;
dou qai lako sobu ki Kaca na nodra koro na kai Filisitia.
Sa vinaka cake li na matanitu oqori ka sa ca na matanitu oqo?
Se levu cake li na nodra vanua ka lailai na nomudou vanua?
3 E ca li vei ira sa vakayawayawataka na siga ca,
ka kauta voleka mai nai tikotiko ni valavala vakaukauwa?
4“E na ca vei ira sa koto e nai mocemoce ivori,
ka dodo tu e na nodra i davodavo,
era kania na lami e kau mai na qele ni sipi,
kei na luve ni bulumakau mai na loma ni bai;
5ko ira era laga sere ki na domo ni api,
ka vakataki Tevita ni ra daubulia vakataki ira nai yaya ni vakatagi;
6ko ira era daugunu waini e na bilo lelevu,
ka lumuti ira e nai lumu talei,
ia era sa sega ga ni rarawataka na nodra vakacacani ko ira na Josefa!
7O koya oqo era na kedrai sevu kina na bobula era vakabobulataki,
ka na qai oti yani na nodra marau era daudodo yago tu.”
8Sa bubului na Turaga ko Jiova,
ni sa cavuti koya, sa kaya ko Jiova na Kalou-ni-lewevuqa:
“Au sa vakasisilataka na nodra dokadoka na Jekope,
ia ka'u sa cata na nodra veivale vakaturaga;
ia ka'u na solia tani na koro kei na ka kecega sa tu kina.”
9Ia ke sa vo e lewe tini na tamata e na dua na vale, era na mate ga.
10Ia na tamana lailai na mate, io, ko koya sa ia na kena veivakamai, ena laveti koya cake, me kauta tani na suina mai na vale, ka na taro talega vua sa tiko mai loqi, “Sa vo li e dua drau lewe rua kaya?” Ena kaya mai, “E segai.” Ena qai kaya ko koya, “Mo tiko lo sara! Ni sa sega ni dodonu me daru cavuta na yaca i Jiova.”
11Ia raica, sa vakarota ko Jiova,
ka na basuka talega na vale levu ko koya,
kei na vale lailai ena vakacicilataka.
12Ena cici rawa li na ose e na dela ni vatu?
Ena dua li me cukicuki kina e nai siviyara kei na bulumakau?
Ka ni dou sa vakatanitaka na lewa dodonu me wai gaga,
kei na vua ni valavala dodonu me kau gaga—
13oi kemudou sa marautaka na ka sa sega wale,
ka kaya, “Ni da sa kaukauwa
eda sa sega li ni rawata kina na lewa me noda?”
14“Ia koi au, raica, ka'u na vakatura cake e dua na matanitu,
me vala kei kemudou, na vale i Isireli, sa kaya ko Jiova, na Kalou-ni-lewevuqa;
ka ra na vakararawataki kemudou mai nai yalayala kei Emaci
ka yaco ki na uciwai ko Arapa.”
Who We AreWhat We EelieveWhat We Do
2025 by iamachristian.org,Inc All rights reserved.
