3 Joni 1 - Ai Vola Tabu (Vakadewa Makawa Vakavoutaki 2021)（FRV21）

1 Caka 19.29; Roma 16.23; 1Kori 1.14 Mai vua na qase ni lotu kivei Keio, o koya ka'u sa lomana vakaidina.

Vakacaucautaki na Veiqaravi nei Keio

2Nai tokani lomani, sa dua bau na ka ka'u sa gadreva vakalevu, mo kalougata ka bula vinaka, me vaka sa bula vinaka sara na yalomu.

3Ni'u sa reki vakalevu, ni ra sa lako mai na veiwekani ka tukuna na dina sa tu vei iko, me vaka ni ko sa dau muria na dina.

4Sa ka levu na noqu reki e na vuku ni ka e dua bauga oqo, ni'u sa rogoca era muria na dina ko ira na luvequ.

Sa Vakacaucautaki ko Keio

5Nai tokani lomani, ko sa kitaka vakadodonu na ka kecega ko sa kitaka vei ira na veiwekani, vei ira talega na vulagi;

6ko ira era sa tukuna na nomu loloma e na matadra nai soqosoqo lotu. Ia kevaka ko sa vukei ira e na nodra lako mai me vaka sa vinaka vua na Kalou, ko na cakava na ka vinaka.

7Ni ra a lako yani e na vuku ni yacana, a sa sega e dua na ka era taura mai vei ira sa tawa-lotu.

8O koya oqo sa dodonu kina me da vakacegui ira era sa vakakina, me da veivuke kina e na dina.

Ko Tiotirifi kei Timitirio

9Au a vola e dua na ka vei ira nai soqosoqo lotu, ia ko Tiotirifi, o koya sa viavia liu vei ira, sa sega ni ciqoma na neitou lewa.

10O koya oqo ka'u na nanuma kina na nona i valavala sa kitaka ko koya, ni'u na lako yani, ni sa dau vosavakacacataki keitou e na vosa ca. A sa sega ni kitaka walega oqo, sa bese talega ni vakacegui ira na veiwekani, a sa tarovi ira era via kitaka, ka sa vakasivoi ira mai nai soqosoqo lotu.

11Kemuni nai tokani lomani, kakua ni muria na ka ca, muria ga na ka vinaka. O koya sa caka vinaka sa luve ni Kalou; ia ko koya sa caka ca sa sega ni raica na Kalou.

12Sa rogo vinaka ko Timitirio mai vei ira kecega, mai na dina talega. Io, keitou sa tukuna vakakina, ka dou sa kila sa dina na neitou i tukutuku.

Nai Otioti ni Vakanuinui Vinaka

13Sa vuqa na ka vei au me'u vola, ia ka'u na sega ni vola vei iko e na wai ni volavola kei na peni;

14ia ka'u sa nuitaka me'u na raici iko kusarawa, me daru veivosaki e na matanavotu.

15Me tu vei iko na vakacegu. Sa loloma yani vei iko ko ira na veiwekani. Au sa loloma yani vei ira yadua na veiwekani.