1 Timoci 5 - Ai Vola Tabu (Vakadewa Makawa Vakavoutaki 2021)（FRV21）

Nai Tavi vei Ira na Veiwekani Vakabauta

1Kakua ni vunauca vakaukauwa na qase, ia mo vakarota vakamalua ga me vaka e sa tamamu, vei ira na cauravou me vaka era sa tacimu,

2vei ira na yalewa ka qase cake me vaka era sa tinamu, vei ira na goneyalewa me vaka era sa ganemu—e na yalosavasava sara.

Ko Ira na Yada

3Vakaraici ira na yada era sa yada dina.

4Ia kevaka sa dua na yada sa vakaluveni se so na makubuna, me ra vakatavulici mada me ra kitaka nai valavala dodonu mai nodratou, me ra sauma vinaka na nodra loloma na nodra qase, ni sa vinaka oqo vua na Kalou.

5Ia na yada dina, o koya sa sega na wekana, sa vakararavi tiko vua na Kalou ka sa dauia tiko na veimasulaki kei na kerekere e na bogi kei na siga,

6ia ko koya sa dauguta na marau, sa mate ga ni sa bula lako.

7Ia mo dauvakarota na veika oqo, me ra tawa cala kina.

8Ia kevaka e dua sa sega ni vakaraici ira na kai nona, ka vakalevu sara ko ira na nona lewe-ni-vuvale, sa cakitaka na vakabauta, ka sa uasivi cake e na ca, sa uasivi sobu ko koya sa sega ni lotu.

9Me kakua ni digitaki e dua na yada sa sega ni onosagavulu na nona yabaki, ka sa vakawati vakadua ga,

10me rogo e na vuku ni valavala vinaka; kevaka sa qaravi ira na gone, kevaka sa dauvakacegui ira na vulagi, kevaka sa vuya na yavadra era sa lotu, kevaka sa vukei ira era sa vakararawataki, kevaka sa gumatua ni dau cakava na cakacaka vinaka kecega.

11Ia ko ira ga na yada era tamata bula mo vakasuka, ni ra na garogaro ga ka sega ni nanumi Karisito, ka ra na via vakawati tale,

12ka ra sa cudruvi ni ra sa biuta na ka era sa vakabauta eliu.

13A ra sa yaco talega me ra vucesa, ka sa veilakoyaki ki na veivale; a ra sa sega ni vucesa walega, era sa dautalanoa wale talega ka vakavu ca, a ra sa dau kaya na ka e sega ni kilikili.

14O koya oqo ka'u sa vinakata kina me ra vakawati ko ira na yada era tamata bula, me ra vakasucu gone, me ra lewa na vale, ka me ra kakua ni kitaka e dua na ka me vosa vakacaca kina na meca.

15Ni sa lesu tani eso me ra muri Setani.

16Kevaka sa dua na yalewa sa vakabauta ka sa tiko vua na nona yada eso, me vukei ira ko koya; ka me kakua ni vakaicolacolataki nai soqosoqo lotu, me vukei ira rawa kina era sa yada dina ga.

17O ira na qase era sa lewa vinaka me ra dokai vakalevu, ia ka vakalevu sara ko ira sa dauvunautaka na vosa kei nai vakavuvuli;

18Vrua 25.4; Maciu 10.10; Luke 10.7ni sa kaya nai Vola Tabu, “Mo kakua ni vauca na gusu ni bulumakau ni sa butusereka na sila,” kei na, “Sa dodonu me soli vua na tamata daucakacaka na kenai voli.”

19Vrua 17.6; 19.15Mo kakua ni vakabauta e dua sa beitaka na qase, kevaka e sega ni lewe rua se lewe tolu era sa vakadinadina.

20O ira sai valavala ca, vunauca e na matadra na tamata kecega, me rere kina ko ira na tani.

21Au sa vakarota e na mata ni Kalou kei na mata ni Turaga ko Karisito Jisu, kei na matadra na agilosi digitaki, mo muria na veika oqo ka kakua ni vinakata e dua ka cata e dua, mo kakua ni kitaka e dua na ka e na veidigidigi walega.

22Kakua ni vakatotolo e na veitabaki ni liga vua e dua, ka mo kakua ni kauwai e na nodra i valavala ca na tamata tani; maroroi iko mo savasava tiko.

23Kakua ni gunu wai dranu tikoga, ia mo gunuva vakalailai na waini e na vuku ni ketemu, kei na mate sa dautauvi iko wasoma.

24Na nodra i valavala ca na tamata eso sa votu ga eliu, a ra sa lako eliu me cudruvi, ia na nodra ca na tamata eso sa muri mai.

25Sa vaka talega kina nai valavala vinaka sa votu ga eliu, ia ko ira e sega sa sega ni tabonaki rawa.