Same 106 - Ai Vola Tabu (Vakadewa Makawa Vakavoutaki 2021)（FRV21）

Na Vakatusai ni Cala i Isireli

1 1Vei 16.34; 2Vei 5.13; 2Vei 7.3; Esera 3.11; Same 100.5; Same 107.1; Same 118.1; Same 136.1; Jere 33.11 Dou ia vei Jiova na vakavinavinaka!

Dou vakamolimoli vei Jiova, ni sa yalovinaka ko koya;

ni sa sega ni mudu na nona loloma.

2O cei sa tukuna rawa na cakacaka kaukauwa i Jiova,

se tukuna rawa na nona vinaka kecega?

3Sa kalougata ko ira era vakabauta na lewa dodonu,

kei koya sai valavala dodonu e na veigauna kecega.

4Mo ni nanumi au, i Jiova, e na loloma ko ni sa daulomani ira kina na nomuni tamata;

mo ni lako mai vei au ka vakabulai au;

5ka me'u raica na nodra vinaka na tamata ko ni sa digitaka,

ka me'u marau e na nodra marau na nomuni matanitu,

ka me'u reki vata kei ira na nomuni votavota.

6Keimami sa caka cala vata kei ira na neimami qase;

keimami sa cakava na ka sa sega ni dodonu, keimami sai valavala ca.

7 Lako 14.10-12 Era a sega ni kila na nomuni cakacaka mana

ko ira na neimami qase mai Ijipita;

era sega ni nanuma na kena levu ni nomuni yalololoma,

ka ra sa vakacudrui koya mai na wasawasa, io mai na Wasa Damudamu.

8Ia ka sa vakabulai ira ga ko koya e na vuku ni yacana,

me vakatakila kina ko koya na nona kaukauwa.

9 Lako 14.21-31 Ka sa vunauca na Wasa Damudamu ko koya, a sa di mai;

ka sa tuberi ira ko koya e loma ni wai titobu, me vaka mai na vanua dravuisiga.

10Ka sa vakabulai ira mai na liga i koya sa cati ira,

ia sa vakabulai ira mai na liga ni meca.

11Ka sa luvuca na nodra meca na wai;

sa sega e dua vei ira sa vo bula.

12 Lako 15.1-21 Era sa qai vakabauta na nona vosa;

era seretaka vua na vakavinavinaka.

13Sa sega ni dede era guilecava na nona cakacaka;

era sega ni waraka na nona i vakasala.

14 Tiko 11.4-34 Ka ra garogaro vakalevu ga mai na vanua lala;

ka vakatovolea vakaca na Kalou mai na vanua dravuisiga;

15ka sa solia vei ira ko koya na ka era kerea,

ia sa vakatala e na kedra maliwa na mate rerevaki.

16 Tiko 16.1-35 A ra sa vuvutaki Mosese e na nodra i tikotiko,

kei Eroni na tamata yalosavasava i Jiova.

17Sa kasei na vanua ka tilomi Tecani,

ka buluta nai vavakoso i Epairami.

18Ka sa waqa mai e dua na buka e na nodra i soqosoqo;

sa vakamai ira nai valavala ca na yameyame ni bukawaqa.

19 Lako 32.1-14 Era sa cakava e dua na luve ni bulumakau mai Orepi,

ka ra soro ki na matakau sa vakawaicalataki ka qai buli.

20A ra sa vukica na ka ka nodra i ukuuku,

me tautauvata kei na bulumakau sa daukana co.

21Ka ra guilecava na Kalou na nodra i vakabula,

o koya ka kitaka na ka levu mai Ijipita,

22na cakacaka mana e na vanua i Ame,

kei na ka rerevaki mai na Wasa Damudamu.

23Sa kaya kina ko koya ni na vakarusai ira—

kevaka sa sega ni tu ko Mosese, na nona digitaki,

me tu e na kedra maliwa kei na Kalou,

me vagolea tani na nona cudru ka sega ni vakarusai ira.

24 Tiko 14.1-35 Io, era a beca na vanua sa vinakati sara,

era sega ni vakabauta na nona vosa.

25A ra sa didi e nodra veivale,

ka sega ni vakarorogo ki na vosa i Jiova.

26O koya sa dodoka kina na ligana vei ira,

me vakabalei ira mai na vanua lala,

27 Vsoro 26.33 ka me vakabalea talega na nodra kawa e na veimatanitu,

ka dui vakasevi ira ki na veivanua.

28 Tiko 25.1-13 Era sa vakabauti Peali-Piori talega,

ka ra kania nai madrali vei ira na mate;

29era sa vakararawataki koya e na nodra i valavala,

ka sa kani ira na mate dauveiveitauvi.

30Sa qai tucake ko Finiasi, ka cudruvi ira;

ka sa mudu kina na mate veiveitauvi.

31Ka sa vakabau me nona i valavala dodonu

ki nai tabatamata kecega e sega ni mudu.

32 Tiko 20.2-13 Era sa vakacudrui koya talega mai na wai ni dauvere,

a sa ca kina ko Mosese e na vukudra;

33ka ni ra sa vakararawataka na yalona,

sa vosa cala kina na tebenigusuna.

34 Dvei 2.1-3; 3.5-6 Era sa sega ni vakarusa na veimatanitu,

ka vakaroti ira kina ko Jiova,

35ia era sa la'ki tiko vata ga kei ira na lewe-ni-vanua,

ka vulica na nodra i valavala.

36A ra sa qarava na nodra matakau,

ka ra sa coriti kina.

37 2Tui 17.17 Io, era a vakacabora na luvedra tagane

kei na luvedra yalewa ki na tevoro;

38 Tiko 35.33 ka liviraka na dra sa sega ni cala,

io na kedra dra na luvedra tagane kei na luvedra yalewa,

ni ra vakacabori ira ki na matakau ni Kenani;

ka sa vakasisila kina na vanua e na vuku ni dra.

39Era sa dukadukali vakaoqo e na nodra cakacaka,

ka lako vakatani e na nodra i valavala ca.

40 Dvei 2.14-18 A sa waqa kina na cudru i Jiova vei ira na nona tamata,

ka sa cata kina na nona i votavota;

41ka sa soli ira ki na ligadra na veimatanitu,

ka ra sa lewai ira ko ira era sa cati ira.

42A sa vakasaurarataki ira talega ko ira na nodra meca,

ka ra sa vakamalumalumutaki vei ira.

43Sa vakabulai ira vakavuqa ko koya,

ia ko ira, era sa dauvakacudrui koya e na ka era bosea,

ka ra sa vakamalumalumutaki e na vuku ni nodra i valavala ca.

44Ia ka sa raica ga ko koya na nodra rarawa,

ni sa rogoca ko koya na nodra tagi.

45A sa nanuma e na vukudra na nona veiyalayalati,

ka sa veivutuni me vaka na kena levu ni nona yalololoma.

46Sa lewa talega me ra lomani

vei ira kecega era sa vakabobulataki ira.

47 1Vei 16.35,36 Mo ni vakabulai keimami, i Jiova na neimami Kalou,

ka soqoni keimami vata mai vei ira na veimatanitu,

me keimami ia kina na vakavinavinaka ki na yacamuni tabu

ka daureki talega e na vakavinavinaka vei kemuni.

48Me vakarokorokotaki ko Jiova na nodra Kalou na Isireli,

mai liu sara ka yacova na gauna ena sega ni mudu!

Ia me ra kaya na tamata kecega, “Emeni!”

Me vakacaucautaki ga ko Jiova!