Dauveilewai 10 - Ai Vola Tabu (Vakadewa Makawa Vakavoutaki 2021)（FRV21）

Ko Tola kei Jairi

1Ia sa taravi Apimeleki ko Tola na luve i Pua, na luve i Toto, e dua vei ira na Isakari me vakabulai ira na Isireli; a sa tiko mai Samiri mai na vanua veiulunivanua ko Ifereimi.

2A sa lewai ira na Isireli ko koya ka yabaki ruasagavulu ka tolu, sa qai mate ko koya, ka sa bulu mai Samiri.

3A sa taravi koya ko Jairi, na kai Kiliati, a sa lewai ira na Isireli ko koya ka yabaki ruasagavulu ka rua.

4A sa le tolusagavulu na luvena tagane, era dauvodoka na asa tagane e tolusagavulu, a sa tolusagavulu na nodra koro, a sa vakatokai, Na Veikoro i Jairi, ka yacova na siga oqo, era sa toka mai na vanua ko Kiliati.

5A sa mate ko Jairi, ka sa bulu mai Kamoni.

Na Nodra Veivakararawataki na Luve i Amoni

6A ra sa kitaka tale na ka ca e na mata i Jiova ko ira na Isireli, a ra sa qaravi ira na Peali, kei Aseteroci, kei na veikalou ni Siria, kei na veikalou ni Saitoni, kei na veikalou ni Moapi, kei na nodra kalou na luve i Amoni, kei na nodra kalou na kai Filisitia; ka ra sa biuti Jiova, ka sega ni qaravi koya.

7A sa tubu na cudru i Jiova vei ira na Isireli, ka sa volitaki ira ko koya ki na ligadra na kai Filisitia, kei na ligadra na luve i Amoni.

8Ia e na yabaki ko ya era sa vakararawataki ira na Isireli ka vakasaurarataka; ka yabaki tinikawalu na nodra vakasaurarataki tiko ko ira kecega na Isireli era sa tiko mai tai kadua ni Joritani, e na nodra vanua na Amoraiti, mai Kiliati.

9A ra sa lako ki tai kadua ni Joritani ko ira na luve i Amoni, me veivala kei ira talega na Juta, kei ira na Penijamini, kei ira na Ifereimi; a ra sa vakaloloma sara ko ira na Isireli.

10A ra sa tagi vei Jiova ko ira na Isireli, ka kaya, “Keimami sai valavala ca vei kemuni, ni keimami sa biuta na neimami Kalou, ka qaravi ira na Peali.”

11A sa kaya vei ira na Isireli ko Jiova, “Au sa sega li ni vakabulai kemudou mai vei ira na kai Ijipita, kei ira na Amoraiti, kei ira na luve i Amoni, kei ira na kai Filisitia,

12kei ira na kai Saitoni, kei ira na Amalekaiti, kei ira na kai Maoni, ko ira era sa vakararawataki kemudou; ni dou a tagi vei au?

13Ia dou sa biuti au ga, ka qaravi ira na kalou tani; o koya oqo ka'u na sega kina ni vakabulai kemudou tale.

14Dou lako sara ka la'ki tagi ki na veikalou dou sa digitaka; me ra vakabulai kemudou ko ira e na gauna dou sa vakararawataki kina.”

15A ra sa kaya vei Jiova ko ira na Isireli, “Keimami sai valavala ca; mo ni cakava vei keimami na ka kece e vinaka e matamuni; ia mo ni vakabulai keimami mada ga e na siga oqo!”

16A ra sa qai biuta tani na nodra kalou na kai tani mai na kedra maliwa, ka qaravi Jiova, ka sa sega ni vosota rawa ko koya na nodra rarawa na Isireli.

17A ra sa soqoni vata na luve i Amoni, ka la'ki tiko mai Kiliati. A ra sa soqoni vata na Isireli, ka tiko mai Misipa.

18A ra sa veikayaka vakai ira ko ira na turaga mai Kiliati, “O cei na tamata ena liutaka nai valu kei ira na luve i Amoni? Sai koya ena qai nodra tui kecega na kai Kiliati ko koya.”