Vakatekivu 44 - Ai Vola Tabu (Vakadewa Makawa Vakavoutaki 2021)（FRV21）

Sa Tauri Penijamini Vakavesu ko Josefa

1A sa qai vakarota na tamata dauveiqaravi e na nona vale ko Josefa, ka vaka, “Mo vakasinaita na nodratou taga na tamata oqo e na kakana, me vaka na ka eratou rawa ni colata, ka biuta na nona i lavo na tamata yadua ki na gusu ni nona taga.

2Dou biuta na noqu bilo, na bilo siliva e na gusu ni nona taga sa gone duadua, kei nai lavo ni nona sila.” A sa cakava ko koya me vaka sa kaya ko Josefa.

3Ni sa kida na mataka, eratou sa vakalesui yani na turaga veitacini kei na nodratou asa.

4Ni ratou se qai lako sivita ga na koro, ka se sega ni lako vakayawa, sa kaya ko Josefa vua na tamata dauveiqaravi e na nona vale, “Mo ia, mo muri iratou na tamata ko ya; ia ni ko sa yacovi iratou, mo qai kaya vei iratou, ‘A cava na vuna dou sa sauma kina na vinaka e na ca? A cava dou sa butakoca kina na noqu bilo siliva?

5Sa sega beka ni ka oqo sa gunu mai kina na noqu turaga? Sa sega beka ni dau vakayagataka me kilakila-ka kina? Dou sa caka ca e na ka dou sa cakava oqo.’ ”

6Ni sa yacovi iratou yani ko koya, a sa cavuta vakavuqa vei iratou na vosa oqo.

7A ratou sa kaya vua, “A cava na vuna sa vosa kina vakaoqo na noqu turaga? Sa dredre sara vei iratou na nomuni tamata me keitou kitaka na ka vakaoqori!

8Raica, nai lavo keitou a kunea e na gusu ni neitou taga, keitou a kauta tale mai kivei kemuni mai na vanua ko Kenani. E rawa vakacava me keitou qai butakoca tale na siliva se na koula mai na vale ni nomuni turaga?

9Ko koya vei keitou na nomuni tamata sa kune vua, me mate ko koya; ia koi keitou na kena vo, keitou na nona bobula na noqu turaga.”

10A sa kaya ko koya, “Sa donu vinaka oqori; me vaka ga na nomudou vosa, ni ko koya sa kune vua ena noqu bobula, ia koi kemudou na kena vo mo dou lako yani e na galala.”

11A ratou sa kusarawa, ka tauca sobu ki na qele ko iratou na tamata yadua na nona taga, ka sereka yadua na nona taga.

12A sa vakasaqara ko koya, sa vakatekivu vua sa qase, ka vakaotia vei koya sa gone duadua; ka sa kune na bilo e na taga i Penijamini.

13E na ka oqo eratou sa dresuka kina na nodratou i sulu. Sa qai vakavodoka na tamata yadua na nona taga ki na nona asa, ka lesu ki na koro.

14A ratou sa lako mai ko Juta kei na veitacini ki na vale i Josefa ni sa tikotiko ga kina ko koya; a ratou sa cuva ki na qele e matana.

15A sa kaya vei iratou ko Josefa, “A cakacaka cava oqo dou sa cakava? Dou sa lecava beka ni sa rawarawa sara ki na tamata me vakataki au me daurairai?”

16A sa kaya ko Juta, “A cava tale me keitou qai kaya vua na noqu turaga? A cava me keitou tukuna? Se keitou na vakadonui keitou vakacava? Sa kunea na Kalou na neitou cala na nomuni tamata. Raica, koi keitou sa nona bobula na noqu turaga, koi keitou kei koya sa kune vua na bilo.”

17A sa kaya ko koya, “Me kakua sara vei au ni'u cakava oqori! A tamata ga ka sa kune vua na bilo, ko koya ga ena noqu bobula; ia koi kemudou, dou lako e na vakacegu vua na tamamudou.”

Vakamamasu ko Juta me baleti Penijamini

18Sa qai toro vua ko Juta, ka kaya, “Kemuni na noqu turaga, ni vosota mada na nomuni tamata me'u tukuna e dua na vosa e daligamuni na noqu turaga, ia me kakua ni waqa na nomuni cudru vei au na nomuni tamata; ni kemuni sa vakataki Fero.

19A noqu turaga sa tarogi keitou na nona tamata eliu, ka vaka, ‘Sa dua li na tamamudou, se na tacimudou?’

20Keitou a kaya vua na noqu turaga, ‘Sa tiko na tama i keitou, ka sa qase sara, kei na dua taci keitou gone, o koya na luvena ni sa qase. A sa mate na tuakana, ia sa vo duaduaga ko koya vei ira na luve i tinana, ka sa daulomani koya ko tamana.’

21Ko ni sa qai kaya vei keitou na nomuni tamata, ‘Dou kauti koya sobu mai vei au, me raici koya na mataqu.’

22Ia keitou a kaya vei kemuni na noqu turaga, ‘E dredre ni lako tani vei tamana na gone, ni na mate ko tamana kevaka sa lako tani vua.’

23Kemuni sa qai kaya vei keitou na nomuni tamata, ‘Kevaka sa sega ni lako sobu mai kei kemudou na tacimudou gone duadua, dou na sega ni raica tale na mataqu.’

24Ia ni keitou a lako vua na nomuni tamata na tamaqu, keitou sa qai tukuna vua na nomuni vosa na noqu turaga.

25A sa kaya na tama i keitou, ‘Dou lesu tale, ka volia vakalailai mai na keda,’

26ka keitou sa qai kaya, ‘E dredre ni keitou lako sobu. Kevaka wale ga ena lako kei keitou na taci keitou sa gone, keitou na qai lako sobu; ni sa tabu ni keitou raica na matana na tamata, kevaka sa sega ni tiko kei keitou na taci keitou sa gone.’

27A sa kaya vei keitou na nomuni tamata na tamaqu, ‘Dou sa kila ni a vakasucuma vei au na watiqu e le rua na luvequ tagane;

28e dua sa biuti au, ka'u a kaya, “Sa dresulaki vakaidina ko koya”, ka'u sa sega ni raici koya tale ka yacova na gauna oqo.

29Ni kevaka dou sa kauta tani talega yani mai vei au oqo, ka sa yacovi koya na ca, dou na qai kauta sobu na uluqu sa sika ki nai bulubulu e na rarawa.’

30“Ia ni'u sa lako vua na nomuni tamata na tamaqu, a sa sega ni tiko kei keitou na gone; ka ni sa vauci vata na nodrau bula;

31ena yaco, ni sa raica sa yali na gone, ena qai ciba ko koya; ia ena vakayacora kina koi keitou na nomuni tamata na kena vakauti sobu na uluna sa sika na nomuni tamata na tama i keitou ki nai bulubulu e na rarawa.

32Ni sai au na nomuni tamata sa na taroga na tamaqu e na vuku ni gone ke sa yali, ni'u sa kaya vua, ‘Kevaka ka'u sa sega ni kauti koya tale mai vei iko, mo qai beitaki au kina na tamaqu, ka tawa mudu.’

33Ia oqo, mo ni yalo vinaka me'u tiko mada ga koi au na nomuni tamata mei sosomi ni gone; ka me'u nomuni bobula na noqu turaga; ia me lesu tale na gone kei iratou na tuakana.

34Ni'u na lako cake vakacava vei tamaqu ni sa sega ni tiko kei au na gone? Sa dredre dina vei au me'u raica na ka rarawa ena yacovi koya na tamaqu.”