2 Korinica 1 - Ai Vola Tabu (Vakadewa Makawa Vakavoutaki 2021)（FRV21）

1 Caka 18.1 Koi au ko Paula, nai apositolo i Karisito Jisu e na lewa ni Kalou, kei Timoci na wekaqu,

Kivei ira nai soqosoqo lotu ni Kalou mai Korinica, kei ira kecega era sa lotu mai Akaia taucoko:

2Me nomudou na loloma kei na vakacegu mai vua na Kalou ko Tamada kei na Turaga ko Jisu Karisito.

Na Vakavinavinaka nei Paula ni Oti na Veivakararawataki

3Me vakavinavinakataki na Kalou, o koya na Tama ni noda Turaga ko Jisu Karisito, a Tama ni yalololoma, kei na Kalou ni veivakacegui kecega,

4o koya sa vakacegui keitou e na neitou rarawa kecega, me keitou vakacegui ira rawa era sa rarawa e na dua na ka, e na veivakacegui keitou sa vakacegui kina mai vua na Kalou.

5Ia me vaka sa yaco vakalevu sara vei keitou na rarawa e na vuku i Karisito, sa vakacegui keitou vakalevu sara vakakina na Karisito.

6Ia kevaka keitou sa vakararawataki, sa ka mo dou vakacegui kina ka vakabulai, ka sa yaco oqo ni dou sa vosota talega na veika rarawa keitou sa vakararawataki kina; se keitou vakacegui, sa ka mo dou vakacegui kina ka vakabulai.

7Ia sa tudei na neitou nuitaki kemudou, ni keitou sa kila, dou sa votai e na veivakararawataki, dou na votai talega e na veivakacegui.

8 1Kori 15.32 Ni keitou sa sega ni vinakata, na veiwekani, mo dou lecava na neitou rarawa sa yaco vei keitou mai Esia, ni keitou sa bitaki vakalevu sara, sa dredre kina na vosota, ka keitou sa sega ni dinata ni keitou na bula.

9Ia keitou sa vaka ni keitou sa lewai me keitou mate, me keitou kakua ni vakararavi kina vei keitou, vua ga na Kalou o koya sa vakaturi ira cake tale na mate.

10O koya ka vakabulai keitou mai na mate levu ko ya, ka na veivakabulai tikoga; o koya talega keitou sa vakararavi kina ni na vakabulai keitou tale,

11ni dou veivuke talega e na masulaki keitou, me lewe vuqa kina era vakavinavinaka e na vuku i keitou, e na vuku ni ka sa soli vei keitou e na vukudra na lewe vuqa.

Veisau nai Tuvatuva ni Veisiko i Paula

12Ia oqo na ka keitou sa rekitaka, nai tukutuku ni neitou lewa e loma, ni sa ia na neitou i valavala e vuravura oqo e na loma e dua bauga, kei na loma dina vua na Kalou, ka sa segai e na vuku vakavuravura, ia e na loloma ga ni Kalou—ka vakalevu sara vei kemudou.

13Ni sa sega na ka tani keitou sa vola vei kemudou, oqori ga dou sa wilika ka kila; ka'u sa nuitaka ni dou na kila me yacova nai vakataotioti—

14me vaka na nomudou kilai keitou ga e na ka eso—ia e na siga ni noda Turaga ko Jisu, dou na qai rekitaki keitou ka keitou na rekitaki kemudou.

15Ia ni ka'u a vakadinata oqo, ka'u a nanuma me'u lako eliu vei kemudou, me yaco kina vakarua vei kemudou nai solisoli loloma;

16Caka 19.21ka me'u qai laivi kemudou ka lako ki Masitonia ka lesu tale mai Masitonia vei kemudou, mo dou kauti au e na noqu lako vaka ki Jutia.

17Ia ni ka'u a nanuma me vakaoqo, au sa qai lomalomarua kina, se segai? Se na ka ka'u sa nakita, au sa nakita vakavuravura beka, me'u tukuna kina na “Io, io,” kei na “Sega, sega” e na gauna vata ga?

18Ia me vaka ni sa yalodina na Kalou, na neitou vosa vei kemudou sa sega ni “Io kei na Sega.”

19Caka 18.5Ni sa sega ni “Io kei na Sega” na neitou vunautaka vei kemudou na Luve ni Kalou, ko Jisu Karisito, oi keitou kei Silivenusi kei Timoci; ia e na vukuna, sa cakava ga ko koya me “Io.”

20Ni sa “Io” na vosa ni yalayala kecega ni Kalou e na vukuna. Oqo na vuna e da sa cavuta kina e na vukuna na “Emeni,” me vakacaucautaki kina na Kalou.

21Ia sai koya ga na Kalou sa vakataudeitaki keitou kei kemudou me da tu vata kei Karisito, ka sa lumuti keda;

22o koya talega sa dregati keda, ka sa solia ki na lomada na Yalo Tabu me kenai vakadei.

23Ia ka'u sa kaciva na Kalou me lewa na yaloqu kevaka ka'u sega ni dina: ni sa noqu lomani kemudou ga ka'u sa vakaberaberataka kina na noqu lako tale yani ki Korinica.

24Sa segai ni keitou sa veitaliataka na nomudou vakabauta, ia keitou sa veivuke ga e na nomudou reki, ni dou sa tudei ga e na vakabauta.