Jope 1 - Ai Vola Tabu (Vakadewa Makawa Vakavoutaki 2021)（FRV21）

Ko Jope kei na Nona Matavuvale

1Sa dua na tamata mai na vanua ko Usu, na yacana ko Jope; ia na tamata ko ya sa yalododonu ka daucaka dodonu, a sa rerevaka tiko na Kalou, ka sega ni torova na ca.

2Sa sucu e le vitu na luvena tagane ka le tolu na luvena yalewa.

3Ia na nona i yau sa vitu na udolu na sipi, ka tolu na udolu na kameli, ka dua na udolu na bulumakau, ka lima na drau na asa yalewa, ka sa ka tani na nona lewe ni vuvale; ka sa uasivi cake kina na tamata oqo vei ira kecega na lewe-ni-vanua mai na tokalau.

4A sa lako ko iratou na luvena tagane, ka ia na kana vata e nodratou veivale yadua, e na nona siga; ka ratou sa talaki ka kaciva na ganedratou tolutolu me mai kana ka gunu vata kei iratou.

5Ia ni sa oti na veisiga ni kana magiti, sa qai talaki ko Jope ka vakasavasavataki iratou, ka sou e na mataka, ka vakacabora nai soro kama me vaka na kedratou i wiliwili kecega. Ni sa kaya ko Jope, “De sa cala ko iratou na luvequ, ka vosavakacacataka lo na Kalou e lomadratou.” Ia sa daukitaka voli vakaoqo ko Jope.

Vakadonui vei Setani me Vakatovolei Jope

6 Vteki 6.2 Ia sa dua na siga era sa lako mai kina na luve ni Kalou me vakaraitaki ira e na mata i Jiova, ka sa lako talega mai kei ira ko Setani.

7Sa kaya vei Setani ko Jiova, “Ko sa lako mai vei?” A sa kaya vei Jiova ko Setani, “Au sa dauveilakoyaki e vuravura, ka gade voli kina.”

8Ka sa kaya vei Setani ko Jiova, “Ko bau vakananuma li na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, ka sa rerevaka na Kalou, ka sega ni torova na ca?”

9Vtaki 12.10Sa qai kaya vei Jiova ko Setani, “Sa sega beka na vuna sa rerevaka kina na Kalou ko Jope?

10Ko ni sa sega beka ni viribaiti koya, kei na nona vale, kei na nona ka kece e na veiyasana kecega? Ko ni sa vakalougatataka na cakacaka ni ligana, ka sa tubu kina me ka levu na nona i yau e na vanua.

11Ia mo ni dodoka mada na ligamuni, ka tara na nona ka kecega, ena qai vosavakacacataki kemuni ki matamuni ko koya.”

12Ka sa kaya vei Setani ko Jiova, “Raica, sa soli ki ligamu na nona ka kecega; ia mo kakua ga ni dodoka na ligamu mo tarai koya.” A sa lako tani ko Setani mai na mata i Jiova.

Vakayalia ko Jope na Nonai Yau kei Iratou na Luvena

13Ka sa dua na siga eratou sa kana kina ka gunu waini ko iratou na luvena tagane, kei na luvena yalewa e na vale nei tuakadratou ka ulumatua,

14a sa lako mai e dua na tamata vei Jope, ka kaya, “Era a cukicuki tiko e nai siviyara na bulumakau ka ra kana voleka voli na asa,

15ka sa sikiti ira ko ira na kai Sipa, ka kauti ira tani, ka ra sa vakamatei ira na cauravou e nai seleiwau; ia koi au duaduaga ka'u sa dro bula me'u tukuna vei iko.”

16Ni sa vosa tiko ko koya, sa lako mai e dua tale, ka kaya, “Sa lutu mai lomalagi na bukawaqa ni Kalou ka sa vakama na sipi kei ira na cauravou, io, sa kani ira sara; ia koi au duaduaga ka'u sa dro bula me'u tukuna vei iko.”

17Ni sa vosa tiko ko koya, sa lako mai e dua tale, ka kaya, “Era lesia e tolu na mataivalu ko ira na kai Kalitia, ka ra sikiti ira na kameli ka kauta tani, ka ra sa yaviti ira na cauravou e nai seleiwau; ia koi au duaduaga ka'u sa dro bula me'u tukuna vei iko.”

18Ni sa vosa tiko koya, sa lako mai e dua tale, ka kaya, “Sa ra kana ka gunu waini ko iratou na luvemu tagane kei na luvemu yalewa mai na vale nei tuakadratou na ulumatua,

19ka raica, sa liwa e dua na cagi levu mai na vanua lala ka sa roba na tutu ni vale vava, ka sa baleti ira na cauravou, ka ra sa mate; ia koi au duaduaga ka'u sa dro bula me'u tukuna vei iko.”

20Sa qai tucake ko Jope, ka dresulaka na nona i sulu, ka tasia na uluna, ka cuva ki na qele, ka lotu;

21ka sa kaya, “Au a luvawale ni'u a lako mai na kete i tinaqu, ka'u na luvawale talega ni'u sa suka lesu. Sa solia ko Jiova, ka sa kauta tani ko Jiova; me vakavinavinakataki ga na yaca i Jiova.”

22E na ka kecega oqo sa sega ni cala kina ko Jope, se kaya ko koya ni sa cala na Kalou.