2 Samuela 8 - Ai Vola Tabu (Vakadewa Makawa Vakavoutaki 2021)（FRV21）

Na Veivanua e Qaqa kina Vakaivalu ko Tevita(1 Veigauna 18.1-17)

1Sa oti na ka oqo, sa qai yaviti ira na kai Filisitia ko Tevita, ka vakamalumalumutaki ira; a sa tauri Mecekiama vakaukauwa ko Tevita mai vei ira na kai Filisitia.

2A sa mokuti ira na Moapi, a sa vakarautaki ira e na wa ni vakarau, ka vakadavori ira ki na qele. A sa vakarautaki ira e na wa ni vakarau, e rua nai yatu me vakamatei, ka dua nai yatu taucoko me vakabulai. A ra sa qai qali vei Tevita ko ira na kai Moapi ka dausoli vakacavacava vua.

3A sa yavita ko Tevita na luve i Riopi, ko Etateseri, na tui Sopa, ni sa lako ko koya me taura tale na nona lewa mai na uciwai ko Uferetisi.

4A sa rawata mai vei koya ko Tevita e le dua na udolu ka vitu na drau na tamata sa vodo ose, ka le rua na oba (20,000) na tamata era taubale. A sa tava na tularua ni ose ni qiqi-ni-valu kecega ko Tevita, ia sa maroroya ga mai vei ira na ose me rauta e dua na drau na qiqi-ni-valu.

5Ka ni ra sa lako mai na kai Siria mai Tamasiko me vukei Etateseri na tui Sopa, sa mokuta ko Tevita e le rua na oba ka rua na udolu (22,000) na tamata vei ira na kai Siria.

6Sa qai lesia ko Tevita na mataivalu e vakatawa e Siria mai Tamasiko; a ra sa qai qali vei Tevita ko ira na kai Siria, ka dau soli vakacavacava vua. A sa vakabulai Tevita ko Jiova e na vanua kecega ka lako kina.

7A sa taura ko Tevita na veisasabai koula sa nodra na tamata i Etateseri, ka kauta ki Jerusalemi.

8A sa taura ko Tevita na tui e dua na ka levu sara na parasa, mai Peta kei Perocae, erau sa koro i Etateseri.

9Ni sa rogoca ko Tou na tui Emaci ni sa mokuta ko Tevita nai valu taucoko i Etateseri,

10sa qai talai Jorami na luve i Tou vei Tevita na tui, me veikidavaki kaya, ka vosavakalougatataki koya, ni sa ia nai valu kei Etateseri, ka mokuti koya ni sa veivala oti kei Etateseri ko Tou. A sa kauta vata kaya ko Jorami nai yaya siliva kei nai yaya koula, kei nai yaya parasa.

11Ko ya talega sa vakacabora vei Jiova ko Tevita na tui, ka sa vakacabora talega na siliva kei na koula ka rawata ko koya mai na veimatanitu kecega sa vakamalumalumutaka,

12io, mai Siria, kei Moapi, kei ira na luve i Amoni, kei ira na kai Filisitia, kei ira na Amalekaiti, kei nai toki-ni-valu mai vua na luve i Riopi, ko Etateseri, na tui Sopa.

13 Same 60 A sa rogo levu na yaca i Tevita, ni sa tale mai na nona mokuti ira na kai Siria e lewe tinikawalu na udolu, mai na Buca ni Masima.

14A sa lesia ko koya na veimataivalu i vakatawa ki Itomi; io, ki Itomi taucoko, a ra sa qai tauri kecega ko ira na kai Itomi me ra qali vei Tevita. A sa vakabulai Tevita ko Jiova e na vanua kecega sa lako kina.

Ko Ira nai Vakalesilesi nei Tevita

15A sa nodra tui na Isireli kecega ko Tevita. A sa kitaka na lewa dodonu ko Tevita vei ira kecega na nona tamata.

16A sa lewai ira nai valu ko Joape na luve i Seruwaia; a sa dauvola na ka ni matanitu ko Josefati, na luve i Eilute;

17ia erau sa bete ko Setoki, na luve i Eiitupi, kei Eiimeleki, na luve i Epaiaca; a sa vunivola ko Siraia;

18a sa turaga vei ira na Kireci, kei na Pileci, ko Penaia, na luve i Jioiata; a ra sa turaga ko iratou na luve i Tevita.