1 Cesalonaika 5 - Ai Vola Tabu (Vakadewa Makawa Vakavoutaki 2021)（FRV21）

Mo ni Vakarau ni Sa Voleka Mai na Turaga

1Ia sa sega ni yaga me'u volavola vei kemudou, na veiwekani, me'u tukuna na veigauna kei na veiyabaki.

2Maciu 24.43; Luke 12.39; 2Pita 3.10Ni dou sa kila dina sara vakataki kemudou ni na lako mai na siga ni Turaga, me vaka na daubutako e na bogi.

3Ni ra kaya tiko, “Sa mai vakacegu ka tiko vinaka;” ena qai yaco vakidacala vei ira na rusa, me vaka na yaluma vua na yalewa sa bukete; a ra na sega ni dro tani rawa.

4Io koi kemudou na veiwekani, dou sa sega ni tiko e na butobuto, me yacovi kemudou kina na siga ko ya me vaka na daubutako.

5Oi kemudou kecega na gone ni rarama, kei na gone ni siga. Eda sa sega ni gone ni bogi, se gone ni butobuto.

6O koya oqo me da qai kakua ni moce, me vakataki ira na tani, ia me da vakatawa ga ka yalomatua.

7Ni ko ira era daumoce, era sa moce e na bogi, kei ira era daumateni, era sa mateni e na bogi.

8Aisea 59.17; Efe 6.13-17Ia koi keda, eda sa gone ni siga, me da yalomatua, me da vauca na vakabauta kei na loloma mei sasabai ni lomasereda, kei na vakanuinuitaka na bula, mei vakaruru ni uluda.

9Ni sa sega ni lesi keda na Kalou me da rusa, ia me da rawata ga na bula e na vuku ni noda Turaga ko Jisu Karisito,

10o koya ka mate e na vukuda, me da bula vata kaya, se da yadra se da moce.

11O koya oqo mo dou qai ia na veivakacegui vakai kemudou, ka veivakatataki cake vakai kemudou, me vaka dou sa kitaka tiko.

Nai Otioti ni Veivakasalataki kei na Vakanuinui Vinaka

12Ia keitou sa vakamasuti kemudou, na veiwekani, mo dou kilai ira era sa daucakacaka vei kemudou, ka lewai kemudou e na Turaga, ka vakavulici kemudou;

13ka mo dou vakarokorokotaki ira, ka lomani ira vakalevu sara, e na vuku ni nodra cakacaka. Ka mo dou veivinakati vakai kemudou.

14Ia keitou sa vakarota vei kemudou, na veiwekani, mo dou vunauci ira era sa talaidredre, vakacegui ira era sa yalolailai, vukei ira era sa malumalumu, dauvosoti ira kecega na tamata.

15Raica me kakua ni dua e veisausaumitaka na ca vua e dua, ia mo dou dui vakayacora tikoga na ka e vinaka vei kemudou yadua, vei ira talega na tamata kecega.

16Dou reki tikoga.

17Dou masu tikoga ka kua ni mudu.

18Dou ia na vakavinavinaka e na vuku ni ka kecega; ni sa loma ni Kalou oqo vei kemudou e na vuku i Karisito Jisu.

19Dou kakua ni tarova na cakacaka ni Yalo Tabu.

20Dou kakua ni beca na vosa ni parofisai.

21Vakatovolea na ka kecega; taura matua na ka e vinaka.

22Qarauni kemudou mai nai valavala kecega sa ca.

23Ia me vakasavasavataki kemudou sara na Kalou ni veivakacegui; ka me sa maroroi taucoko, me kakua sara ni cala, na yalomudou kei na lomamudou kei na yagomudou, ka yacova na siga ena lako tale mai kina na noda Turaga ko Jisu Karisito.

24Sa yalodina ko koya sa kacivi kemudou, ka na kitaka vakaoqo ko koya.

25Oi kemudou na veiwekani, dou masulaki keitou.

26Sa loloma yani vei ira kecega na veiwekani ka dou veireguci e na yalosavasava.

27Au sa vakarota vei kemudou e na yaca ni Turaga me wiliki nai vola oqo vei ira kecega na veiwekani yalosavasava.

28Me nomudou na loloma ni noda Turaga ko Jisu Karisito. Emeni.