Jope 16 - Ai Vola Tabu (Vakadewa Makawa Vakavoutaki 2021)（FRV21）

Vakadeitaka ko Jope ni Sega na Nona Cala

1Sa qai vosa ko Jope ka kaya:

2“E vuqa na ka vakaoqo ka'u sa rogoca;

na dauveivakacegui dauveivakararawataki koi kemudou kecega.

3Ena oti ninaica na vosa wale?

Se na cava beka sa vakayavalati iko mo vosa tikoga mai kina?

4Sa rawa vei au me'u vosa talega me vakataki kemudou,

kevaka dou sa vakataki au;

Sa rawa vei au me'u veitokonitaka na vosataki kemudou,

ka kurea na uluqu vei kemudou.

5Sa rawa vei au me'u vakaukauwataki kemudou e na gusuqu,

kei na veivakacegui ni tebenigusuqu ena vakamalumutaka na nomudou rarawa.

6“Ke'u sa vosa, sa sega ni malumu kina na noqu rarawa,

ka kevaka ka'u sa cegu ni vosa, na mosi cava e na takali li vei au?

7Ia oqo sa qai vakaocai au vakaidina na Kalou;

ka sa vakatara me'u vakayalia na wekaqu kecega.

8Ka sa vakasalulutaki au ko koya,

ka oqori sai tukutuku me baleti au;

na noqu suivotu sa rairai mai,

ka sa vakatakilai au ki mataqu.

9Sa dresulaki au e na nona cudru, ka sa cati au;

sa vakasequruquru bati vei au;

ko koya na noqu meca sa mata cudrucudru mai vei au.

10Era sa vakadudu gusu vei au na tamata;

era sa sabica na baluqu e na veivakalialiai;

era sa yalovata me vakacacani au mai.

11Sa soli au yani na Kalou vei ira na tamata ca

ka sa biuti au yani ki na ligadra nai valavala ca.

12Au a tiko vakacegu, ka sa qai musuki au ko koya;

sa taura talega na domoqu, ka vorolaki au vakalalai;

sa vakaturi au me'u nona takete;

13sa vakavolivoliti au ko ira na nona dauvanavana.

Sa seleta tadola na noqu ivi ko koya, ka sega ni yalololoma;

sa livia yani na miqu ki na qele.

14Sa dauvorolaki au wasoma;

sa daucicivi au mai vakusakusa me vaka e dua na tuwawa.

15Au sa cula nai sulu taga ki na kuliqu,

ka vakadavora sobu na noqu kaukauwa ki na kuvu-ni-soso.

16A mataqu sa damudamu e na tagi,

ka sa tauca na dakudaku-ni-mataqu na yaloyalo ni mate,

17ka dina ga ni sa sega ni tu e ligaqu nai valavala kaukauwa,

ka sa savasava na noqu masumasu.

18“O iko na qele, mo kakua ni vunia na noqu dra,

laiva ga na noqu tagi me kakua ni kune vakacegu.

19 Jope 19.25 Oqo talega, raica, sa tiko mai lomalagi na noqu i vakadinadina,

ka sa tiko mai cake ko koya sa dauveitokoni e na vukuqu.

20Sa vakalialiai au ko iratou na noqu i tokani;

sa tuturu tikoga na wai ni mataqu vua na Kalou,

21ka me tara mada vua na tamata me veilewai kaya na Kalou,

me vaka na tamata sa veilewai kaya na wekana!

22Ni sa na oti mada e vica ga na yabaki,

ka'u na qai lako yani e na sala ka'u na sega ni lesu tale mai kina.